தமிழக அரசியலில் நடிகர் விஜய் தொடங்கியுள்ள தமிழக வெற்றி கழகம் ஏற்படுத்தப்போகும் தாக்கம் குறித்து அரசியல் வட்டாரங்களில் தற்போதே விவாதங்கள் அனல் பறக்கின்றன. விஜய் ஒரு நகரத்தை சார்ந்த நடிகர் என்றும், அவரின் செல்வாக்கு சென்னை, கோவை போன்ற பெருநகரங்களோடு நின்றுவிடும் என்றும் விமர்சனங்கள் முன்வைக்கப்படுகின்றன. ஆனால், சினிமா என்பது தமிழகத்தின் பட்டிதொட்டியெங்கும் நீக்கமற நிறைந்திருக்கும் ஒரு கலை வடிவம் என்பதை நாம் மறந்துவிடக்கூடாது. எம்.ஜி.ஆர் காலம் தொட்டே, திரைத்துறையினருக்கான உண்மையான கொண்டாட்ட மனநிலையும் ஆதரவும் கிராமப்புறங்களில்தான் அதிகம் இருந்துள்ளது. எனவே, விஜய் என்ற பிம்பம் சாதி, மதம் கடந்து, கிராமப்புற இளைஞர்களிடமும் பெண்களிடமும் ஒரு மிகப்பெரிய எதிர்பார்ப்பை உருவாக்கியுள்ளது என்பதில் ஐயமில்லை.
விஜய் முன்வைக்கும் “வீட்டுக்கு ஒரு ஓட்டு” என்ற அரசியல் முழக்கம் வெறும் கவர்ச்சிகரமான வாசகம் மட்டுமல்ல, அது ஒரு ஆழமான புள்ளிவிவர அடிப்படையை கொண்டது. தமிழகத்தில் சுமார் ஒன்னே முக்கால் கோடி வீடுகள் மற்றும் இரண்டு கோடிக்கும் அதிகமான ரேஷன் அட்டைகள் உள்ளன. ஒரு வீட்டில் பல ஓட்டுகள் இருந்தாலும், குறைந்தது ஒரு நபர் விஜய்க்கு வாக்களிக்க முன்வந்தால் கூட, அது ஒரு மிகப்பெரிய வாக்கு வங்கியை அவருக்கு பெற்றுத்தரும். இன்றைய சூழலில் குழந்தைகள் மற்றும் இளைஞர்கள் தங்களின் குடும்ப உறுப்பினர்களிடம் அரசியலை பற்றி அதிகம் உரையாடுகிறார்கள். இந்த அணுகுமுறை குடும்பங்களுக்குள் ஒரு அரசியல் மாற்றத்தை விதைக்கக்கூடும் என்பதால், விஜய்யின் இந்த வியூகம் தேர்தல் களத்தில் பலத்த போட்டியை உருவாக்கும் என்று எதிர்பார்க்கப்படுகிறது.
அரசியல் கட்சிகளுக்கு நிர்வாக கட்டமைப்பும் நிரந்தர சின்னமும் மிக அவசியம் என்று ஒரு பொதுவான கருத்து நிலவுகிறது. ஆனால், சின்னம் ஒரு மேட்டரே இல்லை என்பதை டிடிவி தினகரன் ஆர்கே நகரில் ஜெயித்து அதெல்லாம் ஒன்றுமே இல்லை என நிரூபித்தார். அந்த தேர்தலில் பாரம்பரிய சின்னமும், நிர்வாக கட்டமைப்பும் வைத்திருந்த திமுக டெபாசிட் இழந்தது. எனவே கட்சியின் கட்டமைப்பை விட, ஒரு தலைவரின் மீதான ஈர்ப்பும் அவர் பேசும் கொள்கைகளும் மக்களை சென்றடைகிறதா என்பதே முக்கியம். பலமுறை சட்டமன்ற உறுப்பினர்களாக இருந்தவர்களே கூட தங்கள் தொகுதியை மாற்ற அஞ்சும் சூழலில், விஜய் போன்ற ஒரு புதிய தலைவர் மாநிலம் தழுவிய அளவில் ஒரு தன்னம்பிக்கையுடன் களமிறங்குவது கவனிக்கத்தக்கது. தேர்தல் என்பது வெறும் நிர்வாக ரீதியிலான ஆட்டம் மட்டுமல்ல, அது மக்களின் மனநிலை சார்ந்தது என்பதை அவர் நன்குணர்ந்துள்ளார்.
