தமிழக திரைத்துறையில் பெரும் எதிர்பார்ப்பை ஏற்படுத்தியிருந்த ‘ஜனநாயகன்’ திரைப்படம் இணையதளத்தில் சட்டவிரோதமாக வெளியான விவகாரம் தற்போது சட்ட ரீதியான கடுமையான நடவடிக்கைகளை சந்தித்துள்ளது. நடிகர் விஜய் நடிப்பில் உருவாகி, பொங்கல் பண்டிகைக்கு வெளியாகும் என அறிவிக்கப்பட்டிருந்த இப்படம், தணிக்கை குழுவின் மறு ஆய்வில் இருந்தபோதே ஏப்ரல் 3-ஆம் தேதி இணையதளத்தில் கசிந்தது.
படத்தயாரிப்பு நிறுவனமான கேவிஎன் ப்ரொடக்ஷன்ஸ் அளித்த புகாரின் பேரில் சென்னை அசோக் நகர் போலீஸார் வழக்குப்பதிவு செய்து தீவிர விசாரணை மேற்கொண்டு வருகின்றனர். இந்த சூழலில், இப்படத்தை சட்டவிரோதமாக வெளியிட்டதாக குற்றம் சாட்டப்பட்ட உமாசங்கர் என்பவரின் முன்ஜாமீன் மனு தள்ளுபடி செய்யப்பட்டுள்ளது திரைத்துறையினர் மத்தியில் ஒரு முக்கிய திருப்புமுனையாக பார்க்கப்படுகிறது.
திருவேற்காட்டை சேர்ந்த உமாசங்கர், தான் ஒரு ஃப்ரீலான்சிங் எடிட்டர் என்றும் தனக்கு இந்த வழக்கில் முன்ஜாமீன் வழங்க வேண்டும் என்றும் சென்னை உயர் நீதிமன்றத்தில் மனுத்தாக்கல் செய்திருந்தார். ஆனால், நீதிமன்ற விசாரணையின் போது அவர் தரப்பில் ஆஜரான வழக்கறிஞர், உமாசங்கர் ஒரு சினிமா எடிட்டர் அல்ல என்றும், அவர் ஒரு பிரபல துணிக்கடையில் மேலாளராக பணியாற்றி வருவதாகவும் ஒரு புதிய தகவலை முன்வைத்தார்.
மேலும், இந்த படத்தை வெளியிடுவதற்காக அவர் யாரிடமும் எந்த தொகையும் பெறவில்லை என்பதால் அவருக்கு முன்ஜாமீன் வழங்கப்பட வேண்டும் என்று வாதிடப்பட்டது. இருப்பினும், ஒரு பொறுப்பான பதவியில் இருப்பவர் இத்தகைய சட்டவிரோத செயலில் ஈடுபட்டதாக கூறப்படும் குற்றச்சாட்டு நீதிமன்றத்தின் கவனத்தை ஈர்த்தது.
தயாரிப்பு நிறுவனமான கேவிஎன் ப்ரொடக்ஷன்ஸ் தரப்பில் ஆஜரான வழக்கறிஞர் விஜயன் சுப்பிரமணியன், இந்த திருட்டு சம்பவத்தின் பின்னணியை விரிவாக விளக்கினார். இந்த வழக்கில் ஏற்கனவே கைது செய்யப்பட்டுள்ள பிரசாந்த் என்பவர், எடிட்டிங் ஸ்டுடியோவிலிருந்து படத்தை திருட்டுத்தனமாக தனது லேப்டாப்பில் நகலெடுத்து, துணிக்கடையில் வேலை பார்க்கும் தனது சகோதரருக்கு அனுப்பியுள்ளார். அவர் மூலமாகவே இந்த படம் மனுதாரரான உமாசங்கருக்கு கிடைத்துள்ளது. உமாசங்கர் தான் அந்த படத்தை இணையதளத்தில் சட்டவிரோதமாக பதிவேற்றம் செய்துள்ளார் என்பது விசாரணையில் உறுதி செய்யப்பட்டுள்ளதாக தெரிவிக்கப்பட்டது. சுமார் 500 கோடி ரூபாய் பிரம்மாண்ட முதலீட்டில் எடுக்கப்பட்ட ஒரு படத்தை இப்படி திருட்டுத்தனமாக வெளியிட்டவருக்கு முன்ஜாமீன் வழங்கக் கூடாது என்று அவர் வலுவாக வாதிட்டார்.
காவல்துறை தரப்பில் ஆஜரான கூடுதல் குற்றவியல் வழக்கறிஞர் கே.எம்.டி. முகிலன், எடிட்டிங் ஸ்டுடியோவில் இருந்துதான் இந்த படம் கசிந்துள்ளது என்பதை ஆதாரங்களுடன் முன்வைத்தார். இணையதளத்தில் வெளியான படத்தில் எடிட்டிங் நேரத்தில் பயன்படுத்தப்படும் ‘வாட்டர்மார்க்’ அப்படியே இருப்பதை சுட்டிக்காட்டிய அவர், பிரசாந்த் என்பவரால் திருடப்பட்ட படம் மற்றவர்களுக்கு பகிரப்பட்டு, பின்னர் கம்ப்ரஸ் செய்யப்பட்டு இணையத்தில் ஏற்றப்பட்டதாக குறிப்பிட்டார். நாளொன்றுக்கு 500 பேர் வீதம் சுமார் 145 நாட்களுக்கு மேலாக கடுமையாக உழைத்து உருவாக்கிய ஒரு படைப்பை இத்தகைய செயல்கள் பாழாக்குவதாகவும், எனவே மனுதாரரை சிறையில் வைத்து விசாரணை நடத்த வேண்டியது அவசியம் என்றும் அவர் வலியுறுத்தினார்.
அனைத்துத் தரப்பு வாதங்களையும் கேட்ட நீதிபதி ஜி.கே. இளந்திரையன், ஒரு மாபெரும் உழைப்பை சட்டவிரோத செயல்கள் மூலம் சிதைப்பதை அனுமதிக்க முடியாது என்று கருதி, உமாசங்கரின் முன்ஜாமீன் மனுவை தள்ளுபடி செய்து உத்தரவிட்டார். இந்தப் படத்தின் கசிவு ஒட்டுமொத்த படக்குழுவினரின் உழைப்பையும் பொருளாதாரத்தையும் பாதித்துள்ள நிலையில், நீதிமன்றத்தின் இந்த முடிவு திருட்டு விசிடி மற்றும் இணையதள திருட்டிற்கு எதிரான ஒரு எச்சரிக்கையாக அமைந்துள்ளது.
விசாரணை இன்னும் தீவிரமடைந்துள்ள நிலையில், இதன் பின்னணியில் உள்ள மற்ற நபர்களும் விரைவில் சட்டத்தின் முன் நிறுத்தப்படுவார்கள் என்று எதிர்பார்க்கப்படுகிறது. ‘ஜனநாயகன்’ திரைப்பட விவகாரத்தில் கிடைத்துள்ள இந்தச் சட்ட ரீதியான முன்னேற்றம் திரைத்துறையினருக்குச் சிறு ஆறுதலைத் தந்துள்ளதாகக் கூறப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
