தமிழக அரசியல் களம் 2026 சட்டமன்ற தேர்தலை நோக்கி அனல் பறக்க தொடங்கியுள்ள நிலையில், தமிழக வெற்றிக் கழகத்தின் தலைவர் விஜய் எடுத்துள்ள ‘தனித்து போட்டி’ என்ற முடிவு அரசியல் வட்டாரத்தில் பெரும் விவாதங்களை ஏற்படுத்தியுள்ளது. “சினிமாவுல வேணா நீங்க சிங்கிளா வரலாம், ஆனா அரசியல்ல தனியா வர்றது தற்கொலைக்கு சமம்!” என்ற விமர்சகர்களின் எச்சரிக்கை, தமிழகத்தின் எதார்த்தமான தேர்தல் அரசியலை பிரதிபலிக்கிறது. 60 ஆண்டுகால வரலாறும், வலுவான வாக்கு வங்கிகளும் கொண்ட திமுக மற்றும் அதிமுக போன்ற திராவிட கட்சிகளே, தேர்தலுக்கு தேர்தல் சிறு கட்சிகளையும் அரவணைத்து மெகா கூட்டணியை உருவாக்கும் போது, இப்போதுதான் அரசியல் அரிச்சுவடியை கற்றுக்கொள்ள தொடங்கியுள்ள ஒரு கட்சி ‘தனி வழி’ என்று சொல்வது தற்கொலைக்கு சமமான ஒரு முயற்சி என்றே பலரால் பார்க்கப்படுகிறது.
விஜய்யின் இந்த முடிவை விமர்சிக்கும் மூத்த அரசியல் ஆய்வாளர்கள், இதனை “விவேகம் இல்லாத வீம்பு” என்று குறிப்பிடுகின்றனர். தமிழக அரசியலில் ஒரு கட்சி வெற்றி பெற வேண்டுமானால், அதற்கு அடிமட்ட தொண்டர்களின் பலம் மட்டும் போதாது, வெவ்வேறு சமூகங்களின் வாக்குகளை ஒருங்கிணைக்கும் கூட்டணி பலமும் மிக அவசியம். முந்தைய தேர்தல்களில் விஜயகாந்தின் தேமுதிக, கமல்ஹாசனின் மக்கள் நீதி மய்யம் மற்றும் சீமானின் நாம் தமிழர் கட்சி ஆகியவை தனித்து போட்டியிட்டு பெரிய அளவில் தாக்கத்தை ஏற்படுத்த முடியாத நிலையில், விஜய்யின் இந்த தன்னம்பிக்கை அதீதமானதாக தோன்றுகிறது. திராவிட இயக்கங்கள் இன்னும் வலுவாக இருக்கும் நிலையில், ஒரு ‘கன்றுக்குட்டி’ போல இப்போதுதான் துள்ள தொடங்கியுள்ள தவெக, அனுபவமிக்க ஜாம்பவான்களை கூட்டணி வியூகம் இல்லாமல் எதிர்கொள்வது அரசியல் அறியாமையின் வெளிப்பாடே என்பது அவர்களின் வாதம்.
“ஒத்தையடிப் பாதையில போனா ஊர் போய் சேர முடியாது!” என்ற பழமொழி விஜய்யின் தற்போதைய நிலைக்கு மிகச்சரியாக பொருந்துகிறது. தேர்தல் வெற்றியில் ஒரு சில சதவீத வாக்குகள் கூட ஆட்சியின் தலைவிதியை மாற்றும் வல்லமை கொண்டவை. அப்படிப்பட்ட சூழலில், விஜய்யின் வாக்குகள் பிரிவது ஆளுங்கட்சிக்கோ அல்லது பிரதான எதிர்க்கட்சிக்கோ மறைமுகமாக சாதகமாக முடியுமே தவிர, அது அவருக்கு தனி பெரும்பான்மையை தேடித்தருமா என்பது சந்தேகமே. அரசியலில் கூட்டணி என்பது பலவீனம் கிடையாது; அது எதிரியை வீழ்த்த பயன்படுத்தப்படும் ஒரு பலமான ‘போர் வியூகம்’. திமுகவின் மெகா கூட்டணியை உடைக்க வேண்டுமானால், அதே போன்றதொரு வலுவான கூட்டணியை அமைப்பதே புத்திசாலித்தனம் என்று விமர்சகர்கள் அறிவுறுத்துகின்றனர்.
மேலும், விஜய்யின் இந்த தனித்துப் போட்டி முடிவால் அவரது கட்சியின் வாக்கு வங்கி யாருடைய வாக்குகளை பறிக்கும் என்ற அச்சம் அனைத்து கட்சிகளுக்கும் உள்ளது. குறிப்பாக, இளைஞர்கள் மற்றும் முதல்முறை வாக்காளர்களின் வாக்குகளை விஜய் கவரக்கூடும் என்பதால், இது மற்ற கட்சிகளின் வெற்றி வாய்ப்பை பாதிக்கலாம். ஆனால், விஜய்யின் இலக்கு ‘ஆட்சி கட்டில்’ என்றால், வெறும் 15 முதல் 20 சதவீத வாக்குகளை பெறுவது போதுமானதல்ல. கூட்டணி இல்லாமல் 234 தொகுதிகளிலும் தனித்து போட்டியிடும் போது, வெற்றிக்கான வாய்ப்பு மிக குறுகிய எல்லைக்குள் சுருங்கிவிடும். இது அவரது அரசியல் எதிர்காலத்தையே கேள்விக்குறியாக்கும் ஆபத்து உள்ளதாக எச்சரிக்கப்படுகிறது.
சினிமாவில் ஒரு ஹீரோவாக வில்லன்களை ஒற்றையாளாக வீழ்த்துவது திரையில் ரசிக்கத்தக்கது, ஆனால் அரசியலில் நிஜமான வில்லன்கள் மிகவும் வலிமையானவர்கள். அவர்களின் அதிகார பலம், பண பலம் மற்றும் அமைப்பு ரீதியான பலத்தை தகர்க்க வேண்டுமானால், சிதறி கிடக்கும் மாற்று சக்திகளை ஒன்றிணைக்க வேண்டியது காலத்தின் கட்டாயம். திராவிட பாரம்பரியம் மிக்க தமிழக மண்ணில், கூட்டணி இன்றி தனித்து நின்று வெல்வது என்பது எவரெஸ்ட் சிகரத்தை ஆக்சிஜன் இன்றி ஏறுவதற்கு சமம். “இது ரீல் இல்ல, ரியல்!” என்பதை உணர்ந்து, விஜய் தனது பிடிவாதத்தை கைவிட்டு ஒரு ராஜதந்திரமான கூட்டணியை நோக்கி நகர வேண்டும் என்பதுதான் நடுநிலையான அரசியல் பார்வையாளர்களின் ஒருமித்த கருத்தாக உள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
