தமிழக பொது சுகாதார துறையிலும், அரசு மருத்துவமனைகளிலும் தங்களை முழுமையாக அர்ப்பணித்துக்கொண்டு பணியாற்றும் ஆயிரக்கணக்கான மருத்துவர்களுக்கு மத்தியில், தங்களின் சுயநலத்திற்காக அரசுப் பணியை மதிக்காமல் தப்பியோடும் சில மருத்துவர்களின் செயல்பாடு அதிர்ச்சியை ஏற்படுத்துகிறது. தமிழகத்தில் தற்போது பொறுப்பேற்றுள்ள தமிழக வெற்றிக் கழகத்தின் அரசு, இத்தகைய தப்பியோடிய மருத்துவர்களின் பெயர்களைப் பொதுவெளியில் பகிரங்கமாக வெளியிட வேண்டும் என்ற கோரிக்கை வலுத்து வருகிறது. அரசு மருத்துவக் கல்லூரிகளில் சலுகைக் கட்டணத்தில் படித்து, பல்வேறு நிதிசார் சலுகைகளையும், அரசு வழங்கும் ஊதியத்தையும் பெற்றுக்கொண்டு, முறையான அனுமதியின்றிப் பணியை விட்டு ஓடும் மருத்துவர்களின் பட்டியல் மக்களின் பார்வைக்கு வைக்கப்பட வேண்டியது அவசியமாகும்.
இப்படித் தப்பியோடும் மருத்துவர்களில் பெரும்பாலானோர், சென்னை, கோவை, மதுரை போன்ற பெருநகரங்களில் பெரிய அளவிலான தனியார் மருத்துவமனைகளைத் தொடங்கி நடத்தி வருவதாகக் குற்றச்சாட்டுகள் எழுகின்றன. ஏழை எளிய மக்களுக்குச் சேவை செய்ய வேண்டிய அரசுப் பணியை ஒரு பொருட்டாக மதிக்காமல், கார்ப்பரேட் பாணியில் கோடிக்கணக்கில் லாபம் ஈட்டுவதையே இவர்கள் தங்களின் லட்சியமாகக் கொண்டுள்ளனர். மக்கள் வரிப்பணத்தில் உருவான மருத்துவப் படிப்பை தங்களின் சுய லாபத்திற்குப் பயன்படுத்திக்கொண்டு, அரசுப் பணிக்கு வராமல் ஏமாற்றும் இவர்களின் இரட்டை முகத்தை வெளிச்சமிட்டுக் காட்டுவது தற்போதைய தவெக அரசின் முக்கியக் கடமையாகப் பார்க்கப்படுகிறது.
அரசு மருத்துவப் பணியில் சேர்ந்துவிட்டு, உரிய விடுப்பு ஒப்புதல் பெறாமலேயே தன்னிச்சையாகப் பணிக்கு வராமல் இருக்கும் மருத்துவர்களால் ஏழை நோயாளிகள் தரமான சிகிச்சை பெற முடியாமல் பல்வேறு இடர்பாடுகள் ஏற்படுகின்றன. இந்த முறைகேடுகளைத் தடுக்க மருத்துவக் கல்வி இயக்குனர் அலுவலகம் ஏற்கனவே கடுமையான அரசாணைகளையும், சுற்றறிக்கைகளையும் வெளியிட்டுள்ளது. ஆனால், இந்த உத்தரவுகள் பல நேரங்களில் வெறும் காகித வடிவிலேயே முடங்கிக் கிடக்கின்றன. தற்போதுள்ள அரசு, காலத்தைக் கடத்தாமல், ஏற்கனவே தங்களின் துறையால் பிறப்பிக்கப்பட்ட அதிகாரப்பூர்வ உத்தரவுகளை உடனடியாகவும், எவ்வித பாரபட்சமின்றியும் களத்தில் அமல்படுத்த முன்வர வேண்டும்.
அதன்படி, இரண்டு மாதங்களுக்கும் மேலாகத் தொடர்ந்து பணிக்கு வராத முதுநிலை மற்றும் உயர் சிறப்பு மருத்துவப் படிப்பு முடித்த மருத்துவர்களிடமிருந்து, அவர்கள் அரசுக்கு வழங்கிய பிணையப் பத்திரத் தொகையை உரிய வட்டியுடன் உடனடியாக வசூலிக்க வேண்டும். மேலும், மருத்துவர் வசிக்கும் பகுதியில் உள்ள காவல் நிலையத்திற்கு அவர் அரசுப் பணிக்கு வராதது தொடர்பான முறையான தகவலைத் தெரிவித்து, சட்டரீதியான நடவடிக்கைகளை எடுக்க வேண்டும். இத்தகைய அதிரடி நடவடிக்கைகள் மட்டுமே, வருங்காலங்களில் இளம் மருத்துவர்கள் தன்னிச்சையாகப் பணியை விட்டு ஓடும் எண்ணத்தைத் தடுக்கும் அரணாக அமையும்.
மறுபுறம், அரசுப் பணியைப் புறக்கணித்துவிட்டு வெளிநாடுகளுக்குச் சென்று சொகுசு வாழ்க்கை வாழும் மருத்துவர்களுக்கும் தவெக அரசு செக் வைக்க வேண்டும். படித்து முடித்துவிட்டு அரசுப் பணிக்கு வராமல் வெளிநாடுகளில் தஞ்சம் புகுந்துள்ள மருத்துவர்களின் Passportஐ உடனடியாக ரத்து செய்ய வேண்டும். இதற்காக, இத்தகைய மருத்துவர்களின் முழு விவரங்களையும் தேவையான ஆவணங்களுடன் இந்திய வெளியுறவுத் துறை அமைச்சகத்திற்கு அனுப்பி, அவர்களின் பாஸ்போர்ட்டை முடக்குவதற்கான மேல்நடவடிக்கைகளை மாநில அரசு துரிதப்படுத்த வேண்டும்.
முடிவாகப் பார்க்கும்போது, மக்கள் நலனை முன்னிறுத்தும் ஒரு அரசு, இத்தகைய சிஸ்டத்தின் ஓட்டைகளை அடைப்பதில் தான் தனது நிர்வாகத் திறமையைக் காட்ட முடியும். அரசுப் பணத்தையும், சலுகைகளையும் அனுபவித்துவிட்டுத் துரோகம் செய்யும் மருத்துவர்கள் மீது தவெக அரசு காட்டும் கண்டிப்பு, ஒட்டுமொத்த மருத்துவத் துறையையும் சீரமைக்கும். பிணையப் பத்திரத் தொகையை மீட்பது, காவல் துறை மூலம் நடவடிக்கை எடுப்பது மற்றும் வெளியுறவுத் துறை மூலம் பாஸ்போர்ட்டை ரத்து செய்வது ஆகிய முப்பரிமாணச் சட்ட நடவடிக்கைகள் மூலமாக மட்டுமே ஏழை எளிய மக்களுக்கான மருத்துவச் சேவையை இந்த அரசு உறுதி செய்ய முடியும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
