அமெரிக்க அதிபர் டொனால்ட் டிரம்ப்பின் பேச்சுக்கள் எப்போதும் ஒருவித குழப்பத்தையும், பலதரப்பட்ட கருத்துக்களையும் வெளிப்படுத்துவது வழக்கம். குறிப்பாக இந்தியா, பாகிஸ்தான் குறித்த அவரது சமீபத்திய கருத்துக்கள் மில்லியன் டாலர் கேள்வியை எழுப்பியுள்ளது: டொனால்ட் டிரம்ப் இந்தியாவிடம் இருந்து எதிர்பார்ப்பது என்ன?
அவருக்கு வர்த்தக ஒப்பந்தம் வேண்டுமா? நோபல் சமாதான பரிசுக்கான பரிந்துரை வேண்டுமா? அல்லது ஒரு அரசமுறை பயணம் வேண்டுமா? அவரது உண்மையான நோக்கம் என்னவென்று யாருக்கும் தெளிவாகத் தெரியவில்லை. ஏன் அவருக்கே கூட தெரியவில்லை.
சமீபத்தில் தென் கொரியாவில் ஒரு குழு சி.இ.ஓ-க்களுடன் பேசிய டிரம்ப், வழக்கம்போல் மற்ற விவகாரங்களில் விலகி, இந்தியா – பாகிஸ்தான் மோதல் குறித்து பேச தொடங்கினார். அவர் பேசியதில் இருந்த முரண்பாடுகளை கவனித்து சர்வதேச அரசியல் விமர்சகர்கள் எள்ளி நகையாடுகின்றனர்.
“பிரதமர் மோடி மீது எனக்கு மிகுந்த மரியாதையும் அன்பும் உண்டு. எங்களுக்கு இடையே ஒரு சிறந்த உறவு உள்ளது. அதேபோல, பாகிஸ்தான் பிரதமரும் ஒரு சிறந்த மனிதர். அவர் ஒரு சிறந்த போர் வீரர். இது ஒரு பெரிய விஷயம். இவை இரண்டும் அணு ஆயுத நாடுகள். அவர்கள் மோதிக்கொண்டிருந்தார்கள். நான் பிரதமர் மோடியை அழைத்து, ‘உங்களுடன் வர்த்தக ஒப்பந்தம் செய்ய முடியாது’ என்று சொன்னேன். அதற்கு அவர், ‘இல்லை, இல்லை, நாங்கள் நிச்சயம் வர்த்தக ஒப்பந்தம் செய்தாக வேண்டும்’ என்றார். நான், ‘இல்லை, நீங்கள் பாகிஸ்தானுடன் போர் தொடங்குகிறீர்கள், நாங்கள் அதை செய்யப் போவதில்லை’ என்றேன்.
பிறகு பாகிஸ்தானை அழைத்து, ‘நீங்கள் இந்தியாவுடன் சண்டையிடுவதால் நாங்கள் உங்களுடன் வர்த்தகம் செய்யப் போவதில்லை’ என்றேன். அவர்கள் இருவரும், ‘இல்லை, இல்லை, நீங்கள் எங்களைச் சண்டையிட அனுமதிக்க வேண்டும்’ என்றார்கள். மோடி ஒரு நல்ல தோற்றம் கொண்ட மனிதர். ஆனால், அவர் ‘கொலையாளி’ போலவும், ‘கொடியவன்’ போலவும் இருக்கிறார். அவர், ‘இல்லை, நாங்கள் சண்டையிடுவோம்’ என்று சொன்னார். ‘ஓஹோ, இவர் தான் எனக்குத் தெரிந்த அதே ஆளா’ என்று நான் நினைத்தேன். ஆனாலும், கொஞ்ச நேரம் கழித்து அவர்கள் அழைத்து, ‘நாங்கள் புரிந்துகொண்டோம்’ என்று சொல்லி, சண்டையை நிறுத்திவிட்டார்கள். இது ஆச்சரியமாக இல்லையா?”
அவர் பிரதமர் மோடி மீது பெரும் அன்பு வைத்திருக்கிறார், அதே சமயம் பாகிஸ்தான் பிரதமரும் ஒரு சிறந்த மனிதர். மோடி ஒரு வலிமையான தலைவர், ஆனால் அவரை ‘கொலையாளி’ என்று வர்ணிக்கிறார். பிரதமர் மோடி, டிரம்ப் சொன்னவுடன் பாகிஸ்தானுடனான சண்டையை நிறுத்த ஒப்புக்கொண்டதாகவும் கூறுகிறார். ஆனால், இந்த கூற்றுகளில் பல உண்மையில்லை என்பதை இந்தியா தெளிவாக மறுத்துள்ளது. இந்தியா – பாகிஸ்தான் மோதலின் போது பிரதமர் மோடிக்கும் டிரம்ப்பிற்கும் இடையே எந்த தொலைபேசி உரையாடலும் நடைபெறவில்லை என்று இந்தியா திட்டவட்டமாக கூறியது. வர்த்தக ஒப்பந்தம் குறித்தும் அப்போது பேசப்படவில்லை.
