இந்தியாவின் பாதுகாப்பு மற்றும் இறையாண்மை வரலாற்றில் 2025-ஆம் ஆண்டு ஒரு திருப்புமுனையாக அமைந்தது. சீர்திருத்தங்களின் ஆண்டு என்று அதிகாரப்பூர்வமாக அறிவிக்கப்பட்ட 2025-ல், இந்திய ராணுவம் மற்றும் தொழில்நுட்ப துறை எட்டியுள்ள உச்சங்கள் உலக நாடுகளை திரும்பிப் பார்க்க வைத்துள்ளன.
குறிப்பாக, இந்திய பாதுகாப்பு அமைச்சகம் வரலாற்றிலேயே முதன்முறையாக ரூ. 2.1 லட்சம் கோடி மதிப்பிலான 193 ஒப்பந்தங்களை ஒரே ஆண்டில் கையெழுத்திட்டு சாதனை படைத்துள்ளது. இதில் 90 சதவீதத்திற்கும் அதிகமான ஒப்பந்தங்கள் உள்நாட்டு நிறுவனங்களுக்கே வழங்கப்பட்டுள்ளன என்பது ‘ஆத்மநிர்பர் பாரத்’ திட்டத்தின் உண்மையான வெற்றியாக கருதப்படுகிறது. 2025-ல் நாம் கண்ட இந்த அபார வளர்ச்சி என்பது வெறும் ‘டிரெய்லர்’ மட்டுமே; 2026-ல் இந்தியா ஒரு உலகளாவிய பாதுகாப்பு ஏற்றுமதி மையமாக உருவெடுப்பதற்கான முழுத்திரைப்படத்தை உலகம் காணப்போகிறது.
தொழில்நுட்ப ரீதியாக, 2025-ஆம் ஆண்டு ‘பிரிசிஷன் ஸ்ட்ரைக்’ மற்றும் ஆளில்லா விமானங்களின் ஆண்டாக திகழ்ந்தது. சுமார் 156 ‘பிரசந்த்’ இலகுரக போர் ஹெலிகாப்டர்களுக்கான ரூ. 62,700 கோடி மதிப்பிலான ஒப்பந்தம் மற்றும் ஐந்தாம் தலைமுறை போர் விமானமான AMCA-வின் உற்பத்தி மாதிரிக்குக் கிடைத்த ஒப்புதல் ஆகியவை இந்தியாவின் வான்வழி வலிமையை அடுத்த கட்டத்திற்கு எடுத்துச் சென்றன.
மேலும், பாதுகாப்புத் துறை ஏற்றுமதியில் முன்னெப்போதும் இல்லாத வகையில் ரூ. 23,622 கோடியை இந்தியா எட்டியுள்ளது. இதன் மூலம் பிலிப்பைன்ஸ், ஆர்மீனியா போன்ற நாடுகளுக்கு மட்டுமல்லாமல், அமெரிக்கா மற்றும் பிரான்ஸ் போன்ற வல்லரசு நாடுகளுக்கே உதிரிபாகங்கள் மற்றும் ஏவுகணைகளை வழங்கும் நிலைக்கு பாரதம் உயர்ந்துள்ளது. இது 2026-ல் ரூ. 50,000 கோடி ஏற்றுமதி இலக்கை நோக்கி இந்தியாவை துரிதமாக நகர்த்துகிறது.
தேசிய பாதுகாப்பு விஷயத்தில் இந்தியா தனது “புதிய இயல்புநிலை” கொள்கையை 2025-ல் உரக்க சொன்னது. மே மாதம் நிகழ்ந்த ‘ஆபரேஷன் சிந்துார்’ மூலம் எல்லையில் பயங்கரவாத முகாம்கள் துல்லியமாக தாக்கி அழிக்கப்பட்டன. அணு ஆயுத மிரட்டல்களுக்கு அடிபணிய மாட்டோம் என்பதையும், பயங்கரவாதத்தின் மூளையாக செயல்படுபவர்களையும் அவர்களை தூண்டிவிடுபவர்களையும் ஒரே தராசில் வைத்து தண்டிப்போம் என்பதையும் இந்தியா நிரூபித்தது. 2026-ல் அறிமுகமாகவுள்ள ‘சுதர்சன சக்கரா மிஷன்’ மூலம் இந்தியாவின் பாதுகாப்பு வளையம் 2035-க்குள் முழுமையான தற்சார்பை அடையும் வகையில் வடிவமைக்கப்பட்டுள்ளது. இது எதிர்கால போர்களை முன்கூட்டியே கணித்து செயல்படும் ஒரு முன்கணிப்பு தொழில்நுட்பமாக அமையவுள்ளது.
