ஆந்திர பிரதேச முதல்வர் சந்திரபாபு நாயுடு, குவாண்டம் அறிவியல் துறையில் நோபல் பரிசு பெறும் மாநிலத்தை சேர்ந்த முதல் அறிஞருக்கு 100 கோடி ரூபாய் பரிசு வழங்கப்படும் என்ற அதிரடி அறிவிப்பை வெளியிட்டுள்ளார். டிசம்பர் 23 அன்று நடைபெற்ற உலகின் மிகப்பெரிய குவாண்டம் திறன் மேம்பாட்டுத் திட்டத்தின் தொடக்க விழாவில் பேசிய அவர், இந்த அறிவிப்பை ஒரு வெறும் பரிசாக மட்டும் பார்க்காமல், மாநிலத்தின் அறிவுத்திறனை உலக அரங்கில் நிலைநிறுத்துவதற்கான ஒரு சவாலாக முன்வைத்தார்.
இளைஞர்கள், தகவல் தொழில்நுட்ப வல்லுநர்கள் மற்றும் தொழில்முனைவோர் அனைவரும் இந்த வாய்ப்பை பயன்படுத்தி குவாண்டம் தொழில்நுட்பத்தில் புதிய மைல்கற்களை எட்ட வேண்டும் என்பதே அவரது முதன்மை நோக்கமாக உள்ளது.
குவாண்டம் தொழில்நுட்பம் என்பது கணினி உலகின் அடுத்த கட்ட புரட்சியாக கருதப்படுகிறது. வழக்கமான கணினிகள் பைனரி பிட்களை அடிப்படையாக கொண்டு செயல்படும் வேளையில், குவாண்டம் கணினிகள் ஒரே நேரத்தில் பல நிலைகளில் இருக்கக்கூடிய ‘குவாண்டம் பிட்களை’ பயன்படுத்துகின்றன. இதன் மூலம், ஒரு சாதாரண சூப்பர் கம்ப்யூட்டர் பல ஆயிரம் ஆண்டுகள் எடுத்துக்கொள்ளும் சிக்கலான கணக்குகளை, ஒரு குவாண்டம் கணினியால் சில நிமிடங்களில் தீர்க்க முடியும். இந்த அசுர வேகமும் துல்லியமுமே சந்திரபாபு நாயுடுவை இந்த தொழில்நுட்பத்தின் மீது கவனம் செலுத்தத் தூண்டியுள்ளது.
அமராவதியை இந்தியாவின் ‘குவாண்டம் மையமாக மாற்றுவதே நாயுடுவின் லட்சிய கனவாகும். அமெரிக்காவின் சிலிக்கான் வேலி எவ்வாறு டிஜிட்டல் யுகத்தை வடிவமைத்ததோ, அதேபோல் அமராவதி குவாண்டம் யுகத்தின் மையமாக இருக்க வேண்டும் என்று அவர் விரும்புகிறார். இதற்காக அடுத்த இரண்டு ஆண்டுகளுக்குள் ஆந்திராவிலேயே குவாண்டம் கணினிகளை தயாரிக்கவும், குவாண்டம் மெக்கானிக்ஸ் மற்றும் அல்காரிதங்களில் 10 லட்சம் நிபுணர்களுக்கு பயிற்சி அளிக்கவும் மாநில அரசு திட்டமிட்டுள்ளது. ஏற்கனவே விப்ரோ, ஐபிஎம் போன்ற உலகளாவிய நிறுவனங்களுடன் இணைந்து 50,000-க்கும் மேற்பட்ட மாணவர்கள் இதற்காகப் பதிவு செய்துள்ளனர்.
இந்திய அரசு ஏற்கனவே 6,000 கோடி ரூபாய் மதிப்பீட்டில் ‘தேசிய குவாண்டம் திட்டத்தை’ செயல்படுத்தி வரும் நிலையில், ஆந்திராவின் இந்த முன்னெடுப்பு அதற்கு பெரும் வலுசேர்க்கிறது. அமெரிக்கா மற்றும் சீனா போன்ற நாடுகள் குவாண்டம் துறையில் பில்லியன் கணக்கான டாலர்களை முதலீடு செய்துள்ள நிலையில், இந்தியாவின் முதலீடு தற்போது குறைவாகவே உள்ளது. இருப்பினும், இந்த இடைவெளியை ஒரு வாய்ப்பாக கருதும் சந்திரபாபு நாயுடு, ஆரம்ப கட்டத்திலேயே இத்துறையில் நுழைவதன் மூலம் ஆந்திராவை ஒரு உலகளாவிய ஏற்றுமதி மையமாக மாற்ற முடியும் என்று நம்புகிறார்.
குவாண்டம் தொழில்நுட்பத்தின் பயன்பாடுகள் மிக விரிவானவை. தனிப்பயனாக்கப்பட்ட மருத்துவம், நிலையான விவசாய முறைகள், நிதிநிலை முன்னறிவிப்புகள் மற்றும் பசுமை எரிசக்தி தீர்வுகள் எனப் பல துறைகளில் இது மிகப்பெரிய மாற்றத்தை ஏற்படுத்தும். குறிப்பாக, அமராவதியில் உருவாக்கப்படும் குவாண்டம் கணினிகளை உலக நாடுகளுக்கு ஏற்றுமதி செய்வதன் மூலம் மாநிலத்தின் பொருளாதாரத்தை அடுத்த நிலைக்கு எடுத்து செல்ல முடியும். ஆந்திர பிரதேசம் ஏற்கனவே இந்தியாவில் உற்பத்தியாகும் ஐந்து மொபைல் போன்களில் ஒன்றை உற்பத்தி செய்யும் மாநிலமாக திகழ்வது, இந்த தொழில்நுட்பப் புரட்சியை முன்னெடுப்பதற்கான நம்பிக்கையை அளிக்கிறது.
100 கோடி ரூபாய் நோபல் பரிசு ஊக்கத்தொகை என்பது ஒரு குறியீடாக இருந்தாலும், அது ஆராய்ச்சியில் சிறந்த வல்லுநர்களை ஈர்க்கும் ஒரு உத்தியாகும். ஆந்திராவின் இந்த முயற்சி வெற்றி பெறுவது என்பது தொடர்ச்சியான முதலீடு, உலகளாவிய ஒத்துழைப்பு மற்றும் வலுவான உள்கட்டமைப்பு மேம்பாடு ஆகியவற்றை பொறுத்தே அமையும். தகவல் தொழில்நுட்ப துறையில் சந்திரபாபு நாயுடு ஏற்கனவே படைத்துள்ள வரலாற்று வெற்றிகளை பார்க்கும்போது, ஆந்திரா குவாண்டம் அறிவியலின் புதிய தலைமையகமாக உருவெடுக்கும் நாள் வெகுதொலைவில் இல்லை என்பது தெளிவாகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
