Kanguva Review: பெரிதும் எதிர்பார்க்கப்பட்ட கங்குவா திரைப்படம் இன்று உலகம் முழுவதும் வெளியாகி உள்ளது. சிறுத்தை சிவா இயக்கத்தில், சூர்யா நடிப்பில், தேவி ஸ்ரீ பிரசாத் இசையமைப்பில், ஸ்டுடியோ கிரீன் ஞானவேல்ராஜா தயாரிப்பில் பெரும் பொருட்செலவில் உருவாகியிருக்கிறது கங்குவா திரைப்படம். சூர்யாவுடன் பாபிதியோல், இஷா பதானி, யோகிபாபு, ஆனந்த்ராஜ், ரெடின் கிங்ஸ்லி உள்ளிட்ட பலர் நடித்துள்ளனர். உலகம் முழுவதும் சுமார் 11500 திரையரங்குகளில் 2டி மற்றும் 3டி தொழில்நுட்பத்தில் கங்குவா படம் வெளியாகி உள்ளது.
நேற்று இரவே வெளிநாடுகளில் திரையிடப்பட்டது. மேலும் 10 மொழிகளில் இப்படம் தயாராகி உள்ளதால் தெலுங்கு, மலையாளம் உள்ளிட்ட மொழிகளில் காலையிலேயே முதற்காட்சி திரையிடப்பட்டது. இரண்டு ஆண்டுகளுக்குப் பிறகு சூர்யா நடித்துள்ள படம் என்பதால் தியேட்டர்கள் முன்பு ரசிகர்கள் ஆரவாரம் செய்து கொண்டாடி வருகின்றனர். வெளிமாநிலங்களிலிருந்து படத்திற்கு சிறப்பான வரவேற்பு கிடைத்திருப்பதாக இயக்குநர் சிவா தெரிவித்திருக்கிறார்.
சூர்யாவின் ‘கங்குவா’ படம் எப்படி இருக்குது? வெளிநாட்டில் படம் பார்த்தவர்களின் விமர்சனங்கள்..!
மேலும் படத்தினைப் பார்த்தவர்கள் சூர்யாவின் அசுரத் தனமான உழைப்பிற்குக் கிடைத்த பரிசு கங்குவா என்றும் படத்தில் அடுத்த ஹீரோ என்றால் தேவி ஸ்ரீ பிரசாத் தான் என்றும் கூறியிருக்கின்றனர். படத்தில் பின்னணி இசையில் தியேட்டரே அதிருகிறதாம். மேலும் இரண்டு கதபாத்திரங்களில் சூர்யா அற்புதமாக நடித்திருக்கிறார் என்றும் வரலாற்றுக் காட்சிகள் கிராபிக்ஸ் என பக்கா விஷுவல் விருந்து கங்குவாவில் இடம்பெற்றுளதாக எக்ஸ் தளத்தில் படம் பார்த்த ரசிகர்கள் கருத்துத் தெரிவித்து வருகின்றனர்.
மேலும் சூர்யா ஒன்மேன் ஷோவாக மொத்தப் படத்தினைத் தாங்கியிருக்கிறார் எனவும், படத்தில் மற்ற கதாபாத்திரங்கள் அழுத்தமாக இல்லை எனவும் கருத்துத் தெரிவித்துள்ளனர். எனினும் இந்தியாவில் இதுபோன்று பாகுபலியை மிஞ்சும் வகையில் வரலாற்றுத் திரைப்படமாக கங்குவா வெளிவந்துள்ளதால் ரசிகர்கள் ஆவலுடன் படத்தினைக் கொண்டாடி வருகின்றனர்.