2024ஆம் ஆண்டு நிறைவடைந்து 2025ஆம் ஆண்டு பிறக்கப்போகிறது. புத்தாண்டில் நல்ல வேலை கிடைக்குமா? திருமணம் நடைபெறுமா என பலருக்கும் எதிர்பார்ப்பு இருக்கும். 2025ஆம் ஆண்டில் ஆண்டு கோள்களான சனி, குரு, ராகு, கேது பெயர்ச்சி நிகழப்போகிறது. இந்த நான்கு கிரகங்களின் இடப்பெயர்ச்சி ரிஷப ராசியில் பிறந்தவர்களுக்கு என்னமாதிரியாக பலன்கள் கிடைக்கப்போகிறது என்று பார்க்கலாம். கார்த்திகை, ரோகிணி, மிருகஷீரிடம் 1,2,ஆம் பாதங்களில் பிறந்தவர்களுக்கு என்ன நன்மைகள் நடைபெறும் என்று பார்க்கலாம்.
ரிஷபம்:
சுக்கிரபகவானை ராசி அதிபதியாகக் கொண்ட ரிஷப ராசிக்காரர்களுக்கு 2025ஆம் ஆண்டு பிறக்கும் போதே கிரகங்களின் பயணம் உங்களின் பண வருமானத்தை அதிகரிக்கக் கூடியதாக இருக்கும். ஜென்ம குருவின் பயணமும் பார்வையும் அதிர்ஷ்டத்தை தரக்கூடியதாக அமைந்துள்ளது. தொழில் ஸ்தானத்தில் உள்ள சனி பகவான் வேலையில் இருப்பவர்களுக்கு புரமோசனை தரப்போகிறார். லாப ராகுவும், பூர்வ புண்ணிய ஸ்தான கேதுவும் உங்களின் வருமானத்தை பல மடங்காக அதிகரிக்கப்போகின்றனர்.
சனி பெயர்ச்சி
சனி பகவான் மார்ச் மாத இறுதியில் கும்ப ராசியில் இருந்து மீன ராசிக்கு இடப்பெயர்ச்சி அடையப்போகிறார். உங்கள் ராசிக்கு லாப வீட்டிற்கு வரப்போகும் சனிபகவான் தொழில் வருமானத்தை அதிகரிப்பார். தொட்டதெல்லாம் பொன்னாகும் காலமாக அமையப்போகிறது. புதிய தொழில் தொடங்கலாம். முதலீட்டாளர்களுக்கு லாபம் அதிகரிக்கும். வேலையில் இருப்பவர்களுக்கு புரமோசனுடன் சம்பள உயர்வும் அதிகரிக்கும். சனி பகவானின் பார்வை உங்கள் ராசிக்கு கிடைக்கப்போவதால் உடல் ஆரோக்கியத்தில் அக்கறை காட்டுவது அவசியம்.
குரு பெயர்ச்சி
ஜென்ம ராசியில் அமர்ந்திருக்கும் குரு பகவான் உங்கள் ராசிக்கு இரண்டாம் வீடான தன குடும்ப வாக்கு ஸ்தானத்திற்கு இடப்பெயர்ச்சி அடையப்போகிறார். குடும்ப குரு உங்கள் வாழ்க்கையில் குதூகலத்தை ஏற்படுத்துவார். மகிழ்ச்சியும், நிம்மதியும் அதிகரிக்கும். பண வருமானத்திற்கு பஞ்சமிருக்காது. குருபகவானின் பார்வை உங்கள் ராசிக்கு 6,8,10ஆம் வீடுகளின் மீது விழுவதால் நோய்கள் நீங்கும் காலம் வந்து விட்டது. கடன் பிரச்சினை முடிவுக்கு வரும். வேலை தேடிக்கொண்டிருப்பவர்களுக்கு நல்ல வேலை கிடைக்கும்.
குரு பலன் இருக்கா?
குரு பகவான் அக்டோபர் மாதம் அதிசாரமாக உங்கள் ராசிக்கு மூன்றாம் வீடான மிதுன ராசிக்கு இடப்பெயர்ச்சி அடையப்போகிறார். புதிய முயற்சிகளில் வெற்றி கிடைக்கும். புதிய வேலைக்காகவும், தொழில் தொடங்கவும் முயற்சி செய்யலாம். திருமண சுப காரியங்கள் இந்த ஆண்டு முழுவதும் உங்களுக்கு கை கூடி வரும். ஆண்டு முழுவதும் குரு பலன் உள்ளதால் உங்கள் வீட்டில் நல்ல காரியங்கள் நடக்க வாய்ப்பு உள்ளது. குரு பகவானின் பார்வை ஆண்டின் இறுதியில் 7,9,11ஆம் வீடுகளின் மீது விழுவதால் தொழில், வியாபாரத்தில் செய்யும் முதலீடுகளில் வருமானம் பல மடங்காக அதிகரிக்கும்.
ராகு கேது பெயர்ச்சி
ராகு பகவான் ஆண்டின் முற்பகுதியில் லாப வீட்டில் பயணம் செய்வதால் உங்களுக்கு பல வழிகளிலும் பண வருமானம் வரும். திருக்கணித பஞ்சாங்கப்படி மே மாதத்தில் ராகு கேது பெயர்ச்சி நிகழப்போகிறது. தொழில் ஸ்தானத்திற்கு வரப்போகும் ராகு பகவான் வேலையில் மிகப்பெரிய மாற்றத்தை ஏற்படுத்தப்போகிறார். படித்து முடித்து விட்டு நல்ல வேலை கிடைக்கவில்லையே என்று காத்திருப்பவர்களுக்கு நல்ல வேலை கிடைக்கும். புரமோசனும் சம்பள உயர்வும் தேடி வரும். கேது பகவான் பூர்வ புண்ணிய ஸ்தானத்தில் இருந்து உங்கள் ராசிக்கு நான்காம் வீடான சுக ஸ்தானத்திற்கு வரப்போகிறார். அம்மாவின் உடல் ஆரோக்கியத்தில் அக்கறையும், கவனமும் தேவைப்படும்.
ரிஷப ராசிக்காரர்கள் திங்கட்கிழமைகளில் சிவ ஆலயத்திற்கு சென்று அபிஷேகத்திற்கு பால் வாங்கி கொடுப்பது நல்லது. மொத்தத்தில் 2025ஆம் ஆண்டு ரிஷப ராசிக்காரர்களுக்கு புதிய மாற்றங்களையும் முன்னேற்றத்தையும் ஏற்படுத்தக்கூடிய ஆண்டாக அமையப்போகிறது.
மேலும் ஜோதிட தகவல்களுக்கு தமிழ் மினிட்ஸ் இணைதளத்தை பின்தொடரவும்.