மலேசியாவின் கோலாலம்பூர் மண்ணில் நடிகர் விஜய் அவர்களுக்கு கிடைத்துள்ள வரவேற்பு என்பது வெறும் திரைத்துறை சார்ந்த ஒன்றாக மட்டும் பார்க்கப்படாமல், ஒரு மாபெரும் மக்கள் எழுச்சியாகவே உருவெடுத்துள்ளது. 2k கிட்ஸ் முதல் 80களின் தலைமுறை வரை வயது வித்தியாசம் இன்றி, மலேசிய ஏர்போர்ட்டில் தொடங்கி ஹோட்டல் வாசல் வரை மக்கள் வெள்ளம் அலைமோதுவது, இது மலேசியாவா அல்லது தமிழ்நாடா என்ற ஐயத்தையே ஏற்படுத்துகிறது.
குறிப்பாக, விமான நிலையத்தில் பணியாற்றும் தமிழர்கள் முதல் அங்கு தலைமுறை தலைமுறையாக வசிக்கும் முதியவர்கள் வரை ‘விஜய் தம்பி’ என்று அழைத்து அவரிடம் காட்டும் அன்பு, ஒரு நடிகருக்கு கிடைக்கும் சாதாரண வரவேற்பு அல்ல. கடல் கடந்து வாழும் தமிழர்கள் தங்கள் வீட்டு பிள்ளையாக விஜய்யை கருதுவதும், அவரை ஒரு முறை பார்ப்பதற்காக காத்திருப்பதும் தமிழக அரசியல் களத்தில் அவர் பிடிக்கப்போகும் முக்கிய இடத்தை இப்போதே பறைசாற்றுகிறது.
இந்த விழாவை மலேசிய தமிழர்கள் ஒரு ‘தளபதி திருவிழா’வாகவே கொண்டாடி வருகின்றனர். ஏர்போர்ட் வரவேற்பில் ஒரு வயதான பாட்டி நீண்ட நேரம் காத்திருந்து விஜய்யுடன் புகைப்படம் எடுத்த நிகழ்வும், அதன் பின் அவர் காட்டிய நெகிழ்ச்சியான அன்பும் சமூக வலைதளங்களில் விமர்சனம் செய்பவர்களுக்கு பெரிய பதிலடியாக அமைந்துள்ளது. தமிழ்நாட்டில் இது போன்ற நிகழ்வுகள் நடந்தால் அது ‘செட் செய்யப்பட்டது’ என்று விமர்சிப்பவர்கள், மலேசியாவின் எதார்த்தமான அன்பை பார்த்து வியந்து நிற்கின்றனர்.
ஒரு தனி மனிதர் மீது இவ்வளவு பெரிய ஈர்ப்பு எதனால் ஏற்படுகிறது என்பதை ஆராய்ந்தால், அது ஒரு சூரிய கண்ணாடி வழியாக ஒளியை குவித்து தீயை உண்டாக்குவது போல, மக்களின் ஒட்டுமொத்த எதிர்பார்ப்பும் விஜய் என்ற ஒற்றை புள்ளியில் வந்து இணைவதையே காட்டுகிறது. கோலாலம்பூர் சாலைகளில் அவரது கார் அணிவகுத்து சென்ற விதம், அங்குள்ள மலாய் மற்றும் சீன மக்களையும் ‘யார் இந்த மாமனிதர்’ என்று வியந்து கேட்க வைத்துள்ளது.
மலேசிய அரசாங்கம் இந்த விழாவிற்கு பல கட்டுப்பாடுகளை விதித்திருந்தாலும், மக்களின் ஆர்வத்தை கட்டுப்படுத்த முடியவில்லை. அரசியல் பேசக்கூடாது, கட்சி கொடிகளை கொண்டு வரக்கூடாது என்ற நிபந்தனைகளுக்கு காரணம், இதற்கு முன்பு தமிழகத்தின் கரூரில் நடந்த கூட்ட நெரிசல் சம்பவமே ஆகும். இருப்பினும், விஜய் தங்கியிருக்கும் ஹோட்டல் முன்பு நள்ளிரவிலும் நூற்றுக்கணக்கானோர் காத்திருந்ததும், அதிகாலையில் அவர்களை விஜய் நேரில் சந்தித்து நலம் விசாரித்ததும் அவரது எளிமையை படம்பிடித்து காட்டுகிறது. வழக்கமாக தமிழ்நாட்டு ரசிகர்கள் மட்டும்தான் உணர்ச்சிவசப்படுவார்கள் என்று கூறப்படுவதுண்டு, ஆனால் மலேசிய மண்ணிலும் அதே போன்றதொரு வெறித்தனமான பற்றை ரசிகர்கள் வெளிப்படுத்துவது, விஜய்யின் செல்வாக்கு எல்லைகளைக் கடந்து நிற்கிறது என்பதை உறுதிப்படுத்துகிறது.
