நடிகர் மற்றும் தமிழக வெற்றி கழகத்தின் தலைவர் விஜய், தனது அரசியல் பயணத்தில் மிகவும் நிதானமான, அதே சமயம் உறுதியான ஒரு பாதையை தேர்ந்தெடுத்துள்ளார். மற்ற அரசியல் தலைவர்களை போல அடிக்கடி செய்தியாளர்களை சந்திப்பதையோ அல்லது பேட்டிகள் அளிப்பதையோ அவர் முற்றிலுமாக தவிர்த்து வருகிறார். இதற்கு பின்னால் ஒரு ஆழமான அரசியலும், கடந்த கால கசப்பான அனுபவங்களும் இருப்பதாக அரசியல் விமர்சகர்கள் கருதுகின்றனர்.
செய்தியாளர்கள் கேட்கும் ‘ஏடாகூடமான’ கேள்விகள் மூலம் அவரை சிக்க வைக்கவோ அல்லது கோபப்படுத்தவோ ஊடகங்கள் ‘கண்கொத்திப் பாம்பாக’ காத்திருக்கின்றன என்பது விஜய்க்கு நன்றாக தெரியும். ஒரு சிறிய சறுக்கல் அல்லது ஒரு வார்த்தை பிசகினாலும், அது மிகப்பெரிய விவாதமாக மாற்றப்பட்டு அவருக்கு எதிராக திருப்பப்படும் என்பதை அவர் உணர்ந்துள்ளார். இதனால்தான், பொதுக்கூட்டங்களில் தான் சொல்ல வேண்டியதை மட்டும் பேசிவிட்டு, ஊடகங்களிடம் இருந்து ஒரு பாதுகாப்பான தூரத்தைப் பேணி வருகிறார்.
விஜய்யின் இந்த முடிவுக்கு மிக முக்கியமான காரணமாக மறைந்த கேப்டன் விஜயகாந்தின் அனுபவம் பார்க்கப்படுகிறது. ஆரம்பகாலத்தில் ஊடகங்களுடன் மிகவும் நெருக்கமாக இருந்த விஜயகாந்தை, ஒரு கட்டத்திற்கு பிறகு ஊடகங்கள் எப்படி கையாண்டன, அவருடைய சிறு கோபங்களை கூட எப்படி உருவகப்படுத்தின என்பதை விஜய் மிக அருகில் இருந்து பார்த்தவர். விஜயகாந்திற்கு ஏற்பட்ட அந்த ‘மீடியா நெகட்டிவிட்டி’ தனக்கு வந்துவிடக்கூடாது என்பதில் அவர் மிக தெளிவாக இருக்கிறார்.
தற்போதுள்ள சூழலில், தவெக தொண்டர்கள் மற்றும் மக்களிடம் நேரடியாக செல்வதையே விஜய் விரும்புகிறார். “செயல் பேசட்டும், வார்த்தைகள் அல்ல” என்ற கொள்கையில் அவர் உறுதியாக இருக்கிறார். முதல்வர் நாற்காலியில் அமர்ந்த பிறகுதான் முதல் அதிகாரப்பூர்வமான பத்திரிகையாளர் சந்திப்பை நடத்த வேண்டும் என்பதில் அவர் பிடிவாதமாக இருப்பதாக கூறப்படுகிறது. அதுவரை தனது கட்சியின் கொள்கைகளையும், மக்கள் திட்டங்களையும் மேடைகள் மற்றும் சமூக வலைத்தளம் வழியாகவே கொண்டு செல்ல அவர் திட்டமிட்டுள்ளார்.
ஊடகங்களின் பிடியில் சிக்காமல் தனது அரசியல் பாதையை வகுக்கும் விஜய்யின் இந்த ‘மௌனப் புரட்சி’ அவருக்கு சாதகமாக அமையுமா அல்லது மக்களிடையே ஒரு இடைவெளியை உருவாக்குமா என்பது தேர்தல் முடிவுகளில்தான் தெரியும். ஆனால், தற்போதைக்கு மீடியாவிடம் இருந்து தள்ளியிருப்பதுதான் தனது அரசியலுக்கு பாதுகாப்பு என விஜய் கருதுகிறார்.
Tamil, Thalapathy Vijay, TVK Party, Tamil Nadu Politics, Media vs Vijay, Captain Vijayakanth, Political Strategy, 2026 Elections, தளபதி விஜய், தவெக, தமிழக அரசியல், விஜய் செய்தியாளர் சந்திப்பு, கேப்டன் விஜயகாந்த், அரசியல் வியூகம், 2026 தேர்தல்.
The Silent Strategy: Why Vijay is Avoiding the Media Spotlight
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
