அமெரிக்கா மற்றும் இஸ்ரேல் படைகள் ஈரானுக்கு எதிராக தொடுத்துள்ள போர் நான்காவது நாளை எட்டியுள்ள நிலையில், பதிலடியாக ஐக்கிய அரபு அமீரகத்தின் முக்கிய எண்ணெய் சுத்திகரிப்பு நிலையங்கள் மற்றும் கத்தாரில் உள்ள மிகப்பெரிய அமெரிக்க ராணுவத் தளம் மீது ஈரான் ட்ரோன் தாக்குதல்களை நடத்தியுள்ளது. மத்திய கிழக்கின் முன்னணி எண்ணெய் வர்த்தக மையமாக கருதப்படும் Fujairah எண்ணெய் மண்டலத்தில், இடைமறிக்கப்பட்ட ட்ரோன்களின் பாகங்கள் விழுந்ததால் பயங்கர தீ விபத்து ஏற்பட்டது. இருப்பினும், இந்த தீ உடனடியாக கட்டுக்குள் கொண்டு வரப்பட்டதாகவும், உயிர்ச்சேதம் ஏதுமின்றி பணிகள் வழக்கம் போல் நடைபெறுவதாகவும் அதிகாரிகள் தெரிவித்துள்ளனர்.
மறுபுறம், சவூதி அரேபியாவில் உள்ள அமெரிக்க தூதரகத்தின் மீது இரண்டு ட்ரோன்களை ஏவி தாக்கிய ஈரான், தற்போது கத்தாரில் அமைந்துள்ள மத்திய கிழக்கின் மிகப்பெரிய அமெரிக்க படைத்தளமான அல்-உடைத் விமான நிலையத்தை குறிவைத்துத் தாக்குதல்களை தீவிரப்படுத்தியுள்ளது. இந்த தாக்குதல்கள் வளைகுடா நாடுகளில் உள்ள அமெரிக்க மற்றும் இஸ்ரேலிய நலன்களுக்கு பெரும் அச்சுறுத்தலாக மாறியுள்ளன. இதற்கிடையில், தெற்கு லெபனானில் உள்ள ஹிஸ்புல்லா போராளிகளை முற்றிலுமாக ஒழிக்கும் நோக்கில், இஸ்ரேலிய ராணுவம் தரைவழி தாக்குதலைத் தொடங்கியுள்ளது.
அமெரிக்க அதிபர் டொனால்ட் டிரம்ப், ஈரானுக்கு எதிரான இந்த போருக்கு போதிய ஆதரவு அளிக்காத பிரிட்டிஷ் பிரதமர் கீர் ஸ்டார்மரை கடுமையாக சாடியுள்ளார். ஸ்டார்மரின் இத்தகைய அணுகுமுறை அமெரிக்கா – பிரிட்டன் இடையிலான உறவை ஆபத்தில் ஆழ்த்தியுள்ளதாக டிரம்ப் குற்றம் சாட்டியுள்ளார்.
இதற்கிடையில், ஓமன் வான்பரப்பில் ஊடுருவிய இரண்டு ஈரானிய ட்ரோன்களை அந்நாட்டு பாதுகாப்புப் படை சுட்டு வீழ்த்தியுள்ளது. மற்றொரு ட்ரோன் Salalah துறைமுகத்திற்கு அருகே விழுந்து நொறுங்கியது. இதில் எவ்வித உயிர்ச்சேதமும் ஏற்படவில்லை என்று ஓமன் செய்தி நிறுவனம் உறுதிப்படுத்தியுள்ளது.
ஈரானின் மிகப் பெரிய போர்க்கப்பலான ‘ஷாஹித் பாகேரி’ மீது அமெரிக்கா நடத்திய தாக்குதலில் அந்தக் கப்பல் முற்றிலுமாக அழிக்கப்பட்டுள்ளது. அமெரிக்க தளங்கள் மீதான ட்ரோன் தாக்குதல்களுக்கு ஒரு முக்கிய ஏவுதளமாக இந்த கப்பல் பயன்படுத்தப்பட்டு வந்தது. தொடக்கத்தில் ஒரு வணிக கப்பலாக இருந்து, 2022-ல் ட்ரோன்களை ஏவும் அதிநவீன போர்க்கப்பலாக மாற்றப்பட்ட இந்த கப்பலை ‘ஆபரேஷன் எபிக் ஃபியூரி’ தொடங்கிய சில மணி நேரங்களிலேயே அமெரிக்க படைகள் தரைமட்டமாக்கின.
அமெரிக்க விமானம் தாங்கி கப்பலை மூழ்கடித்துவிட்டதாக ஈரான் பரப்பி வரும் செய்திகளை அமெரிக்கா வன்மையாக மறுத்துள்ளது. ஈரானின் பொய் பிரச்சார இயந்திரம் உலகை ஏமாற்ற முயல்வதாகவும், உண்மையில் ஈரானின் ட்ரோன் தாங்கி கப்பல் மட்டுமே அமெரிக்க தாக்குதலில் மூழ்கடிக்கப்பட்டுள்ளது என்றும் அமெரிக்கா விளக்கம் அளித்துள்ளது. ஈரானிய தலைமை தனது தோல்விகளை மறைக்க இத்தகைய தவறான தகவல்களைப் பரப்பி வருவதாக குற்றம் சாட்டப்பட்டுள்ளது.
மத்திய கிழக்கு பிராந்தியத்தில் போர் மேலும் தீவிரமடைந்து வருவதால், பொதுமக்களின் குடியிருப்புகள் மற்றும் பொருளாதார உள்கட்டமைப்புகள் பெரும் பாதிப்புக்குள்ளாகி வருகின்றன. குறிப்பாக, வளைகுடா நாடுகளின் எண்ணெய் விநியோக கட்டமைப்பைக் குறிவைத்து நடத்தப்படும் இத்தகைய தாக்குதல்கள், உலகளாவிய எரிசக்தி சந்தையில் பெரும் குழப்பத்தை ஏற்படுத்தக்கூடும் என்று பொருளாதார நிபுணர்கள் எச்சரிக்கின்றனர். அமெரிக்கா மற்றும் இஸ்ரேலின் அடுத்தகட்ட நகர்வுகள் மற்றும் ஈரானின் தற்கொலைப்படை தாக்குதல்கள் இப்பகுதியை ஒரு முடிவில்லாத யுத்தத்திற்குள் தள்ளியுள்ளன.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