எல்லை அரசியலில் சீனா மற்றும் பாகிஸ்தானுடன் இந்தியா கையாண்ட வியூகம் 2025-ல் பெரும் வெற்றியை தந்தது. கிழக்கு லடாக்கில் எல்லை ரோந்து தொடர்பான உடன்படிக்கைகள் எட்டப்பட்டு பதற்றங்கள் தணிந்தாலும், இந்தியா தனது பாதுகாப்பில் எள்ளளவும் சமரசம் செய்துகொள்ளவில்லை. அமெரிக்காவின் வர்த்தக தடைகள் மற்றும் உலகளாவிய விநியோக சங்கிலி பாதிப்புகளுக்கு மத்தியிலும், இந்தியா தனது தன்னாட்சியை நிலைநாட்டியது. ரஷ்யா மற்றும் சீனாவுடனான உறவுகளை சமநிலைப்படுத்தும் அதே வேளையில், குவாட் போன்ற அமைப்புகளிலும் தனது தனித்துவமான குரலை பதிவு செய்தது. 2026-ல் இந்தியா தனது அண்டை நாடுகளான நேபாளம், மியான்மர் மற்றும் வங்காளதேசத்துடன் ஒரு புதிய ‘ரீபூட்’ உறவை தொடங்க தயாராகி வருகிறது.
ராணுவ வீரர்களின் அர்ப்பணிப்பு மற்றும் அவர்களின் வாழ்நாள் அனுபவங்கள் ‘பாரதம்’ என்ற கருத்தியலுக்கு உயிர் கொடுத்துள்ளன. 2025-ல் அறிமுகப்படுத்தப்பட்ட புதிய ‘பாதுகாப்பு கொள்முதல் கையேடு’ மற்றும் ‘அக்னிவீர்’ திட்டத்தின் மேம்படுத்தப்பட்ட வடிவங்கள், வீரர்களின் தேவைகளை உடனுக்குடன் பூர்த்தி செய்வதை உறுதி செய்துள்ளன. ஓய்வுபெற்ற வீரர்களின் அனுபவங்களை நவீன தொழில்நுட்பத்துடன் இணைப்பதற்கான புதிய தளங்கள் உருவாக்கப்பட்டன. “பாரதத்தின் பாதுகாப்பு என்பது வெறும் ஆயுதங்களில் இல்லை, அது ஒவ்வொரு குடிமகனின் தேசபக்தியிலும் வீரர்களின் தியாகத்திலும் உள்ளது” என்ற கொள்கை 2025-ன் ஒவ்வொரு ராணுவ நடவடிக்கையிலும் எதிரொலித்தது. இந்த வீர உணர்வே 2026-ல் இந்தியாவை ஒரு ‘விக்சித் பாரத்’ ஆக மாற்றுவதற்கான அச்சாணியாக இருக்கும்.
இறுதியாக, 2026-ஆம் ஆண்டு என்பது இந்தியாவிற்கு தற்சார்பு நிலையிலிருந்து மேலாதிக்க நிலைக்கு மாறும் ஆண்டாக இருக்கும். ரூ. 6.81 லட்சம் கோடி பாதுகாப்பு பட்ஜெட்டில் பெரும் பகுதி உள்நாட்டு உற்பத்திக்கே ஒதுக்கப்பட்டுள்ளது. 16,000-க்கும் மேற்பட்ட குறு, சிறு மற்றும் நடுத்தர நிறுவனங்கள் இன்று பாதுகாப்பு துறையில் ‘கேம் சேஞ்சர்களாக’ உருவெடுத்துள்ளன.
2025-ல் போடப்பட்ட வலுவான அடித்தளம், 2026-ல் இந்தியாவை உலகின் மூன்றாவது பெரிய பொருளாதாரமாகவும், அசைக்க முடியாத ராணுவ சக்தியாகவும் உலக அரங்கில் நிலைநிறுத்தும் என்பது திண்ணம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
