இந்திய ரயில்வே வரலாற்றில் ஒரு புதிய மைல்கல்லாக, நாட்டின் முதல் ‘வந்தே பாரத் ஸ்லீப்பர்’ ரயில் சேவையை மத்திய ரயில்வே அமைச்சர் திரு. அஸ்வினி வைஷ்ணவ் இன்று அறிவித்துள்ளார்.
2026-ஆம் ஆண்டின் புத்தாண்டு பரிசாக, அஸ்ஸாம் மாநிலத்தின் கௌஹாத்தி மற்றும் மேற்கு வங்கத்தின் ஹவுரா ஆகிய நகரங்களுக்கு இடையே இந்த அதிநவீன ரயில் இயக்கப்படவுள்ளது. இந்த ரயிலுக்கான அனைத்து தொழில்நுட்ப சோதனைகள் மற்றும் சான்றிதழ் நடைமுறைகள் வெற்றிகரமாக முடிவடைந்துள்ள நிலையில், விரைவில் பிரதமர் நரேந்திர மோடி இதனை அதிகாரப்பூர்வமாக தொடங்கி வைக்கவுள்ளார்.
இந்த வந்தே பாரத் ஸ்லீப்பர் ரயில், அஸ்ஸாமின் காம்ரூப் மெட்ரோபாலிட்டன் மற்றும் போங்காய்கான் ஆகிய மாவட்டங்களையும், மேற்கு வங்கத்தின் கூச் பெஹார், ஜல்பைகுரி, மால்டா, முர்ஷிதாபாத் உள்ளிட்ட பல மாவட்டங்களையும் இணைக்கவுள்ளது. மொத்தம் 16 பெட்டிகளை கொண்ட இந்த ரயிலில், 11 மூன்று அடுக்கு ஏசி பெட்டிகள், 4 இரண்டு அடுக்கு ஏசி பெட்டிகள் மற்றும் ஒரு முதல் வகுப்பு ஏசி பெட்டி என மொத்தம் 823 பயணிகள் பயணிக்கும் வகையில் வசதிகள் செய்யப்பட்டுள்ளன. மாலை நேரத்தில் புறப்பட்டு, மறுநாள் அதிகாலையில் இலக்கை அடையும் வகையில் இதன் கால அட்டவணை திட்டமிடப்பட்டுள்ளது.
இந்த ரயிலின் மிக முக்கியமான சிறப்பம்சம் அதன் மேம்படுத்தப்பட்ட தொழில்நுட்பமாகும். மணிக்கு 180 கி.மீ வேகத்தில் செல்லக்கூடிய வகையில் வடிவமைக்கப்பட்டுள்ள இந்த ரயிலில், அதிர்வுகளை குறைக்கும் நவீன சஸ்பென்ஷன் கொண்ட புதிய வகை Bogie என்ற அம்சம் பயன்படுத்தப்பட்டுள்ளன. மேலும், பயணிகளின் பாதுகாப்பை உறுதி செய்ய KAVACH எனும் மோதல் தவிர்ப்பு தொழில்நுட்பம், தீ விபத்து கண்டறியும் ஏரோசல் கருவிகள் மற்றும் அனைத்து பெட்டிகளிலும் சிசிடிவி கேமராக்கள் பொருத்தப்பட்டுள்ளன.
பயணிகளின் வசதிக்காக பிரத்யேகமாக வடிவமைக்கப்பட்ட படுக்கைகள், தானியங்கி கதவுகள் மற்றும் மாற்றுத்திறனாளிகளுக்கான சிறப்பு வசதிகள் இதில் இடம் பெற்றுள்ளன. மேலும், சுகாதாரத்தை பராமரிக்க கிருமிநாசினி தொழில்நுட்பம் மற்றும் நவீன கழிவறை வசதிகள் செய்யப்பட்டுள்ளன. ரயிலின் உட்புறம் மற்றும் ஏணிகள் அனைத்தும் நவீன வடிவமைப்பில் உருவாக்கப்பட்டுள்ளதால், இரவு நேர பயணம் மிகவும் சுகமானதாக அமையும்.
உணவு முறையிலும் இந்த ரயில் ஒரு கலாச்சார பாலமாகத் திகழும். கௌஹாத்தியில் இருந்து புறப்படும் ரயிலில் அஸ்ஸாமிய பாரம்பரிய உணவுகளும், கொல்கத்தாவில் இருந்து புறப்படும் ரயிலில் வங்காளத்தின் சுவையான பாரம்பரிய உணவுகளும் வழங்கப்படவுள்ளன. இது பயணிகளுக்கு ஒரு சுவையான மற்றும் பண்பாடு சார்ந்த பயண அனுபவத்தை வழங்கும். அவசர காலங்களில் பயணிகள் லோகோ பைலட்டுடன் நேரடியாக பேச ‘எமர்ஜென்சி டாக்-பேக்’ வசதியும் இதில் இணைக்கப்பட்டுள்ளது.
ஒட்டுமொத்தமாக, வந்தே பாரத் ஸ்லீப்பர் ரயிலின் அறிமுகம் இந்திய ரயில்வேயில் ஒரு புதிய புரட்சியை தொடங்கியுள்ளது. வேகம், சொகுசு மற்றும் பாதுகாப்பு ஆகிய மூன்றையும் ஒருங்கிணைத்து நீண்ட தூர இரவு நேர பயணங்களை இனிமையாக்க இந்திய அரசு எடுத்துள்ள இந்த முயற்சி, வடகிழக்கு மாநிலங்களுக்கும் மேற்கு வங்கத்திற்கும் இடையிலான பிணைப்பை மேலும் வலுப்படுத்தும். 2026-ஆம் ஆண்டு ரயில்வே துறையில் பல சீர்திருத்தங்கள் நிகழும் ஆண்டாக இருக்கும் என்று அமைச்சர் அஸ்வினி வைஷ்ணவ் உறுதி அளித்துள்ளார்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
