தமிழக அரசியலில் தற்போது நிலவி வரும் சூழல், தேசிய கட்சியான காங்கிரசுக்கு ஒரு பொன்னான வாய்ப்பை வழங்கியிருக்கிறது. கடந்த பல ஆண்டுகளாக தமிழகத்தில் திராவிட கட்சிகளின் நிழலிலேயே வளர்ந்து வரும் காங்கிரஸ், இப்போது ஒரு முக்கியமான முடிவை எடுக்க வேண்டிய கட்டாயத்தில் உள்ளது. தமிழக வெற்றி கழகத்தை தொடங்கி அரசியலில் புயலை கிளப்பியுள்ள நடிகர் விஜய்யுடன் கூட்டணி அமைத்தால், தமிழகத்தில் இழந்த அதிகாரத்தை மீண்டும் பெறுவதற்கான வாய்ப்பு பிரகாசமாக இருக்கிறது. “கைமேல் வெற்றி இருப்பது கண்ணில் தெரிகிறது” என்று ஒரு சாதாரண தொண்டன் கூட உணரும்போது, டெல்லி மேலிடம் ஏன் இன்னும் தயங்குகிறது என்பதுதான் புரியாத புதிராக உள்ளது.
1996 ஆம் ஆண்டு நடந்த வரலாற்று பிழையை காங்கிரஸ் மீண்டும் ஒருமுறை நினைத்து பார்க்க வேண்டும். அப்போது நிலவிய அதிருப்தி அலையைச் சரியாக பயன்படுத்த தவறிய நரசிம்ம ராவ், மூப்பனார் போன்ற தலைவர்களின் ஆலோசனையை புறக்கணித்து அதிமுக கூட்டணியை தேர்ந்தெடுத்தார். அதன் விளைவாகத் தமிழக காங்கிரஸ் உடைந்தது மட்டுமல்லாமல், படுதோல்வி அடைந்தது. மேலும் அடுத்த முப்பது ஆண்டுகளாக திராவிட கட்சிகளின் தயவில் இயங்கும் நிலைக்கு தள்ளப்பட்டது. அதே போன்றதொரு இக்கட்டான முடிவை ராகுல் காந்தி இப்போதும் எடுத்தால், காங்கிரஸ் தமிழகத்தில் மீண்டும் தலைதூக்கவே முடியாது. கடந்த காலத் தவறுகளில் இருந்து பாடம் கற்றுக் கொள்வதே ஒரு சிறந்த தலைமைக்குப் பலமாகும்.
நடிகர் விஜய்யுடன் கூட்டணி அமைப்பது என்பது வெறும் தமிழக அரசியலோடு மட்டும் நின்றுவிட போவதில்லை. விஜய்யின் செல்வாக்கு என்பது மொழி எல்லைகளை தாண்டியது. குறிப்பாக கேரளாவிலும், புதுவையிலும் அவருக்கு இருக்கும் மிகப்பெரிய ரசிகர் பட்டாளம், காங்கிரஸின் வாக்கு வங்கியை பலப்படுத்தும். இந்த மூன்று மாநிலங்களிலும் ஒரு வலுவான கூட்டணியை உருவாக்கினால், அது தென்னிந்திய அரசியலில் காங்கிரஸின் முகத்தையே மாற்றிவிடும். ஆட்சியில் அதிகாரம், கொள்கையில் தெளிவு என இரண்டையும் பெற விஜய்யின் கைகளை பிடிப்பதே காங்கிரசுக்கு இப்போதைக்கு இருக்கும் ஒரே நல்வழி.
ஒரு சாதாரண கட்சி தொண்டனுக்கு தெரியும் எதார்த்தம் கூட கட்சியின் மேலிடத்திற்கு தெரியவில்லை என்பதுதான் வேதனையான விஷயம். களத்தில் மக்கள் என்ன பேசுகிறார்கள், இளைஞர்கள் யாரை எதிர்பார்க்கிறார்கள் என்பதை தொண்டர்கள் நன்கு அறிவார்கள். விஜய்யின் வருகை தமிழக அரசியலில் ஒரு மாற்றத்தை ஏற்படுத்தும் என்பதை தெருக்கோடியில் இருப்பவன் கூட சொல்லும்போது, மேலிட தலைவர்கள் இன்னும் புள்ளிவிவரங்களை பார்த்துக் கொண்டு தயங்குவது காலவிரயமே தவிர வேறில்லை. அரசியலில் “டைமிங்” என்பது மிக முக்கியம்; அந்த தருணத்தை சரியாக பயன்படுத்தாதவர்கள் வரலாற்றில் காணாமல் போய்விடுகிறார்கள்.
தற்போதைய ஆளுங்கட்சியுடன் கூட்டணியில் இருப்பதால் கிடைக்கும் சில சலுகைகளை விட, விஜய்யுடன் இணைந்து ஆட்சியில் பங்கு பெறுவது காங்கிரஸின் எதிர்காலத்திற்கு பலம் சேர்க்கும். திராவிட கட்சிகள் எப்போதும் காங்கிரஸை தங்களது நிழலிலேயே வைத்திருக்க விரும்புகின்றன. ஆனால் விஜய், தற்போதைய அரசியலுக்கு ஒரு மாற்று சக்தியாக தன்னை முன்னிறுத்துவதால், அவருடன் சமமான அதிகார பகிர்வுடன் கைகோர்ப்பது காங்கிரஸின் அடையாளத்தை மீட்டெடுக்கும். இது வெறும் தேர்தல் வெற்றி மட்டுமல்ல, காங்கிரஸின் சுயமரியாதையை தமிழகத்தில் நிலைநாட்டும் ஒரு வழியாகும்.
முடிவாக, 2026 தேர்தல் என்பது காங்கிரசுக்கு ஒரு “வாழ்வா சாவா” போராட்டமாகும். விஜய்யுடன் கூட்டணி அமைத்து ஆட்சியில் பங்கு பெறுவதா அல்லது பழையபடி திராவிட கட்சிகளின் பின்னால் நின்று ஒரு சில இடங்களுக்காக போராடுவதா என்பதை ராகுல் காந்தி விரைந்து முடிவு செய்ய வேண்டும். வாய்ப்புகள் கதவை தட்டும்போது அதை தவறவிட்டால், வருங்கால தலைமுறை காங்கிரஸை மன்னிக்காது. வெற்றி கண்முன்னே தெரியும்போது, அதை நோக்கி துணிச்சலாக அடி எடுத்து வைப்பதே சிறந்த அரசியல் தலைமைக்கு அடையாளம். தமிழகத்தில் காங்கிரஸ் மீண்டும் ஒரு அதிகார சக்தியாக மாற, இதுவே கடைசி வாய்ப்பு.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
