இந்திய எல்லை பாதுகாப்பில் ஒரு முக்கிய மைல்கல்லாக, கிழக்கு லடாக்கின் டெப்சாங் மற்றும் டெம்சோக் ஆகிய பகுதிகளில் நிலவி வந்த நீண்டகால இழுபறிக்கு தற்போது தீர்வு காணப்பட்டுள்ளது. கடந்த 2012-ஆம் ஆண்டிலிருந்து இந்திய தரப்பால் ரோந்து செல்ல முடியாமல் இருந்த சுமார் 900 சதுர கிலோமீட்டர் பரப்பளவு கொண்ட பகுதி, 2024 அக்டோபர் 21-ஆம் தேதி எட்டப்பட்ட வரலாற்று சிறப்புமிக்க ஒப்பந்தத்தின் மூலம் மீண்டும் இந்தியாவின் ரோந்து அதிகார வரம்பிற்குள் வந்துள்ளது. இது ஏதோ 2020-க்கு பிறகு இழந்த நிலம் மீட்கப்பட்டதாகக் கருத முடியாது; மாறாக கடந்த 10 ஆண்டுகளுக்கும் மேலாக முடங்கி கிடந்த இந்தியாவின் இறையாண்மை உரிமைகள் தற்போது மீட்டெடுக்கப்பட்டுள்ளன என்பதே நிதர்சனம்.
அரசியல் ரீதியாக சில தரப்பினர் லடாக்கில் மேய்ச்சல் நிலங்கள் பறிபோய்விட்டதாக கூறி வரும் நிலையில், தற்போதைய கள நிலவரம் முற்றிலும் வேறாக உள்ளது. சமீபத்திய தகவல்களின்படி, லடாக்கின் மேய்ச்சல் சமூகத்தினர் தங்களின் பாரம்பரிய நிலங்களுக்கு சென்று கால்நடைகளை மேய்ப்பதற்கான உரிமைகள் முழுமையாக நிலைநாட்டப்பட்டுள்ளன. குறிப்பாக சுஷூல், டெம்சோக் போன்ற பகுதிகளில் இந்திய வீரர்கள் மற்றும் உள்ளூர் மக்களின் நடமாட்டம் உறுதி செய்யப்பட்டுள்ளது. சீனாவுடனான இந்த உடன்படிக்கை என்பது இரு நாடுகளும் தங்களின் எல்லைக் கோடு வரை தடையின்றி ரோந்து செல்வதை உறுதி செய்கிறது, இது தேவையற்ற ராணுவ மோதல்களை தவிர்ப்பதற்கான ஒரு தற்காலிக அமைதித் திட்டமாக பார்க்கப்படுகிறது.
எல்லை பகுதியில் ராணுவ ரீதியாக ஒரு இணக்கமான சூழல் உருவாகி கொண்டிருக்கும் வேளையில், சீனா தனது பழைய தந்திரமான ‘வரைபடப் போர்’ மூலம் மீண்டும் சீண்டல்களை தொடங்கியுள்ளது. அருணாச்சல பிரதேசம் மற்றும் அக்சாய் சின் பகுதிகளை தன்னுடையது என சித்தரித்து சீனா வெளியிட்ட வரைபடத்திற்கு இந்திய வெளியுறவு அமைச்சகம் கடும் கண்டனம் தெரிவித்துள்ளது. வெளியுறவுத்துறை அமைச்சர் ஜெய்சங்கர் கூறியது போல, “வெறும் வரைபடங்களை வரைந்து கொள்வதால் ஒரு நாட்டின் எல்லை மாறிவிடாது”. நிலத்தில் ஒரு விதமாகவும், காகிதத்தில் ஒரு விதமாகவும் செயல்படும் சீனாவின் இந்த இரட்டை வேடத்தை இந்தியா ராஜதந்திர ரீதியாக மிக துல்லியமாக கையாண்டு வருகிறது.