தமிழகத்தின் தேர்தல் வரலாறு என்பது எப்போதும் ஒரு தெளிவான பெரும்பான்மை அரசாங்கத்தையே தேர்ந்தெடுத்து வந்துள்ளது. திமுக, அதிமுக போன்ற திராவிட பேரியக்கங்கள் பலமாக இருந்தாலும், மக்கள் ஒரு மாற்றத்தை விரும்பினால் அது ஒட்டுமொத்த மாநிலத்திற்கும் பொதுவான முடிவாகவே இருக்கும். வரும் 2026 சட்டமன்ற தேர்தலில் திமுக, அதிமுக, தவெக மற்றும் நாம் தமிழர் கட்சி என நான்கு முனை போட்டி நிலவுவதற்கான வாய்ப்புகள் அதிகம். இந்த போட்டியில் விஜய் முதலிடத்தை பிடித்து முதலமைச்சராகவோ அல்லது பிரதான எதிர்க்கட்சி தலைவராகவோ உருவெடுப்பதற்கான சாத்தியக்கூறுகள் உள்ளன. தமிழக மக்கள் அரசியல் தெளிவு மிக்கவர்கள் என்பதால், தொங்கு சட்டசபை ஏற்பட வாய்ப்பில்லை என்றே அரசியல் விமர்சகர்கள் கருதுகின்றனர்.
விஜய்யின் அரசியல் நகர்வுகள் மிகவும் நிதானமாகவும் திட்டமிட்டபடியும் இருப்பதாக தெரிகிறது. அவர் எப்போது பேச வேண்டும், எப்போது மௌனமாக இருக்க வேண்டும் என்பதில் தெளிவான புரிதலை கொண்டுள்ளார். திரைத்துறையில் இத்தனை ஆண்டுகள் முதலிடத்தில் இருந்த ஒரு நபர், தனது புகழை பணயம் வைத்து அரசியலுக்கு வருவதற்கு தனி துணிச்சல் வேண்டும். அவர் இணையதளத்தையும் சமூக ஊடகங்களையும் தனது பரப்புரைக்கு ஒரு வலுவான ஆயுதமாக பயன்படுத்துகிறார். அடுத்த சில நாட்களில் அவர் மேற்கொள்ளவிருக்கும் பயணங்கள் மற்றும் பொதுக்கூட்டங்கள் அவரது அரசியல் வலிமையை இன்னும் அதிகப்படுத்தும். ஒரு தெளிந்த பார்வையுடன் அவர் களமிறங்கியிருப்பது, பாரம்பரிய அரசியல் கட்சிகளுக்கு ஒரு சவாலாகவே அமையும்.
தேர்தல் முடிவுகள் மே மாதம் வெளியாகும்போதுதான் உண்மையான நிலவரம் தெரியும் என்றாலும், தற்போதைய களம் மிகவும் நெருக்கமான போட்டியை கொண்டுள்ளது. பெரிய கட்சிகளின் நிழலில் விஜய் காணாமல் போய்விடுவார் என்ற வாதத்தை அவரது தற்போதைய எழுச்சி பொய்யாக்கி வருகிறது. திரையுலகிலிருந்து வந்த முந்தைய தலைவர்களை போல விஜய்யும் ஒரு வரலாற்று மாற்றத்தை நிகழ்த்துவாரா என்பது மில்லியன் டாலர் கேள்வியாக உள்ளது. எது எப்படியிருப்பினும், தமிழக அரசியல் தளம் ஒரு புதிய திசையை நோக்கி நகர்ந்து கொண்டிருக்கிறது என்பது மட்டும் நிதர்சனம். விஜய்யின் வருகை மற்ற கட்சிகளையும் தங்கள் வியூகங்களை மாற்றியமைக்கக் கட்டாயப்படுத்தியுள்ளது, இது ஆரோக்கியமான ஜனநாயக போட்டிக்கு வழிவகுக்கும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
