இந்திய மாணவர்கள் உலகளாவிய கல்வி வரைபடத்தை தற்போது மாற்றியமைத்து வருவதாக புதிய புள்ளிவிவரங்கள் தெரிவிக்கின்றன. கல்விக்காக வெளிநாடு செல்வது என்றாலே அமெரிக்கா, பிரிட்டன், கனடா மற்றும் ஆஸ்திரேலியா ஆகிய நான்கு பாரம்பரிய நாடுகளே முன்னணியில் இருந்து வந்தன. ஆனால், தற்போது இந்த நாடுகளின் ஆதிக்கம் மெல்ல குறையத் தொடங்கியுள்ளது.
இந்திய வெளியுறவு அமைச்சகத்தின் தரவுகளின்படி, 2025 ஜனவரி 1 நிலவரப்படி, சுமார் 18.8 லட்சம் இந்திய மாணவர்கள் 153 நாடுகளில் பள்ளி மற்றும் பல்கலைக்கழக கல்வியை பயின்று வருகின்றனர். சமீபத்திய ஆய்வுகள் இந்திய மாணவர்களிடையே ஒரு தெளிவான மாற்றத்தை வெளிப்படுத்துகின்றன. கௌரவத்திற்காக புகழ்பெற்ற பல்கலைக்கழகங்களை தேடி சென்ற நிலை மாறி, தற்போது கல்விக்கான செலவு மற்றும் படிப்பு முடிந்த பின் கிடைக்கும் உறுதியான வேலைவாய்ப்பு ஆகியவற்றை அடிப்படையாக கொண்ட மதிப்புமிக்க இடங்களை மாணவர்கள் அதிகம் தேர்வு செய்கின்றனர்.
இந்த மாற்றத்தில் மிகப்பெரிய வெற்றியை பெற்றுள்ள நாடு ஜெர்மனி ஆகும். 2024-25 ஆம் ஆண்டில் ஜெர்மனியில் கல்வி பயில விரும்பும் இந்திய மாணவர்களின் ஆர்வம் 377 சதவீதம் அதிகரித்துள்ளது. தற்போது சுமார் 59,000 இந்திய மாணவர்கள் அங்கு பயின்று வருகின்றனர். ஜெர்மனியில் உள்ள பொது பல்கலைக்கழகங்கள் பெரும்பாலும் கல்வி கட்டணம் வசூலிப்பதில்லை என்பது ஒரு முக்கிய காரணியாகும். மாணவர்கள் இரண்டு ஆண்டு கால படிப்பிற்கு நிர்வாக செலவுகளாக வெறும் 1,500 டாலர்கள் மட்டுமே செலுத்த வேண்டியுள்ளது. மேலும், படிப்பை முடித்த பிறகு தகுதியான வேலையை தேடிக்கொள்ள 18 மாதங்கள் வரை அங்கு தங்கியிருக்க அனுமதிக்கப்படுவது இந்திய மாணவர்களை பெரிதும் ஈர்த்துள்ளது. குறைவான செலவில் கல்வி மற்றும் உறுதியான எதிர்காலம் ஆகிய இரண்டும் ஜெர்மனியை முதன்மைத் தேர்வாக மாற்றியுள்ளன.
மற்றொரு ஆச்சரியமான மாற்றமாக நியூசிலாந்து நாடு உருவெடுத்துள்ளது. 2024-25 காலகட்டத்தில் நியூசிலாந்தை நோக்கி செல்லும் இந்திய மாணவர்களின் ஆர்வம் 2,900 சதவீதம் என்ற அதிரடியான வளர்ச்சியை பெற்றுள்ளது. அமெரிக்கா அல்லது பிரிட்டன் போன்ற நாடுகளின் செலவு மிகுந்த மற்றும் சிக்கலான கல்வி முறைகளுக்கு மாற்றாக நியூசிலாந்து பார்க்கப்படுகிறது. குறிப்பாக, அந்த நாட்டின் எளிமையான விசா நடைமுறைகள், மாணவர்களின் நேர்மறையான அனுபவங்கள் மற்றும் படிப்பு செலவு மற்றும் வேலைவாய்ப்புகள் குறித்த தெளிவான தகவல்கள் மாணவர்களை அந்த தீவு நாட்டை நோக்கி திருப்பியுள்ளன. மாணவர்கள் கௌரவத்தை விட தங்களது திட்டமிடலில் ஒரு நிச்சயத்தன்மையை எதிர்பார்ப்பதையே இந்த வளர்ச்சி காட்டுகிறது.