மறுபுறம், பாகிஸ்தானால் சட்டவிரோதமாக ஆக்கிரமிக்கப்பட்டு பின்னர் சீனாவுக்கு கொடுக்கப்பட்ட ஷக்சகம் பள்ளத்தாக்கில் சீனாவின் கட்டுமான பணிகள் குறித்து இந்தியா தனது கவலைகளை தெரிவித்துள்ளது. சீனா இந்த பகுதி வரலாற்று ரீதியாக தங்களுக்கு சொந்தமானது என கூறுவது முற்றிலும் தவறானது; ஏனெனில் இது பாகிஸ்தான் 1963-ல் சீனாவுக்கு சட்டவிரோதமாக தாரை வார்த்த இந்திய நிலப்பகுதியாகும். இத்தகைய சிக்கல்களுக்கு மத்தியிலும், பாஜக மற்றும் ஆர்எஸ்எஸ் நிர்வாகிகளை சீன கம்யூனிஸ்ட் கட்சியின் தூதுக்குழு சந்தித்து பேசியுள்ளது ஒரு முக்கியமான அரசியல் நகர்வாக கருதப்படுகிறது. உலக அளவில் செல்வாக்கு மிக்க இரண்டு பெரிய அமைப்புகள் ஒருவரை ஒருவர் எடைபோடுவதற்கான ஒரு வாய்ப்பாகவே இந்த பேச்சுவார்த்தைகள் பார்க்கப்படுகின்றன.
இந்தியாவின் வெளியுறவு தந்திரத்தில் தற்போது ‘குட் காப், பேட் காப்’என்ற உத்தி கையாளப்படுவதாக தெரிகிறது. வெளியுறவு அமைச்சர் ஜெய்சங்கர் சர்வதேச மேடைகளில் சீனாவின் அத்துமீறல்களை கடுமையான வார்த்தைகளால் சாடி வரும் நிலையில், தேசிய பாதுகாப்பு ஆலோசகர் அஜித் தோவல் போன்றவர்கள் பின்னணியில் பேச்சுவார்த்தைகள் மூலம் அமைதியை நிலைநாட்ட முயல்கின்றனர். அமெரிக்கா போன்ற நாடுகள் தெற்காசியாவில் சீனாவுக்கு எதிராக இந்தியாவை தூண்டிவிட்டு பலன் காண நினைக்கும் சூழலில், சீனா மற்றும் இந்தியா ஆகிய இரு நாடுகளுமே தங்களுக்குள் மோதி கொள்வதை விட, ஒரு சமநிலையை பேணுவதே தற்போதைய உலகப் பொருளாதாரச் சூழலில் சிறந்தது என்பதை உணர்ந்துள்ளன.
இறுதியாக, உள்நாட்டு அரசியலில் கடந்த கால தவறுகளை மறைத்துவிட்டு இன்று தேசப்பற்று பேசுபவர்களை மக்கள் உன்னிப்பாக கவனித்து வருகின்றனர். 1962 போரில் ஆயிரக்கணக்கான சதுர கிலோமீட்டர் நிலத்தை இழந்தவர்களும், 2008-ல் வெளிப்படையற்ற ஒப்பந்தங்களில் கையெழுத்திட்டவர்களும் இன்று எல்லை பாதுகாப்பு குறித்து விமர்சிப்பது வேடிக்கையானது. இந்தியா மற்றும் சீனா ஆகிய இரு நாடுகளும் அண்டை நாடுகள் என்ற ரீதியில் சில மோதல்களை தவிர்க்க முடியாது என்றாலும், ராணுவ வலிமை மற்றும் பொருளாதார தன்னிறைவு மூலம் சீனாவுக்கு சரியான பதிலடி கொடுத்து வருகிறது பாரதம். ரோந்து உரிமைகள் மீட்கப்பட்டது என்பது ஒரு சிறிய முன்னேற்றம் அல்ல, அது இந்தியாவின் அசைக்க முடியாத ராஜதந்திரத்திற்கு கிடைத்த பெரும் வெற்றியாகும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
