ஷெரீப் இயக்கத்தில் கேபிஒய் பாலா அறிமுகமாகியுள்ள ‘காந்தி கண்ணாடி’ திரைப்படம், ஒரு புதிய கோணத்தில் ஈர்க்கிறது. இன்று வெளியாகியுள்ள இந்த படம், சிவகார்த்திகேயனின் ‘மதராஸி’, வெற்றிமாறனின் ‘பேட் கேர்ள்’ போன்ற பெரிய படங்களுக்கு போட்டியாக களமிறங்கியுள்ளது.
‘காந்தி கண்ணாடி’ – கதைச் சுருக்கம்
ஒரு தனியார் நிறுவனத்தில் பாதுகாப்பு ஊழியராக பணிபுரியும் பாலாஜி சக்திவேல், தனது மனைவி அர்ச்சனா சமைக்கும் தயிர் சாதத்தையும், புளி சாதத்தையும் மனம் உருகி ரசிக்கும் ஒரு அன்பான கணவர். குழந்தைகள் இல்லாத இந்த தம்பதி, 60-வது திருமண நாளை கொண்டாட ஆசைப்படுகின்றனர். அப்போது, பணத்தாசை பிடித்த நிகழ்ச்சி ஏற்பாட்டாளர் பாலாவை சந்திக்கின்றனர்.
பாலாவின் பேராசை ஜெயித்ததா? அல்லது அர்ச்சனாவின் ஆசைப்படி 60-வது திருமண விழா கோலாகலமாக நடந்ததா? என்பதே படத்தின் கதை.
‘பணமதிப்பிழப்பு’ (Demonetisation) – ஒரு திருப்பம்
நிகழ்ச்சிக்காக நிலத்தை விற்று பணம் திரட்டும் பாலாஜி சக்திவேல், பணமதிப்பிழப்பு அறிவிப்பால் அதிர்ச்சியடைகிறார். அவரது சேமிப்பு செல்லாததாகிறது. இந்த திருப்பம், பாலாவின் வாழ்க்கையையும் புரட்டி போடுகிறது. இதன் பிறகு கதை என்ன ஆகிறது என்பதை ஷெரீப் உணர்வுபூர்வமாக பதிவு செய்துள்ளார்.
நடிகர்களின் பங்களிப்பு
படத்தின் மிகப்பெரிய பலம் பாலாஜி சக்திவேல் மற்றும் அர்ச்சனா இருவரும். “அதான் நீ இருக்கேல…” என்று பாலாஜி சக்திவேல் சொல்லும் ஒவ்வொரு காட்சியும் இதயத்தை வருடுகிறது. படத்தின் நாயகனாக அறிமுகமாகியுள்ள பாலா, முழுமையான ஹீரோயிசத்தை தவிர்த்து, ஒரு யதார்த்தமான எதிர்மறை கதாபாத்திரத்தில் சிறப்பாக நடித்துள்ளார். குறிப்பாக, அவரது மனமாற்ற காட்சிகள் நேர்த்தியாக படமாக்கப்பட்டுள்ளன.
நமிதா கிருஷ்ணமூர்த்தி தனது அழகியலும் இயல்பான நடிப்பும் மூலம் கவர்கிறார். ஜீவா சுப்ரமணியம், ஆராத்யா, ரிது சாரா, அமுதவாணன், மனோஜ் பிரபு, மதன் உள்ளிட்ட துணை நடிகர்களின் நடிப்பும் படத்திற்கு பலம் சேர்க்கிறது.
தொழில்நுட்ப அம்சங்கள்
பாலாஜி கே.ராஜாவின் ஒளிப்பதிவு கண்களுக்கு விருந்தளிக்கிறது. விவேக்-மெர்வின் இசையமைப்பில் பாடல்கள் கதைக்கு ஏற்றவாறு அமைந்துள்ளன. யுவன் சங்கர் ராஜாவின் குரலில் ஒலிக்கும் பாடல் உணர்வுகளைத் தூண்டி, படத்தின் பெரிய பலமாக உள்ளது.
நிறை, குறைகள்
சில காட்சிகளை முன்கூட்டியே கணிக்க முடிவது ஒரு சிறு பலவீனம். முதல் பாதி இன்னும் விறுவிறுப்பாக இருந்திருக்கலாம். இருந்தாலும், முதுமையில் கூட காதல் சாத்தியம் என்பதை பதிவு செய்த விதத்தில் இந்த ‘காந்தி கண்ணாடி’ தனித்து நிற்கிறது.
மொத்தத்தில், உறவுகளின் முக்கியத்துவத்தையும், அன்பின் ஆழத்தையும் உணர்வுபூர்வமாக வெளிப்படுத்தியிருக்கிறார் இயக்குநர் ஷெரீப். குறிப்பாக, படத்தின் கிளைமாக்ஸ், பார்வையாளர்கள் மனதில் ஒரு கனமான தாக்கத்தை ஏற்படுத்துகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
