தமிழக ஜனநாயகத்தின் கறைபடிந்த பக்கமாக மாறிப்போயுள்ள “ஓட்டுக்குப் பணம்” கொடுக்கும் கலாச்சாரம், தற்போது நடந்து முடிந்துள்ள தேர்தலில் அதன் உச்சத்தை எட்டியுள்ளது. அரசியல் கட்சிகள் இந்த விஷயத்தில் போட்டி போட்டுக்கொண்டு செயல்படுவது வேதனைக்குரியது.
கீழடி அகழ்வாராய்ச்சி, சிலப்பதிகார பெருமை, அண்ணா மற்றும் கருணாநிதியின் தமிழ் ஆளுமை என மேடைகளில் முழங்கும் திராவிட கட்சிகள், தேர்தல் என்று வரும்போது வாக்காளர்களுக்கு ஐந்தாயிரம், நான்காயிரம் என பணத்தை வாரி இறைப்பது ஒட்டுமொத்த தமிழினத்திற்கும் தலைகுனிவை ஏற்படுத்தியுள்ளது. இந்தியாவிலேயே ஓட்டுக்காக அதிக பணம் புழங்கும் மாநிலமாக தமிழகம் மாறியிருப்பது, நம் ஜனநாயகத்தின் வீழ்ச்சியையே காட்டுகிறது.
உழைத்துச் சம்பாதிக்கும் சாமானிய மக்களுக்கு, ஒரு ஓட்டுக்கு ஐந்தாயிரம் ரூபாய் என்பது ஒரு பெரிய தொகையாக தெரியலாம். மாதத்திற்கு எட்டாயிரம் ரூபாய் வருமானம் ஈட்டும் ஒரு ஏழை தொழிலாளி, இந்த பணத்தை வாங்காமல் இருப்பது கடினம். ஆனால், மக்கள் வாங்கும் இந்த பணம் எங்கிருந்து வந்தது? என்பதுதான் இங்கே பிரதான கேள்வி. ஆட்சியாளர்கள் கொடுக்கும் இந்த பணம் மக்கள் வரிப்பணத்தில் கொள்ளையடிக்கப்பட்டதா அல்லது முறைகேடாக சம்பாதிக்கப்பட்டதா என்ற கூச்சமே இல்லாமல் அரசியல் தலைவர்கள் செயல்படுகின்றனர். ஒரு புதிய தலைமுறையை “தற்குறிகள்” என்று கேலி செய்யும் பழைய அரசியல்வாதிகள், ஓட்டுக்கு பணம் கொடுத்து மக்களை தற்குறிகளாக மாற்ற முயல்வதுதான் உண்மையான வெட்கக்கேடு.
பக்கத்து மாநிலமான கேரளாவை ஒப்பிட்டு பார்க்கும்போது, தமிழக அரசியல்வாதிகளின் செயல்பாடு இன்னும் மோசமாக தெரிகிறது. கேரளாவில் தேர்தல் முடிந்துள்ள நிலையில், அங்கு ஓட்டுக்குப் பணம் கொடுத்ததாக எங்கும் செய்திகள் வரவில்லை. பாலக்காடு பகுதியில் ஒரு மூத்த வேட்பாளர் கை கொடுத்தபோது அவரிடம் பணம் இருந்ததா என்பது குறித்து ஒரு நாள் முழுவதும் விவாதம் நடக்கும் அளவிற்கு அங்குள்ள மக்கள் அதை பெரிய அவமானமாக கருதுகின்றனர். ஓட்டுக்கு பணம் வாங்குவது என்பது ஜனநாயகத்திற்கு இழைக்கப்படும் துரோகம் என்ற புரிதல் கேரள மக்களிடம் உள்ளது. ஆனால், தமிழகத்தில் “கல் தோன்றா மண் தோன்றா காலத்து மூத்த குடி” என்று பெருமை பேசிக்கொண்டே, ரகசியமாக பணம் கொடுப்பதை ஒரு சாதனையாக கருதுகின்றனர்.
அரசியல் கட்சிகள் திட்டமிட்டு மக்களை பணத்திற்கு அடிமையாக்கும் பழக்கத்தை ஏற்படுத்தி வைத்துள்ளன. தேர்தலுக்கு தேர்தல் பணத்தின் அளவு அதிகரித்து கொண்டே போகிறதே தவிர, மக்களின் வாழ்வாதாரத்தில் எந்த முன்னேற்றமும் ஏற்படுவதில்லை. 5000 ரூபாயை கொடுத்துவிட்டு, அடுத்த ஐந்து ஆண்டுகளுக்கு பொதுமக்களின் உரிமைகளை விலைக்கு வாங்கும் இந்த அவலநிலை மாற வேண்டும். அரசியல் கட்சியினர் மனசாட்சியை தொட்டு சிந்தித்து பார்க்க வேண்டும். தமிழ் பெருமையும், கீழடி புகழும் வெறும் மேடை பேச்சோடு நின்றுவிடாமல், நேர்மையான தேர்தல் முறையில் பிரதிபலிக்க வேண்டாமா?
இறுதியாக, மாற்றத்தை விரும்பும் இளைஞர்களும், புதிய அரசியல் சக்திகளும் இத்தகைய கலாச்சாரத்திற்கு எதிராகக் குரல் கொடுக்க வேண்டியது காலத்தின் கட்டாயம். திராவிட பாரம்பரியம் பேசும் கட்சிகள் தங்களின் கடந்த கால பெருமைகளை சீரழிக்கும் வகையில் இந்த ஓட்டுக்கு பணம் கொடுக்கும் முறையை தொடர்ந்து வருவது வருத்தமளிக்கிறது. பணம் கொடுத்து வாக்குகளை பெறுவது ஒரு பெருமையல்ல, அது ஒரு பலவீனம். மக்கள் விழிப்புணர்வு பெற்று, பணத்தை நிராகரிக்கும் ஒரு காலம் வரும்போதுதான் தமிழகத்தின் உண்மையான முன்னேற்றம் தொடங்கும். அதுவரை நாம் பேசும் தமிழ் பெருமைகள் அனைத்தும் வெறும் வெற்று முழக்கங்களாகவே எஞ்சியிருக்கும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