புக்கிட் ஜலீல் மைதானம், ஆசியாவிலேயே இரண்டாவது மிகப்பெரிய ஸ்டேடியமாக திகழ்கிறது. ஒரு லட்சம் பேர் அமரக்கூடிய அந்த மைதானம் இன்று ‘ஜே ஜே’ என நிரம்பி வழிகிறது. தைப்பூச திருவிழாவிற்கு பெயர் பெற்ற மலேசியாவில், இந்த ஆடியோ லான்ச் விழா ஒரு மாபெரும் பண்டிகை போலக் காட்சியளிக்கிறது. மதியம் முதலே மைதானத்தை சுற்றியுள்ள 5 கிலோமீட்டர் தூரத்திற்கு வாகன நெரிசல் ஏற்பட்டுள்ளது. டிராபிக் ஜாமில் சிக்கியவர்கள் தங்கள் வாகனங்களை அங்கேயே விட்டுவிட்டு மைதானத்தை நோக்கி நடந்தே செல்வது, அவர்கள் விஜய்யின் மீது கொண்டுள்ள தீராத தாகத்தை காட்டுகிறது. இதற்கு முன்பு மலேசியா-இந்தோனேசியா கால்பந்து போட்டியின் போது இருந்த கூட்டத்தை விட மூன்று மடங்கு அதிகக் கூட்டம் கூடியிருப்பதாக கூறப்படுவது, ஒரு தமிழ் சினிமா நடிகரின் உலகளாவிய மார்க்கெட் பலத்தை நிரூபிக்கிறது.
இந்த விழாவில் விஜய்யின் பெற்றோர் ஷோபா சந்திரசேகர் மற்றும் எஸ்.ஏ. சந்திரசேகர் ஆகியோர் கலந்து கொண்டுள்ளனர். இருப்பினும், சமூக வலைதளங்களில் விஜய்யின் மனைவி மற்றும் பிள்ளைகள் ஏன் வரவில்லை என்ற விமர்சனங்கள் ஒரு பக்கம் வைக்கப்படுகின்றன.
இறுதியாக, இது விஜய்யின் திரைப்பயணத்தின் கடைசி படத்தின் ஆடியோ லான்ச் என்பதால், ரசிகர்கள் இதனை ஒரு உணர்ச்சிகரமான விடைபெறுதலாகவும் கொண்டாடுகிறார்கள். வெளிநாட்டு விநியோகஸ்தர்கள் பல கோடி ரூபாய் அளவிற்கு அட்வான்ஸ் புக்கிங் மூலம் வருவாய் ஈட்டியிருப்பது மலைக்க வைக்கிறது. ஐரோப்பாவின் கடும் குளிரிலும் ரசிகர்கள் இரவு காட்சிகளை முன்பதிவு செய்திருப்பது விஜய்யின் அசைக்க முடியாத பிம்பத்தை காட்டுகிறது.
இந்த மேடையில் விஜய் நேரடியாக அரசியல் பேச மாட்டார் என்று எதிர்பார்க்கப்பட்டாலும், அவர் சொல்லப்போகும் ‘குட்டி ஸ்டோரி’யில் ஏதோ ஒரு அரசியல் ரகசியம் ஒளிந்திருக்கும் என்பதில் சந்தேகமில்லை. ஒட்டுமொத்த உலக தமிழர்களின் கவனமும் இப்போது புக்கிட் ஜலீல் மைதானத்தை நோக்கி திரும்பியுள்ளது, அவர் பேசப்போகும் ஒவ்வொரு வார்த்தையும் நாளை ஒரு புதிய விவாதத்தை உருவாக்கும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
