இந்திய பாதுகாப்பு துறையில் நீண்டகாலமாக எதிர்பார்க்கப்பட்ட ஒரு அதிரடி நடவடிக்கையை இந்துஸ்தான் ஏரோநாட்டிக்ஸ் லிமிடெட் எடுத்துள்ளது. எஞ்சின்
விநியோகத்தில் ஏற்பட்டுள்ள பெரும் தாமதத்திற்காக அமெரிக்காவின் ஜெனரல் எலக்ட்ரிக் நிறுவனத்தின் மீது எச்.ஏ.எல் அபராதம் விதித்துள்ளது. Tejas MK1A போர் விமானங்களுக்கான எஞ்சின்களை வழங்குவதில் ஜி.இ நிறுவனம் தொடர்ந்து காலக்கெடுவை மீறி வருவதால், தற்போது வழங்கப்படும் Paymentsகளில் அந்த அபராத தொகையைக் கழித்துக்கொண்டே எச்.ஏ.எல் பணத்தை செலுத்தி வருகிறது. 2021-ல் கையெழுத்தான ஒப்பந்தத்தின்படி ஐந்து ஆண்டுகளில் வெறும் ஆறு எஞ்சின்களை மட்டுமே ஜி.இ வழங்கியுள்ளது, இது இந்திய விமானப்படையின் வலிமையை நேரடியாக பாதிக்கும் விஷயமாக பார்க்கப்படுகிறது.
ஜி.இ நிறுவனம் தனது விநியோக சங்கிலியில் சிக்கல் இருப்பதாக கூறி வந்தாலும், ஐந்து ஆண்டுகளுக்கும் மேலாக ஒரு உலகத்தரம் வாய்ந்த நிறுவனத்தால் இந்த சிக்கலை தீர்க்க முடியாமல் இருப்பது பல சந்தேகங்களை எழுப்பியுள்ளது. உக்ரைன் போர் மற்றும் உலகளாவிய சூழல்களை காரணமாக காட்டினாலும், இந்தியாவின் தேஜஸ் திட்டம் முடங்கி போவதை இந்தியா இனி வேடிக்கை பார்க்காது என்பதை இந்த அபராத நடவடிக்கை உணர்த்துகிறது. வெறும் பேச்சுவார்த்தைகள் மற்றும் காலக்கெடு நீட்டிப்புகளுக்கு அப்பால், ஒரு வணிக ரீதியான இழப்பை ஜி.இ நிறுவனத்திற்கு ஏற்படுத்துவதன் மூலம் மட்டுமே அவர்களை செயல்பட வைக்க முடியும் என்று பாதுகாப்பு வல்லுநர்கள் கருதுகின்றனர். இது இந்திய அரசாங்கம் மற்றும் எச்.ஏ.எல் நிறுவனத்தின் ஒரு துணிச்சலான மற்றும் அவசியமான நகர்வாகும்.
இருப்பினும், இந்த அபராதம் மட்டுமே ஜி.இ நிறுவனத்தை தடம் மாற்ற செய்யுமா என்பது ஒரு பெரிய கேள்விக்குறியாகவே உள்ளது. ஏனெனில், அமெரிக்காவின் பெரும் இராணுவ தொழில் நிறுவனங்கள் அந்த நாட்டு அரசாங்கத்தின் கொள்கை பிடியிலேயே இயங்குகின்றன. ஒருவேளை எஞ்சின் விநியோகம் இதே வேகத்தில் தொடர்ந்தால், இந்தியா ஆர்டர் செய்துள்ள 180-க்கும் மேற்பட்ட விமானங்களுக்கு எஞ்சின் வந்து சேரவே 30 ஆண்டுகள் ஆகிவிடும். இது தேஜஸ் திட்டத்தின் நோக்கத்தையே சிதைத்துவிடும். எனவே, இந்தியா வெறும் அபராதத்துடன் நின்றுவிடாமல், மாற்று திட்டங்களை நோக்கி நகர வேண்டிய கட்டாயத்தில் உள்ளது.
இந்த சூழலில், இந்தியாவின் உள்நாட்டு தயாரிப்பான காவேரி எஞ்சின் மீதான கவனத்தை மீண்டும் திருப்ப வேண்டியது அவசியம். காவேரி ட்ரை எஞ்சினுடன், பிரம்மோஸ் ஏரோஸ்பேஸ் தயாரித்துள்ள ‘ஆஃப்டர் பர்னர்’ தொழில்நுட்பத்தை இணைப்பதன் மூலம் சுமார் 80-81 கிலோநியூட்டன் உத்வேகத்தை உருவாக்க முடியும் என்று சோதனைகள் காட்டுகின்றன. இது ஜி.இ எஞ்சினுக்கு ஒரு தற்காலிக மாற்றாகவோ அல்லது தேஜஸின் ஒரு குறிப்பிட்ட பதிப்பிற்கோ பயன்படுத்தப்படலாம். மேலும், டி.ஆர்.டி.ஓ மற்றும் எச்.ஏ.எல் இணைந்து இந்தத் திட்டத்திற்கு அதிக நிதியை ஒதுக்கி, போர்க்கால அடிப்படையில் உள்நாட்டு எஞ்சின் உற்பத்தியை மேம்படுத்த வேண்டும்.
இறுதியாக, சர்வதேச அரசியல் சதுரங்கத்தில் இந்தியா ஒரு ‘வாடிக்கையாளர்’ என்ற நிலையிலிருந்து மாறி ஒரு ‘பங்குதாரராக’ தன்னை நிலைநிறுத்திக் கொள்ள வேண்டும். ரஃபேல் அல்லது சுகோய்-57 போன்ற பிற நாட்டு விமான ஒப்பந்தங்களை இந்தியா கையாளும் விதத்தை பொறுத்தே ஜி.இ போன்ற நிறுவனங்கள் தங்கள் விநியோக வேகத்தை மாற்றியமைக்கும். வெறும் விமானங்களின் கூடுகளை மட்டும் தயாரித்து வைத்துவிட்டு எஞ்சினுக்காக காத்திருப்பது இந்திய பாதுகாப்பிற்கு நல்லதல்ல. எனவே, உள்நாட்டு எஞ்சின் ஆராய்ச்சிக்கு முன்னுரிமை அளிப்பதும், அதே சமயம் ஜி.இ நிறுவனத்திற்கு வணிக ரீதியான அழுத்தத்தை தொடர்ந்து கொடுப்பதும் மட்டுமே 2026-க்குள் தேஜஸ் திட்டத்தை முழுமையாக செயல்பாட்டுக்குக் கொண்டு வர உதவும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
