செல்வராகவன் தமிழ் சினிமாவில் பணியாற்றும் பிரபலமான இயக்குனர் மற்றும் நடிகர் ஆவார். இவரது தந்தை கஸ்தூரிராஜா தமிழ் சினிமாவில் பணியாற்றிய இயக்குனர் மற்றும் இவரது சகோதரர் தனுஷ் தமிழ் சினிமாவில் முன்னணி நடிகராகவும் இயக்குனராகவும் இருந்து வருகிறார்.
2002 ஆம் ஆண்டு துள்ளுவதோ இளமை என்ற திரைப்படத்தில் எழுத்தாளராக பணிபுரிந்தார் செல்வராகவன். அதற்கு அடுத்து 2003 ஆம் ஆண்டு காதல் கொண்டேன் என்ற திரைப்படத்தை தனது சகோதரர் தனுஷை நடிக்க வைத்து இயக்கி தமிழ் சினிமாவில் இயக்குனராக அறிமுகமானார் செல்வராகவன். அதை தொடர்ந்து 2004 ஆம் ஆண்டு 7ஜி ரெயின்போ காலனி என்ற திரைப்படத்தை எடுத்தார். இந்த திரைப்படம் நல்ல விமர்சனங்களை பெற்று அவருக்கு திருப்புமுனையாக அமைந்தது.
தொடர்ந்து புதுப்பேட்டை, யாரடி நீ மோகினி, ஆயிரத்தில் ஒருவன், மயக்கம் என்ன, இரண்டாம் உலகம், நெஞ்சம் மறப்பதில்லை போன்ற பல வெற்றி திரைப்படங்களை இயக்கி இருக்கிறார் செல்வராகவன். அது தவிர சமீபத்திய காலங்களில் இவரது நடிப்புக்கு மிகுந்த வரவேற்பு இருந்து வருவதால் நடிகராகவும் பல திரைப்படங்களில் நடித்து வருகிறார் செல்வராகவன். ராயன் திரைப்படத்தில் இவரின் நடிப்பு வெகுவாக பாராட்டப்பட்டது.
இந்நிலையில் தற்போது செல்வராகவன் வீடியோ ஒன்றை தனது சமூக வலைத்தள பக்கத்தில் பகிர்ந்து இருக்கிறார். அவர் அவ்வபோது ஏதாவது அட்வைஸ் கூறி வீடியோ பதிவிடுவதுண்டு. அதன்படியே இந்த வீடியோவில் நீங்கள் வாழ்க்கையில் முன்னேறி வரவேண்டும் ஏதாவது செய்ய வேண்டும் என்று நீங்கள் நினைத்திருந்தால் அதை வெளியே யாரிடமும் சொல்லாதீர்கள். தம்பட்டமே அடிக்கக்கூடாது. அமைதியாக இருந்து அமைதியாக நம் வேலையை செய்து முடிக்க வேண்டும். அதேபோல் யாரிடமும் உதவி கேட்காதீர்கள். நாம் யாரிடமும் உதவி கேட்டு அவர்கள் நமக்கு ஒரு ரூபாய் உதவி செய்தாலும் அதை ஆயிரம் கோடி செய்ததாக வாழ்நாள் முழுவதும் சொல்லிக் கொண்டே இருப்பார்கள். அதனால் இது மாதிரி விஷயத்தை தயவு செய்து செய்யாதீர்கள் என்று அந்த வீடியோவில் பேசியிருக்கிறார் செல்வராகவன்.