ஐக்கிய அரபு அமீரகம் சர்வதேச கல்வியில் ஒரு வலிமையான போட்டியாளராக வளர்ந்து வருவது மற்றுமொரு வியக்கத்தக்க மாற்றமாகும். 2024-25 இல் அமீரகத்தில் படிக்க விரும்பும் இந்திய மாணவர்களின் எண்ணிக்கை 5,400 சதவீதம் என்ற அசுர வளர்ச்சியை எட்டியுள்ளது. குறிப்பாக துபாயின் சர்வதேச உயர்கல்வி மாணவர் சேர்க்கையில் 42 சதவீதம் பேர் இந்தியர்களாகவே உள்ளனர். வணிகம், தகவல் தொழில்நுட்பம் மற்றும் பொறியியல் போன்ற வேலைவாய்ப்புடன் நேரடி தொடர்புடைய படிப்புகளில் மாணவர்கள் அதிக ஆர்வம் காட்டுகின்றனர். புவியியல் ரீதியாக இந்தியாவுக்கு அருகில் இருப்பதும், வளர்ந்து வரும் பொருளாதார சூழலும் ஐக்கிய அரபு அமீரகத்தை இந்திய மாணவர்களின் விருப்பமான இடமாக மாற்றியுள்ளது.
பாரம்பரியமாக இந்திய மாணவர்கள் விரும்பும் அமெரிக்கா, பிரிட்டன், கனடா மற்றும் ஆஸ்திரேலியா ஆகிய நாடுகளில் நிலவும் தற்போதைய சூழலே இந்த மாற்றங்களுக்கு காரணமாக கருதப்படுகிறது. இந்த நாடுகளில் அதிகரித்து வரும் கல்வி செலவுகள், கடுமையான விசா விதிகள் மற்றும் படிப்புக்கு பிந்தைய பணி உரிமைகளில் நிலவும் சிக்கல்கள் மாணவர்களை மறுபரிசீலனை செய்ய தூண்டியுள்ளன. பிரிட்டனில் மாணவர்களின் குடும்ப உறுப்பினர்களை அழைத்து வருவதற்கான கட்டுப்பாடுகள் குடும்ப முடிவுகளை பாதித்துள்ளன. கனடாவில் மாணவர் சேர்க்கைக்கான உச்ச வரம்புகள் மற்றும் கடுமையான தணிக்கை முறைகள் நடைமுறை சிக்கல்களை உருவாக்கியுள்ளன. அமெரிக்காவில் டிரம்ப் நிர்வாகத்தின் கீழ் விசா நேர்காணல்கள் மற்றும் மாணவர்களின் நீண்டகால நோக்கம் குறித்த ஆய்வுகள் தீவிரப்படுத்தப்பட்டுள்ளன. ஆஸ்திரேலியா தனது விசா கட்டணத்தை உயர்த்தியதோடு, தகுதியான மாணவர்களை கண்டறியும் சோதனைகளையும் கடினமாக்கியுள்ளது.
இத்தகைய சவால்கள் இந்திய மாணவர்களை உலகளாவிய கல்வியை கைவிட செய்யவில்லை, மாறாக அவர்கள் செல்லும் இடங்களை பன்முகப்படுத்தியுள்ளது. இன்றைய கால சூழலில் ஒரு பல்கலைக்கழகத்தின் புகழை விட, அங்கு செலவிடப்படும் பணத்திற்கான மதிப்பு, எளிமையான விசா விதிகள் மற்றும் படிப்பு முடிந்த பிறகு கிடைக்கும் வேலைவாய்ப்புகளின் உறுதித்தன்மை ஆகியவற்றுக்கே மாணவர்கள் முன்னுரிமை அளிக்கின்றனர். இதனாலேயே பாரம்பரிய வல்லரசு நாடுகளை தாண்டி ஜெர்மனி, நியூசிலாந்து மற்றும் அமீரகம் போன்ற நாடுகள் இந்திய மாணவர்களின் புதிய கல்வி சொர்க்கங்களாக மாறி வருகின்றன. இந்திய மாணவர்கள் தற்போது உலகளாவிய கல்வி சந்தையில் ஒரு புத்திசாலித்தனமான நுகர்வோராக மாறி, தங்களது எதிர்காலத்தை மிகவும் பாதுகாப்பான மற்றும் உறுதியான தளங்களில் கட்டமைக்கத் தொடங்கியுள்ளனர்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
