மத்திய கிழக்கு பிராந்தியத்தில் போர் மேகங்கள் சூழ்ந்துள்ள நிலையில், ஈரானிய புரட்சிகர காவல் படை இன்னும் உயிர்ப்புடன் இருக்கிறதா அல்லது அதன் செயல்பாடுகள் முடக்கப்பட்டுவிட்டதா என்ற கேள்வி சர்வதேச பாதுகாப்பு வட்டாரங்களில் பலமாக எழுந்துள்ளது. அமெரிக்க அதிபர் டொனால்ட் டிரம்ப், ஈரானிய புரட்சிகர காவல் படை ஒன்று அமெரிக்க படைகளுடன் இணைய வேண்டும் அல்லது முற்றிலுமாக அழிக்கப்பட வேண்டும் என மிகக் கடுமையான எச்சரிக்கைகளை விடுத்து வருகிறார். டிரம்பின் இந்த அதிரடி அறிக்கைகள் ஒருபுறம் இருந்தாலும், கள நிலவரம் முற்றிலும் வேறாக இருப்பதாக ராணுவ ஆய்வாளர் மேஜர் ஜெனரல் ஜி.டி. பக்ஷி எச்சரிக்கிறார். டிரம்பின் அறிக்கைகள் வெறும் விருப்பங்களை சார்ந்தவையாக இருப்பதாகவும், ஆனால் ஈரானிய புரட்சிகர காவல் படை தரப்பில் இருந்து வரும் பதிலடி தாக்குதல்கள் மிகவும் துல்லியமாகவும், திட்டமிட்ட உத்தியுடனும் இருப்பதை அவர் சுட்டிக்காட்டுகிறார்.
ஈரானின் பதிலடி தாக்குதல்கள் இந்த முறை முன்னெப்போதும் இல்லாத வேகத்தில் நிகழ்ந்துள்ளதாக ஜி.டி. பக்ஷி குறிப்பிடுகிறார். கடந்த ஜூன் 2025-இல் நடந்த மோதலின் போது, ஈரான் பதிலளிக்க 18 மணிநேரம் எடுத்துக்கொண்டது. ஆனால், தற்போது ஒரு மணி நேரத்திற்குள்ளேயே ஈரான் தனது தாக்குதல்களை தொடங்கியுள்ளது. குறிப்பாக, இஸ்ரேலை விட அமெரிக்க ராணுவ தளங்களில் வான் பாதுகாப்பு அமைப்புகள் குறைவாக இருப்பதை உணர்ந்து, ஈரான் தனது இலக்குகளை அமெரிக்க தளங்களை நோக்கி திருப்பியுள்ளது. இது ஈரானின் ஒரு தெளிவான ராணுவ உத்தியாகவே பார்க்கப்படுகிறது. அமெரிக்காவின் இந்த “யுத்த யுக்தி மற்றும் வெற்றி கொண்டாட்டங்கள் தற்போதைய கள நிலவரத்திற்கு முரணானவை என்றும் அவர் எச்சரிக்கிறார்.
ஹார்முஸ் நீரிணையில் நிலவும் சூழல் மிகவும் அபாயகரமானதாக மாறியுள்ளது. அங்கு அமெரிக்க தளங்களுக்கு வான் பாதுகாப்பு வழங்கும் பணியில் மூன்று Arleigh Burke-class ரக அழிப்பான் கப்பல்கள் ஈடுபட்டுள்ளன. இவற்றில் ஒரு கப்பல் ஈரானால் வீழ்த்தப்பட்டால் கூட, அதில் இருக்கும் 250 முதல் 300 வீரர்களின் உயிரிழப்பு டொனால்ட் டிரம்பிற்கு மிகப்பெரிய அரசியல் மற்றும் ராணுவ நெருக்கடியை ஏற்படுத்தும். ஏற்கனவே ஒரு ஆதரவு கப்பலை தாக்கியுள்ளதாக IRGC உரிமை கோரியுள்ள நிலையில், ஹார்முஸ் நீரிணையில் நடக்கும் மோதல்கள் டிரம்பின் போக்கிற்கு பெரும் சவாலாக அமையும். ராணுவ வீரர்களை களமிறக்கும் டிரம்பின் திடீர் முடிவு அமெரிக்காவின் முந்தைய நிலைப்பாட்டிலிருந்து ஒரு பெரிய மாற்றமாகும்.
