தமிழக அரசியல் களம் தேர்தல் சூட்டை எட்டியுள்ள நிலையில், விஜய் தலைமையிலான தமிழக வெற்றிக் கழகம் தனது முதற்கட்ட வேட்பாளர் பட்டியலை தயார் செய்துள்ளது. கட்சியின் பொதுச்செயலாளர் புஸ்ஸி ஆனந்த், சுமார் 60 வேட்பாளர்கள் கொண்ட இந்த பட்டியலை மேல்மலையனூர் அங்காளம்மன் கோயிலில் வைத்து சிறப்பு பூஜை செய்துள்ளார். மற்ற பிரதான கட்சிகள் வேட்பாளர் தேர்வில் நிதானம் காட்டி வரும் வேளையில், முன்கூட்டியே பட்டியலை வெளியிட்டு தேர்தல் பணிகளில் ஒரு படி முன்னால் இருக்க விஜய் திட்டமிட்டுள்ளார். இது அக்கட்சி தொண்டர்களிடையே ஒருவித உற்சாகத்தை ஏற்படுத்தினாலும், உட்கட்சிக்குள் சில சலசலப்புகளும் வெடிக்கத் தொடங்கியுள்ளன.
வேட்பாளர் தேர்வில் யாருக்கு முன்னுரிமை அளிப்பது என்பதில் புஸ்ஸி ஆனந்திற்கும் மற்ற நிர்வாகிகளுக்கும் இடையே ஒரு பெரிய யுத்தமே நடப்பதாக கூறப்படுகிறது. விஜய் மக்கள் இயக்கத்தின் ஆரம்பக்காலத்திலிருந்தே உழைத்தவர்களுக்கு தான் சீட் வழங்க வேண்டும் என்பதில் புஸ்ஸி ஆனந்த் உறுதியாக இருக்கிறார். ஆனால், சில முக்கிய நிர்வாகிகள் சிபாரிசு அடிப்படையில் வந்தவர்களுக்கு வாய்ப்பு அளிக்க அழுத்தம் கொடுப்பதால், வேட்பாளர்களை இறுதி செய்வதில் பெரும் குழப்பம் நிலவுகிறது. இரண்டாம் கட்ட பட்டியலிலாவது தங்கள் இயக்கத்தை சேர்ந்தவர்களுக்கு முன்னுரிமை கிடைக்குமா என்ற எதிர்பார்ப்பில் பழைய நிர்வாகிகள் காத்திருக்கின்றனர்.
மறுபக்கம், ஆளுங்கட்சியான திமுக, விஜய்க்கு எதிராக தனது தேர்தல் வியூகங்களை ரகசியமாக வகுக்க தொடங்கியுள்ளது. குறிப்பாக, சிறுபான்மையின வாக்குகளை தக்க வைத்துக் கொள்ளும் நோக்கில், பல்வேறு தேவாலயங்கள் மற்றும் வழிபாட்டு தலங்கள் வழியாக பிரசாரத்தைத் தீவிரப்படுத்தியுள்ளது. “தேர்தலுக்கு பின் பாஜகவுடன் தவெக கூட்டணி வைக்க போகிறது” என்ற செய்தியை முன்னிறுத்தி, சிறுபான்மையினர் மத்தியில் ஒருவித அச்சத்தை உருவாக்க திமுக தரப்பு முயற்சிப்பதாக தெரிகிறது. இது விஜய்யின் அரசியல் நகர்வுகளுக்கு ஒரு மிகப்பெரிய சவாலாக உருவெடுத்துள்ளது.
இந்த குற்றச்சாட்டுகளை முறியடிக்கவே சமீபத்தில் நடைபெற்ற இஃப்தார் நிகழ்ச்சியில் பாஜகவிற்கு எதிராக விஜய் மிகவும் காட்டமாக பேசியிருந்தார். தனது கட்சிக்கும் பாஜகவிற்கும் எந்த தொடர்பும் இல்லை என்பதை தெளிவுபடுத்த அவர் முயன்றாலும், திமுகவின் பிரசாரம் தென் மாவட்டங்களில் பலமாக எதிரொலிக்கிறது. “விஜய்க்கு வாக்களித்தால் அது மறைமுகமாக பாஜகவிற்கு தான் பலம் சேர்க்கும்” என்ற கருத்து தேவாலயங்கள் தோறும் பரப்பப்படுவதால், சிறுபான்மையின வாக்காளர்கள் மத்தியில் ஒருவித குழப்பமான சூழல் நிலவுகிறது.
தென் மாவட்டங்களிலுள்ள தேவாலயங்களில், “நமது வாக்குகளை சிந்தாமல் திமுகவிற்கே போட வேண்டும்” என்ற பிரசாரம் வேகமெடுத்துள்ளது. ஒருவேளை பாஜக கூட்டணி வெற்றி பெற்றால் சபைகளை நடத்துவதற்கே சிக்கல் ஏற்படும் என்ற ரீதியில் அச்சமூட்டும் பிரசாரங்கள் முன்னெடுக்கப்படுவதாக கூறப்படுகிறது. விஜய்யின் அரசியல் வருகை திமுகவின் வாக்கு வங்கியில் ஒரு பெரிய ஓட்டையை ஏற்படுத்தும் என்பதால், அந்த ஓட்டையை அடைக்க இப்போதே இத்தகைய மத ரீதியான அணுகுமுறைகளை திமுக கையில் எடுத்துள்ளதாக அரசியல் விமர்சகர்கள் கருதுகின்றனர்.
இறுதியாக, விஜய்யின் தமிழக வெற்றி கழகம் ஒரே நேரத்தில் உட்கட்சிப் பூசல் மற்றும் எதிர்க்கட்சிகளின் மறைமுக தாக்குதல் என இரண்டு முனைகளில் போராட வேண்டியுள்ளது. இத்தகைய முட்டுக்கட்டைகளை தாண்டி விஜய் எப்படி தனது வெற்றி கணக்கை ஆரம்பிக்கப் போகிறார் என்பதே இப்போதைய மில்லியன் டாலர் கேள்வி. தேர்தல் நெருங்க நெருங்க இந்த அரசியல் ஆடுபுலி ஆட்டம் இன்னும் விறுவிறுப்பாக மாறும் என்பதில் சந்தேகமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
