தமிழக சட்டமன்ற தேர்தல் தேதி நெருங்கி வரும் நிலையில், தற்போதைய பேசுபொருளாக மாறியிருப்பது நடிகர் விஜய்யின் தமிழக வெற்றிக் கழகம் குறித்த மர்மம் கலந்த எதிர்பார்ப்புதான். வாரந்தோறும் பல்வேறு ஊடகங்களும், தனியார் நிறுவனங்களும் கருத்துக்கணிப்புகளை வெளியிட்டு வந்தாலும், விஜய்க்கு சரியாக எத்தனை சதவீத வாக்குகள் கிடைக்கும் என்பதை யாராலும் துல்லியமாக கணிக்க முடியவில்லை. ஒவ்வொரு கணிப்பும் ஒவ்வொரு விதமான முடிவுகளை தருவது அரசியல் வட்டாரங்களில் பெரும் குழப்பத்தையும், அதேசமயம் ஒருவித அச்சத்தையும் ஏற்படுத்தியுள்ளது. இந்த நிச்சயமற்ற நிலைதான் திராவிட கட்சிகளின் தூக்கத்தை தொலைக்க செய்துள்ளது.
விஜய்யின் அரசியல் வருகையை தொடக்கத்தில் சாதாரணமாக பார்த்த ‘உடன்பிறப்புகளும்’ ‘ரத்தத்தின் ரத்தங்களும்’ இப்போது நிதர்சனத்தை புரிந்து கொண்டு புலம்ப தொடங்கியுள்ளனர். “என்னதான்யா இருக்கு உன்கிட்ட?” என்று எதிர்தரப்பினரே கேட்கும் அளவுக்கு விஜய்யின் செல்வாக்கு தரைமட்ட அளவில் ஊடுருவியுள்ளது. குறிப்பாக, கட்சியின் பெயர் சொன்னாலே உயிரை கொடுக்க தயாராக இருக்கும் இளைஞர் பட்டாளம் மற்றும் அமைதியாக மாற்றத்தை விரும்பும் பொதுமக்களின் ஆதரவு, கருத்துக்கணிப்புகளுக்குள் சிக்காமல் தப்பித்து விடுகிறது. இது ஒரு சைலன்ட் வேவ் ஆக உருவெடுத்துள்ளதா என்ற கேள்வி எழுந்துள்ளது.
கருத்துக்கணிப்புகள் ஏன் தோல்வியடைகின்றன என்பதற்கு பின்னால் ஒரு முக்கியமான உளவியல் காரணம் இருப்பதாக அரசியல் ஆய்வாளர்கள் கருதுகின்றனர். பாரம்பரியமாக திராவிடக் கட்சிகளுக்கு வாக்களிக்கும் வாக்காளர்கள், வெளிப்படையாக தங்கள் ஆதரவை தெரிவிக்கும்போது, விஜய்யின் ஆதரவாளர்கள் பெரும்பாலும் ‘மவுன வாக்காளர்களாக’ இருக்கின்றனர். அவர்கள் தங்களது முடிவை தேர்தல் நாளில் வாக்குச்சாவடியில் மட்டுமே காட்க் காத்திருக்கின்றனர். இந்த மர்மமான மவுனம் தான், அரசியல் அனுபவம் வாய்ந்த பழைய கட்சிகளின் தேர்தல் வியூகங்களை கேள்விக்குறியாக்கி வருகிறது.
விஜய்யின் பலம் என்பது வெறும் சினிமா பிரபலம் மட்டுமல்ல, அது திராவிட கட்சிகள் மீது நிலவும் நீண்டகால அதிருப்தியின் வடிகாலாகவும் பார்க்கப்படுகிறது. “ஒவ்வொரு முறையும் இவர்களுக்கே வாக்களித்து என்ன பயன்?” என்று நினைக்கும் ஒரு புதிய தலைமுறை, விஜய்யை ஒரு மாற்று சக்தியாக பார்க்கிறது. இந்த தலைமுறை வாக்காளர்களின் எண்ணவோட்டத்தை கணிப்பது சாதாரண கருத்துக்கணிப்புகளால் சாத்தியமற்றது. மக்கள் என்ன செய்ய காத்திருக்கிறார்கள் என்பது ஒரு புரியாத புதிராகவே நீடிக்கிறது, இது ஆளுங்கட்சி மற்றும் எதிர்க்கட்சி என இருதரப்பையுமே ஒருவித தற்காப்பு நிலைக்கு தள்ளியுள்ளது.
இந்த அரசியல் குழப்பத்தின் நடுவே, விஜய்யின் தவெக கட்சி தனது கட்டமைப்பை தீவிரமாக பலப்படுத்தி வருகிறது. ஒவ்வொரு பூத் அளவிலும் இளைஞர்களை திரட்டி, அவர்கள் மூலம் ரகசியமாக தகவல்களை சேகரித்து வருகிறது. திராவிட கட்சிகளின் கோட்டையாக கருதப்படும் மாவட்டங்களில் கூட, விஜய்யின் ஆதரவு தளம் வலுவாக இருப்பது தற்போதைய கள ஆய்வுகளில் தெரிய வந்துள்ளது. இந்த களம் வெறும் சதவீத கணக்குகளை தாண்டி, ஒரு உணர்வுப்பூர்வமான போராட்டமாக மாறி வருவதை அரசியல் விமர்சகர்கள் சுட்டிக்காட்டுகின்றனர்.
இறுதியாக, 2026 தேர்தல் முடிவு என்பது தமிழக வரலாற்றில் ஒரு மிகப்பெரிய ஆச்சரியத்தை கொடுக்க போகிறது என்பது மட்டும் உறுதி. புலம்பும் பாரம்பரிய கட்சியினருக்கு பதில் சொல்லும் விதமாக, மக்களின் உண்மையான தீர்ப்பு வாக்கு எண்ணிக்கை நாளன்றுதான் வெளிச்சத்திற்கு வரும். அதுவரை கருத்துக்கணிப்புகள் வெறும் காகித புலியாகவே இருக்கும். தமிழகத்தின் அரசியல் திசையை தீர்மானிக்க போவது அந்த மவுன புரட்சியா அல்லது வழக்கமான திராவிட அரசியலா என்பதை பொறுத்திருந்துதான் பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
