2026 ஆம் ஆண்டு பல்வேறு மாநிலங்களில் நடைபெற்ற சட்டமன்றத் தேர்தல் முடிவுகள் இந்திய அரசியலில் ஒரு புதிய சகாப்தத்தை தொடங்கி வைத்துள்ளன. குறிப்பாக, மேற்கு வங்கத்தில் பல ஆண்டுகளாக அசைக்க முடியாத சக்தியாக விளங்கிய மம்தா பானர்ஜியின் திரிணாமுல் காங்கிரஸ் ஆட்சியை பறிகொடுத்துள்ளது.
பாரதிய ஜனதா கட்சி 177 இடங்களை கைப்பற்றி இமாலய வெற்றி பெற்றுள்ள நிலையில், திரிணாமுல் காங்கிரஸ் வெறும் 113 இடங்களுக்கு தள்ளப்பட்டுள்ளது. வங்காள மண்ணில் பாஜகவின் இந்த அதிரடி வெற்றி, தேசிய அரசியலில் அக்கட்சியின் பிடியை மேலும் வலுப்படுத்தியுள்ளதுடன், கிழக்கு இந்தியாவில் ஒரு மிகப்பெரிய அரசியல் மாற்றத்தை ஏற்படுத்தியுள்ளது.
தென்னிந்தியாவின் கேரள மாநிலத்தில், இடதுசாரிகளின் தொடர் ஆட்சிக்கு முற்றுப்புள்ளி வைக்கப்பட்டுள்ளது. காங்கிரஸ் தலைமையிலான ஐக்கிய ஜனநாயக முன்னணி (UDF) 87 இடங்களை பெற்று பெரும்பான்மையுடன் ஆட்சியை பிடித்துள்ளது. கடந்த இரண்டு முறைகளாக ஆட்சியில் இருந்த இடதுசாரி முன்னணி இம்முறை 40 இடங்களை மட்டுமே பெற்று பின்னடைவை சந்தித்துள்ளது. அதேசமயம், கேரள அரசியலில் கால்பதிக்கத் துடிக்கும் பாஜக ஒரு இடத்தை கைப்பற்றி தனது இருப்பைப் பதிவு செய்துள்ளது. கேரள மக்களின் இந்தத் தீர்ப்பு, அம்மாநிலத்தில் வழக்கமாக நிலவும் ஆட்சி மாற்ற அரசியல் மீண்டும் திரும்புவதை உறுதிப்படுத்தியுள்ளது.
வடகிழக்கு மாநிலமான அஸ்ஸாமில் பாஜக தனது ஆதிக்கத்தை தொடர்ந்து தக்கவைத்துக் கொண்டுள்ளது. முதலமைச்சர் ஹிமந்த பிஸ்வா சர்மா தலைமையிலான பாஜக கூட்டணி 98 இடங்களை பெற்று மீண்டும் ஆட்சியை பிடித்துள்ளது. எதிர்க்கட்சியான காங்கிரஸ் வெறும் 26 இடங்களை மட்டுமே பெற்று கடும் தோல்வியைத் தழுவியுள்ளது. அஸ்ஸாமில் செயல்படுத்தப்பட்ட பல்வேறு வளர்ச்சித் திட்டங்கள் மற்றும் உட்கட்டமைப்பு வசதிகள் பாஜகவின் இந்த வெற்றிக்கு முக்கியக் காரணமாகப் பார்க்கப்படுகிறது. இந்த வெற்றி வடகிழக்கு மாநிலங்களில் பாஜகவின் செல்வாக்கு குறையவில்லை என்பதை நிரூபிக்கும் வகையில் அமைந்துள்ளது.
புதுச்சேரி யூனியன் பிரதேசத்தைப் பொறுத்தவரை, மக்கள் மீண்டும் என். ரங்கசாமி தலைமையிலான ஆட்சிக்கு ஆதரவு தெரிவித்துள்ளனர். என்.ஆர். காங்கிரஸ் மற்றும் பாஜக கூட்டணி மீண்டும் ஒருமுறை புதுச்சேரியின் நிர்வாகப் பொறுப்பை ஏற்றுள்ளது. ரங்கசாமியின் மக்கள் செல்வாக்கு மற்றும் மத்திய அரசின் ஒத்துழைப்புடன் கூடிய நிர்வாகம் புதுச்சேரி மக்களிடையே நம்பிக்கையைப் பெற்றுள்ளது. இதன் மூலம் புதுச்சேரியில் அரசியல் நிலைப்புத்தன்மை உறுதி செய்யப்பட்டுள்ளதுடன், வளர்ச்சிப் பணிகள் தடையின்றித் தொடர வாய்ப்பு ஏற்பட்டுள்ளது.
ஒட்டுமொத்தமாகப் பார்க்கும்போது, 2026 தேர்தல் முடிவுகள் தேசிய கட்சிகளான பாஜக மற்றும் காங்கிரஸிற்கு வெவ்வேறு மாநிலங்களில் வெற்றிகளை பெற்று தந்துள்ளன. மேற்கு வங்கத்தின் வீழ்ச்சி திரிணாமுல் காங்கிரஸிற்கு பெரும் பின்னடைவாக அமைந்தாலும், கேரளாவின் வெற்றி காங்கிரஸிற்குப் புதிய உத்வேகத்தைத் தந்துள்ளது. பிராந்தியக் கட்சிகளின் ஆதிக்கம் ஒருபுறம் இருந்தாலும், தேசியக் கட்சிகள் மாநில வாரியாகத் தங்கள் செல்வாக்கை மாற்றியமைத்து வருவதை இந்த முடிவுகள் தெளிவாகக் காட்டுகின்றன. இந்தியாவின் அரசியல் வரைபடத்தில் இந்தத் தேர்தல்கள் ஒரு முக்கிய மைல்கல்லாக அமைந்துள்ளன.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
