மத்திய கிழக்கில் போர் மேகங்கள் ஆறாவது நாளாக சூழ்ந்துள்ள நிலையில், ஈரானின் ஏவுகணைகள் இலக்கு தவறி அண்டை நாடுகளில் விழுந்து வரும் அதிர்ச்சியூட்டும் காட்சிகள் வெளியாகியுள்ளன. சிரியாவின் கிழக்கு எல்லை பகுதியான கமிஷ்லி நகருக்கு வெளியே உள்ள ஒரு ஆட்டு மந்தை வெளியில், வெடிக்காத ஈரானிய ஏவுகணை ஒன்று தலைகீழாக புதைந்து கிடக்கும் புகைப்படங்கள் உலகையே உலுக்கியுள்ளன. கடந்த சனிக்கிழமை ஈரானின் உயர்மட்டத் தலைவர் அயதுல்லா அலி காமேனி கொல்லப்பட்டதற்கு பதிலடியாக ஈரான் ஏவிய ஆயிரக்கணக்கான ஏவுகணைகளில் இதுவும் ஒன்று. ஆனால், இஸ்ரேலை நோக்கி ஏவப்பட்ட இந்த ஏவுகணை, தொழில்நுட்ப கோளாறு காரணமாக சிரியாவின் புல்வெளியில் விழுந்து செயலிழந்து கிடக்கிறது.
இந்த ஏவுகணை விழுந்த இடத்தை சுற்றி மேய்ந்து கொண்டிருந்த ஆடுகள் மற்றும் அங்கிருந்த சிறுவர்கள் காட்டிய அலட்சியம் பார்ப்போரை உறைய வைக்கிறது. சுமார் 90 கிலோ வெடிமருந்துகளை சுமந்து செல்லும் திறன் கொண்ட இந்த ‘ஷாஹித்’ ரக ட்ரோன் ஏவுகணையின் ஆபத்தை புரியாமல், அந்த சிறுவர்கள் அதை தொட்டு பார்த்தும், அதன் மீது ஏறியும் விளையாடியுள்ளனர். சுமார் 1,600 மைல் தொலைவில் உள்ள இலக்கை தாக்கும் வல்லமை கொண்ட இந்த ஏவுகணை, ஏதேனும் ஒரு சிறிய அதிர்வால் வெடித்திருந்தால் அந்த இடமே சுடுகாடாக மாறியிருக்கும். போரின் கொடூரங்களுக்கு மத்தியில் பொதுமக்களின் பாதுகாப்பற்ற நிலைமைக்கு இது ஒரு சான்றாக அமைந்துள்ளது.
ஈரான் தனது பதிலடி தாக்குதல்களை தற்போது விரிவுபடுத்தியுள்ளது. இஸ்ரேல், ஐக்கிய அரபு அமீரகம், குவைத், கத்தார் மற்றும் பஹ்ரைன் ஆகிய நாடுகளில் உள்ள அமெரிக்க தளங்களைக் குறிவைத்து ஏவுகணைகளை ஏவி வருகிறது. குறிப்பாக, சைப்ரஸில் உள்ள பிரிட்டனின் ஆர்.ஏ.எஃப் அக்ரோதிரி விமான தளத்தையும் ஈரான் தனது இலக்காக மாற்றியுள்ளது. துருக்கியின் வான்பரப்பிற்குள் நுழைந்த ஈரானிய ஏவுகணை ஒன்றை நேட்டோ படைகள் சுட்டு வீழ்த்தியுள்ளன. சிரியா தனது வான்பரப்பை மூடியுள்ள போதிலும், அதன் எல்லைக்குள் விழுந்து கிடக்கும் இத்தகைய ஏவுகணை சிதறல்கள் அண்டை நாடுகளின் அச்சத்தை அதிகரித்துள்ளன.
ஐக்கிய அரபு அமீரகத்தில் நிலமை மிகவும் மோசமடைந்துள்ளது. துபாயின் அடையாளங்களாக திகழும் பூர்ஜ் அல் அரப் மற்றும் பாம் ஜுமேராவில் உள்ள ஃபேர்மாண்ட் ஹோட்டல்கள் மீது ட்ரோன் தாக்குதல்கள் நடத்தப்பட்டுள்ளன. துபாய் மற்றும் அபுதாபி சர்வதேச விமான நிலையங்கள் மீதும் தாக்குதல்கள் நடத்தப்பட்டுள்ளதால், வான்வழி போக்குவரத்து முற்றிலும் முடங்கியுள்ளது. அபுதாபி ஜயீத் விமான நிலையத்தில் நடந்த தாக்குதலில் ஒருவர் உயிரிழந்ததாக தகவல்கள் தெரிவிக்கின்றன. இதன் காரணமாக ஆயிரக்கணக்கான வெளிநாட்டு சுற்றுலா பயணிகள் மற்றும் பிரிட்டன் குடிமக்கள் அமீரகத்தில் சிக்கி தவித்து வருகின்றனர்.
மொத்தத்தில் வான்பரப்பில் ஏவுகணைகள் மோதி கொள்வதும், நிலப்பரப்பில் அவை இலக்கு தவறி விழுவதும் ஒரு மிகப்பெரிய மனித பேரழிவை நோக்கி உலகை தள்ளியுள்ளது. ஒருபுறம் வல்லரசு நாடுகளின் ராணுவ நகர்வுகள், மறுபுறம் உயிருக்கு பயந்து தவிக்கும் அப்பாவி மக்கள் என மத்திய கிழக்கு பிராந்தியம் ஒரு எரிமலையாக காட்சியளிக்கிறது. சிரியாவின் புல்வெளியில் புதைந்து கிடக்கும் அந்த ஏவுகணை, எந்த நேரத்திலும் வெடிக்க காத்திருக்கும் இந்த உலகப் போரின் ஒரு குறியீடாகவே பார்க்கப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