மறுபுறம், ஈரானின் உச்ச தலைவர் கமேனியின் இல்லத்தை குறிவைத்து அமெரிக்கா நடத்திய தாக்குதல்கள் குறித்த அதிரடி தகவல்கள் வெளியாகியுள்ளன. வால் ஸ்ட்ரீட் ஜர்னல் அறிக்கையின்படி, கமேனியின் இல்லத்தின் மீது சுமார் 30 முதல் 35 குண்டுகள் வீசப்பட்டுள்ளன. இதில் நிலத்தடி பதுங்கு குழிகளை துளைத்து சென்று அழிக்கும் ‘பங்கர் பஸ்டர்’ ரக குண்டுகளும் பயன்படுத்தப்பட்டுள்ளன. வாஷிங்டன் போஸ்ட் அறிக்கையின்படி, இந்த தாக்குதலை நடத்துமாறு இஸ்ரேல் மற்றும் சவுதி அரேபியா ஆகிய நாடுகள் டிரம்ப் நிர்வாகத்திற்குப் பெரும் அழுத்தம் கொடுத்ததாக தெரிகிறது. இத்தகைய தீவிரமான தாக்குதல்கள் ஈரானின் அதிகார மையத்தை நேரடியாக சிதைக்கும் நோக்கில் நடத்தப்பட்டுள்ளன.
இந்த மோதலால் இஸ்ரேலிய நகரங்களில் வான்வழி தாக்குதலுக்கான எச்சரிக்கை சைரன்கள் தொடர்ந்து ஒலித்துக் கொண்டே இருக்கின்றன. ஈரானிய புரட்சிகர காவல் படை தற்போதைய நிமிடம் வரை தனது எதிர்ப்பை தொடர்ந்து காட்டி வருகிறது. இது குறித்து கருத்து தெரிவித்துள்ள இஸ்ரேலுக்கான முன்னாள் இந்திய தூதர் வீரேந்திர குப்தா, இது இஸ்ரேலின் போரை விட அமெரிக்காவின் போராகவே அதிகம் தெரிவதாக குறிப்பிட்டுள்ளார். ராணுவ பராக்கிரமங்களால் நீண்ட கால அடிப்படையில் யாரும் வெற்றி பெற முடியாது என்றும், பேச்சுவார்த்தை மூலம் தீர்வு காண்பதற்கான வாய்ப்புகள் வழங்கப்பட்டிருக்க வேண்டும் என்றும் அவர் தனது கவலையைப் பகிர்ந்துள்ளார்.
மத்திய கிழக்கில் நிலவும் இந்த போர் சூழலைத் தணிக்க இந்தியா தொடர்ந்து வலியுறுத்தி வருகிறது. தன்னிச்சையான ராணுவ நடவடிக்கைகள் மற்றும் சர்வதேச விதிகளுக்குப் புறம்பான தாக்குதல்கள் எவ்விதத் தீர்வும் தராது என்பதே இந்தியாவின் நிலைப்பாடாகும். பேச்சுவார்த்தைக்கான கதவுகள் அடைக்கப்பட்டுள்ள நிலையில், இந்த போர் ஒரு நீண்டகால மோதலாக உருவெடுத்துள்ளது. அமெரிக்காவின் இந்த அதிரடி நடவடிக்கைகள் உலக அமைதிக்கு எத்தகைய பாதிப்புகளை ஏற்படுத்தும் என்பதை பொறுத்திருந்துதான் பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
