சிறகடிக்க ஆசை சீரியலின் இன்றைய எபிசோட், பார்வையாளர்களை உறைக்க வைக்கும் அளவிற்கு கதைக்களத்தில் அதிரடி மாற்றங்களை கொண்டு வந்துள்ளது. குறிப்பாக, கோர்ட் வளாகத்தில் ரோகிணி அரங்கேற்றிய கபட நாடகம், அண்ணாமலையின் குடும்பத்தையே நிலைகுலைய செய்துவிட்டது. விவாகரத்து விசாரணைக்காக நின்ற ரோகிணி, தனக்கு ஏற்கனவே திருமணமான ரகசியமும், குழந்தையை பற்றிய உண்மையும் மனோஜுக்கு திருமணத்திற்கு முன்பே தெரியும் என்று கூறி நீதிபதிக்கே அதிர்ச்சி கொடுத்தார். தான் உண்மையை சொல்ல போன போதெல்லாம் மனோஜ் தான் “சரியான நேரத்தில் நானே பார்த்துக்கொள்கிறேன்” என்று தடுத்ததாக கண்ணீர் மல்க அவர் கூறிய பொய்கள், பார்ப்பதற்கு அச்சு அசல் உண்மை போலவே அமைந்திருந்தது.
விஜயாவை நீதிமன்றத்தில் வில்லியாக சித்தரிப்பதில் ரோகிணி மிகுந்த தந்திரமாக செயல்பட்டார். கூடுதலாக வரதட்சணை கேட்டுத் தன்னை மாமியார் துன்புறுத்தியதாகவும், வீட்டு வேலைக்காரியை போல தன்னை நடத்தியதாகவும் அவர் அடுக்கடுக்கான குற்றச்சாட்டுகளை முன்வைத்தார். அதுமட்டுமின்றி, தன்னை துரத்திவிட்டு ஒரு செல்வந்தர் வீட்டு பெண்ணை மனோஜுக்கு கட்டி வைக்க விஜயா சதி செய்வதாக அவர் சொன்ன போது, விஜயா கோபத்தில் கத்த தொடங்கினார். நீதிபதியின் எச்சரிக்கையும், மனோஜின் தெளிவற்ற பதில்களும் விவாகரத்து வழக்கிற்கு முட்டுக்கட்டை போட்டு, விசாரணையை மற்றுமொரு தேதிக்கு தள்ளிவைக்க காரணமாகிவிட்டது.
நீதிமன்றத்திற்கு வெளியிலும் ரோகிணியின் சாணக்கியத்தனம் தொடர்ந்தது. மனோஜ் ஆத்திரத்தில் அழைத்து திட்டிய போது, அதை சாமர்த்தியமாகத் தனக்கு சாதகமாக்கி பேசினார். “உன் அம்மாவுக்குப் பயந்துதானே இப்படி பொய் சொல்கிறாய்” என்று ரோகிணி தூண்டிவிட, ஆத்திரத்தில் விஜயா தனது காலணியை எடுத்து அலைபேசியை ஓங்கி அடித்தார். இந்த தருணத்திற்காகவே காத்திருந்தது போல, விஜயாவின் ஆவேசத்தையும் தனது உரையாடலையும் ரோகிணி ரகசியமாக பதிவு செய்து கொண்டார். இந்த மின்னணு ஆதாரம், அடுத்த விசாரணையில் மனோஜையும் விஜயாவையும் சட்ட ரீதியாக முடக்குவதற்கு ரோகிணிக்கு கிடைத்த மிகப் பெரிய வெற்றியாக பார்க்கப்படுகிறது.
மற்றொரு புறம், ரவி மற்றும் ஸ்ருதியின் மணவாழ்க்கையில் நீத்து ஒரு தீராத தலைவலியாக உருவெடுத்துள்ளார். ரவியை தான் காதலிப்பதாக பகிரங்கமாக அறிவித்ததுடன், அதை ஒரு கொண்டாட்டமாக மாற்ற நீத்து முயன்றது ஸ்ருதியை பெரும் சினத்திற்கு உள்ளாக்கியது. ஆத்திரமடைந்த ஸ்ருதி, நீத்துவின் முகத்திலேயே கேக்கை வீசி எறிந்து தனது வெறுப்பை வெளிப்படுத்தினார். ரவி எவ்வளவோ எச்சரித்தும், நீத்து தனது ஒருதலைப்பட்சமான காதலை விடாமல் பிடிவாதம் பிடித்தது, ரவி-ஸ்ருதி தம்பதிக்குள் மனக்கசப்பை விதைத்து, ஒரு தற்காலிக பிரிவை உண்டாக்கியுள்ளது. தன் வாழ்வில் நிம்மதி இழந்த நீது, அடுத்தவர் வாழ்வையும் சிதைக்கத் துணிந்துவிட்டார்.
ரோகிணியின் இந்த பரமபத ஆட்டத்தில் அடுத்த இலக்கு முத்து மற்றும் மீனாவை பிரிப்பதே ஆகும். எதற்கும் துணியும் சுபாவம் கொண்ட ரோகிணியை சமாளிப்பது அண்ணாமலையின் நேர்மையான குடும்பத்திற்கு அவ்வளவு எளிதான காரியம் அல்ல. குறிப்பாக, விஜயா மற்றும் மனோஜின் நிதானமற்ற பேச்சுக்கள் ரோகிணிக்கு மேலும் பலம் சேர்க்கின்றன. இந்த பிரச்சனைகளில் இருந்து மீள வேண்டுமானால், வெறும் ஆத்திரம் மட்டும் போதாது; ரோகிணியை போலவே தந்திரமாக சிந்தித்து செயல்பட வேண்டிய சூழலுக்கு அண்ணாமலை குடும்பம் தள்ளப்பட்டுள்ளது.
கதையின் போக்கை பார்க்கையில், இந்த இக்கட்டான நிலையில் இருந்து குடும்பத்தை காக்கும் வல்லமை முத்து, மீனாவிடம் மட்டுமே இருப்பதாக தெரிகிறது. ரோகிணியின் ஒவ்வொரு பொய்யையும் முறியடித்து, தகுந்த சான்றுகளுடன் அவரை தோலுரித்துக் காட்டும் முத்து மீனாவின் அடுத்தகட்ட நகர்விற்காக ரசிகர்கள் ஆவலோடு காத்திருக்கின்றனர். விஜயா மற்றும் மனோஜின் தவறுகளால் சரிந்த குடும்பப் பெயரை காப்பாற்ற முத்து மீனா எடுக்கப்போகும் அந்த புத்திசாலித்தனமான முடிவே சீரியலின் அடுத்த கட்டமாக அமையும். தர்மத்திற்கும் சூழ்ச்சிக்கும் இடையிலான இந்த போரில் மீனா எப்படி வெல்ல போகிறார் என்பதே இனி வரும் நாட்களின் சுவாரஸ்யம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