உண்மையில், அப்போதைய அமெரிக்க துணை அதிபர் மட்டுமே பிரதமர் நரேந்திர மோடியுடன் பேசினார். அந்த அழைப்பில், பாகிஸ்தான் நிலைமையை மேலும் மோசமாக்கும் என்று அவர் எச்சரித்தார், அதற்கு பிரதமர் மோடி இந்தியா தயாராக இருப்பதாக பதிலளித்தார். டிரம்ப் எங்கிருந்து தகவல்களைப் பெறுகிறார் என்பது முக்கியமல்ல. அவரது தகவல்களுக்கும் உண்மைக்கும் எப்போதுமே சம்பந்தமே இருக்காது. ஆனால், அவரது நோக்கம் என்ன? என்பதே இங்கே மிக முக்கியம்.
டொனால்ட் டிரம்ப் இந்தியாவை தனது கண்ணோட்டத்திற்கு கீழ்ப்படியும் ஒரு கூட்டாளியாக இருக்க வேண்டும் என்று எதிர்பார்க்கிறார் என்று அரசியல் நோக்கர்கள் கருதுகின்றனர். இதைச் சில உதாரணங்கள் மூலம் விளக்கலாம்:
1. வர்த்தகப் போர் மற்றும் சமரசங்கள்:
டிரம்ப் விதித்த பரஸ்பர வரிகள் பாகுபாடற்றவை. நட்பு நாடு, கூட்டாளி, போட்டியாளர் என்று யாருக்கும் விலக்கு இல்லை. பின்னர் நடந்த பேச்சுவார்த்தைகளில், அமெரிக்காவின் நட்பு நாடுகள் டிரம்ப்பை சமாதானப்படுத்த கடுமையான சமரசங்களைச் செய்தன:
ஜப்பான்: அமெரிக்க அரிசியை வாங்க ஒப்புக்கொண்டது.
ஐரோப்பா: $750 பில்லியன் மதிப்புள்ள அமெரிக்க எரிசக்தியை வாங்க ஒப்புக்கொண்டது.
வியட்நாம்: அமெரிக்க வரிகளைக் குறைத்தது.
இந்த நாடுகள் டிரம்ப்பிற்கு சலுகைகள் அளித்தன, டிரம்ப் அவர்களுக்கு ஒப்பந்தம் கொடுத்தார். ஆனால், இந்தியா இந்த விளையாட்டில் சேர மறுத்துவிட்டது. அதனால்தான் இந்தியாவுடனான வர்த்தக ஒப்பந்தத்தில் தாமதம் ஏற்பட்டது.
2. பாகிஸ்தான் போர்நிறுத்தத்திற்கான உரிமை கோரல்:
இந்தியா – பாகிஸ்தான் சண்டையை முடிவுக்கு கொண்டு வந்த பெருமை தனக்கே சேரும் என்று டிரம்ப், மீண்டும் மீண்டும் கூறி வருகிறார். பாகிஸ்தானும் இந்த கூற்றை ஆமோதித்ததுடன், டிரம்ப்பை நோபல் பரிசுக்கு பரிந்துரைத்தது.
இந்தியா இதையும் ஏற்க மறுத்துவிட்டது. சண்டையை முடிவுக்கு கொண்டு வருவதில் அமெரிக்காவிற்கு எந்த பங்கும் இல்லை என்று இந்தியா நிராகரித்தது. காசாவில் அல்லது தாய்லாந்து-கம்போடியா இடையே போர்நிறுத்தம் ஏற்பட்டபோது, சம்பந்தப்பட்ட நாடுகள் டிரம்ப்பின் மத்தியஸ்தத்தை புகழ்ந்தன. அதே பாராட்டை அவர் இந்தியாவிடமும் எதிர்பார்க்கிறார், ஆனால் அது கிடைக்கவில்லை.
டிரம்ப், தனது கூட்டாளிகள் தன்னுடனோ அல்லது தனக்கு எதிரேயோ என்ற நிலைப்பாட்டில் இருக்க வேண்டும் என்று விரும்புகிறார். நடுநிலைமைக்கு அங்கே இடமில்லை. ரஷ்ய எண்ணெயை வாங்கக் கூடாது என்றால், இந்தியா அதற்கு கட்டுப்பட வேண்டும். சீனாவிலிருந்து வணிக தொடர்புகளை துண்டிக்க வேண்டும் என்றால், இந்தியா அதையும் செய்ய வேண்டும். ஆனால், இந்தியா எப்போதும் தனது சொந்த பல்வகை கொள்கையை பின்பற்றுகிறது. அதாவது, அனைத்து முக்கிய வல்லரசுகளுடன் நல்லுறவை பேணுவது. டிரம்ப் இதை ஏற்றுக்கொள்வதில்லை. எனவே தான் அவர் இந்தியாவை நெருக்குவதற்கு முயல்கிறார்.
இந்தியா எப்போதுமே பல வழிகளை ஆராய்ந்து வருகிறது. இந்தியா ஒருபோதும் அமெரிக்க முகாமின் ஒரு பகுதியாக இருந்ததில்லை. இந்தியாவின் அரசியல் தலைமைகளும், மக்களும் தங்கள் சுதந்திரத்தை பெரிதும் மதிக்கிறார்கள். பல நூற்றாண்டு காலனித்துவமும் இன்னல்களும் இந்த பிடிவாதமான கொள்கையை வடிவமைத்துள்ளன.
டிரம்ப் இந்த அடிப்படை உண்மைகளை புரிந்துகொள்ள வேண்டும். இல்லையெனில், அவரது அழுத்தம் கொடுக்கும் முயற்சி இந்தியாவில் எடுபடாது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
