அமெரிக்க அதிபர் டொனால்ட் டிரம்ப், இந்தியாவின் மீது வர்த்தக வரிகள் மற்றும் பல்வேறு அழுத்தங்களை தொடர்ந்து கொடுத்து வருகிறார். ஆனால், இதற்கு இந்தியா அசைந்து கொடுக்காமல் உறுதியுடன் நிற்பது உலக நாடுகளை வியப்பில் ஆழ்த்தியுள்ளது. “பழைய இந்தியா அல்ல இது; மோடியின் இந்தியாவை அசைக்க முடியாது” என சர்வதேச பொருளாதார வல்லுனர்கள் கருத்து தெரிவித்து வருவது, அமெரிக்காவை அதிர்ச்சி அடைய வைத்துள்ளது. தனது வழக்கமான அழுத்தம் கொடுக்கும் தந்திரங்கள் இந்தியாவிடம் எடுபடாமல் போனதால், “இந்தியாவை பணிய வைக்க என்ன செய்யலாம்?” எனத் தெரியாமல் டிரம்ப் மூளையை கசக்கி கொண்டிருப்பதாக அரசியல் வட்டாரங்கள் தெரிவிக்கின்றன.
ரஷ்யா, டாலர் வர்த்தகத்தில் பின்வாங்காத இந்தியா
அமெரிக்கா விதித்த பல்வேறு பொருளாதாரத் தடைகளையும் மீறி, இந்தியா ரஷ்யாவிடம் இருந்து தொடர்ந்து கச்சா எண்ணெயை வாங்கி வருகிறது. இதற்கு காரணம் ரஷ்யா இந்தியாவுக்கு நீண்டகால கூட்டாளியாக இருப்பதுதான். திடீரென வர்த்தகம் செய்வதை நிறுத்தினால், அது ரஷ்ய-இந்தியாவின் நட்பை பாதிக்கும் என்பதால், அமெரிக்காவின் வற்புறுத்தலுக்கு இந்தியா அடிபணியவில்லை.
அதேபோல் டாலர் அல்லாத வர்த்தகம் செய்ய வேண்டும் என பிரிக்ஸ் அமைப்பில் உள்ள நாடுகள் வலியுறுத்தி வருகின்றன. இந்த அமைப்பிலிருந்து வெளியேற வேண்டும் என அமெரிக்கா இந்தியாவுக்கு அழுத்தம் கொடுத்தாலும், இந்தியா அதற்கு மறுத்துவிட்டது. டாலர் வர்த்தகத்திலிருந்து விலகுவது, அமெரிக்காவின் பொருளாதாரக் கொள்கைகளுக்குக் கட்டுப்படாமல், இந்தியா தனது வர்த்தக சுதந்திரத்தை உறுதிப்படுத்திக்கொள்ள உதவும் ஒரு முக்கிய நகர்வாக கருதப்படுகிறது.
வர்த்தகப் போரில் மிரட்டலுக்கு மசியாத மோடி
வேளாண் பொருட்கள் மற்றும் பால்பொருட்கள் வர்த்தகத்தில் அமெரிக்காவுக்கு சாதகமாக முடிவெடுக்க இந்தியா மறுத்துவிட்டது. இந்தியாவின் வேளாண் துறை மிகவும் பெரியது. இதில் அமெரிக்காவின் ஆதிக்கம் வந்தால், கோடிக்கணக்கான இந்திய விவசாயிகள் பாதிக்கப்படுவார்கள். அதனால், இந்திய விவசாயிகளின் நலன் கருதி, அமெரிக்காவின் கோரிக்கையை பிரதமர் மோடி நிராகரித்துவிட்டார்.
இந்தியாவுக்கு 50% வரி விதித்தபோதும், இந்தியப் பங்குச்சந்தையில் எந்த பெரிய சரிவும் ஏற்படவில்லை. இது இந்திய பொருளாதாரத்தின் பலத்தை காட்டுகிறது. “100% கூடுதல் வரி விதிப்பேன்” என்று டிரம்ப் எச்சரித்தபோதும், பிரதமர் மோடி அசைந்து கொடுக்கவில்லை. அமெரிக்காவின் வர்த்தக மிரட்டல்களால் இந்தியாவிற்கு வர்த்தக ரீதியாக பாதிப்பு இருந்தாலும், பொருளாதார ரீதியாக பாதிப்பு இருக்காது என்பதை அமெரிக்கா தற்போது உணர்ந்துகொண்டுள்ளது. மேலும், அமெரிக்காவின் வர்த்தக வரிகள் அந்நாட்டின் நுகர்வோர்களையே அதிகளவில் பாதிக்கும் என்பதால், டிரம்ப் தனது முடிவுகளில் பின்வாங்குவார் என எதிர்பார்க்கப்படுகிறது.
மாறிவிட்ட சர்வதேச அரசியல் களம்
“இது பழைய இந்தியா அல்ல” என்று சர்வதேச பொருளாதார வல்லுனர்கள் கூறுவது, வெறும் வார்த்தை அல்ல. கடந்த காலங்களில் சில உலக நாடுகளின் அழுத்தங்களுக்கு இந்தியா அடிபணிந்திருக்கலாம். ஆனால், இன்று நிலைமை தலைகீழாக மாறிவிட்டது. இந்தியா இப்போது தனது சொந்த நலன்களை முன்னிறுத்தி, எந்தவொரு வல்லரசு நாட்டுக்கும் அஞ்சாமல் முடிவெடுக்கும் ஒரு நாடாக உருவெடுத்துள்ளது. உலக அரசியலில் இந்தியாவின் குரல் இப்போது தெளிவாகவும், வலுவாகவும் ஒலிக்க தொடங்கியுள்ளது. இது போன்ற தைரியமான அணுகுமுறைதான் அமெரிக்க அதிபர் டிரம்ப்பை குழப்பத்தில் ஆழ்த்தியுள்ளது. இந்த புதிய இந்தியா, தனது பொருளாதார மற்றும் அரசியல் பலத்தை பயன்படுத்தி, உலக அரங்கில் தனக்கென ஒரு தனி இடத்தை உருவாக்கி வருகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
