மத்திய கிழக்கில் போர் மேகங்கள் ஆறாவது நாளாக சூழ்ந்துள்ள நிலையில், அங்கிருக்கும் பிரிட்டிஷ் குடிமக்களை மீட்பதற்காக ஏற்பாடு செய்யப்பட்ட முதல் அரசு விமானம் ரத்து செய்யப்பட்டிருப்பது பெரும் பதற்றத்தையும் குழப்பத்தையும் ஏற்படுத்தியுள்ளது.
ஓமன் தலைநகர் மஸ்கட்டில் இருந்து நேற்று இரவு 11 மணிக்கு கிளம்ப வேண்டிய இந்த சிறப்பு விமானம், தொழில்நுட்ப கோளாறு மற்றும் விமானியின் பணி நேரம் முடிவடைந்ததன் காரணமாக தரையிறக்கப்பட்டதாக அறிவிக்கப்பட்டது. இதனால் ஆத்திரமடைந்த பயணிகள் விமான ஜன்னல்களை தட்டியும், கதறி கொண்டும் தங்களின் அதிருப்தியை வெளிப்படுத்தினர். பாதுகாப்பான இடத்திற்கு செல்ல காத்திருந்த பலருக்கு இந்த தாமதம் பெரும் அச்சத்தை ஏற்படுத்தியுள்ளது.
இந்த மீட்பு நடவடிக்கை ஒரு முழுமையான குளறுபடி என்று அதில் பயணம் செய்யவிருந்த பயணிகள் கடுமையாக விமர்சித்துள்ளனர். சுமார் நான்கு மணி நேர சோதனைக்கு பிறகு விமானத்தில் ஏறிய பயணிகள், மீண்டும் 90 நிமிடங்கள் காத்திருக்க வைக்கப்பட்டு, இறுதியில் விமானம் கிளம்பாது என்று கூறி இறக்கிவிடப்பட்டுள்ளனர். போர் தீவிரமடைந்து வரும் சூழலில், விமானிக்கு ஓய்வு தேவை என்ற காரணத்தை கூறி விமானத்தை நிறுத்தியது பயணிகளிடையே பீதியையும், சிலருக்கு மனஉளைச்சலையும் ஏற்படுத்தியுள்ளது. பிரிட்டிஷ் வெளியுறவுத்துறை அமைச்சகம் இது தொழில்நுட்ப கோளாறு என்று கூறினாலும், தரைமட்டத்தில் நிலவும் குழப்பம் இன்னும் தீர்ந்தபாடில்லை.
பிரிட்டிஷ் அரசு இன்று தனது அடுத்தகட்ட மீட்பு விமானங்களை தொடங்கும் என்று எதிர்பார்க்கப்படும் வேளையில், கத்தார் ஏர்வேஸ் நிறுவனம் ஐரோப்பாவிற்கு கூடுதல் நிவாரண விமானங்களை இயக்க போவதாக அறிவித்துள்ளது. இருப்பினும், வான்பரப்பில் நிலவும் போர்ச்சூழல் மற்றும் விமான நிலையங்கள் அருகேயுள்ள குண்டுவெடிப்புகள் இந்த மீட்பு பணிகளைப் பெரும் சவாலாக மாற்றியுள்ளன. தங்கள் நாட்டு மக்களை காப்பாற்ற வல்லரசு நாடுகள் போராடி வரும் அதே வேளையில், மத்திய கிழக்கு பிராந்தியம் முழுமையாக போரின் பிடியில் சிக்கி தவிக்கிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
