தமிழக அரசியலில் கடந்த 20 ஆண்டுகளாக நிலவி வரும் ஒரு மிகப்பெரிய இடைவெளி, இளைஞர்களை நோக்கிய அரசியல் கல்வியின்மையே ஆகும். திராவிட பேரியக்கங்களான திமுக மற்றும் அதிமுக, கடந்த இருபது ஆண்டுகளில் தங்களது அடிப்படை கொள்கைகளை அடுத்த தலைமுறைக்கு கொண்டு சேர்ப்பதில் பெரும் சுணக்கத்தை காட்டியுள்ளன. ஒரு தலைமுறைக்கே திராவிட கொள்கைகளின் வேர்களையும், சமூக நீதியின் அவசியத்தையும் சொல்லிக் கொடுக்காததன் விளைவே, இன்று புதிய மாற்றத்தை நோக்கி இளைஞர்கள் நடிகர் விஜய்யின் பின்னால் அணிவகுப்பதற்கு காரணமாகும். 20 வருடங்களாக இளைஞர்களை சரியான முறையில் அரசியல்படுத்தத் தவறியது யார் என்ற கேள்வி இன்று உரக்க எழுப்பப்படுகிறது.
இளைஞர்கள் வெறும் ‘வாக்கு வங்கி’யாக மட்டுமே பார்க்கப்பட்டார்களே தவிர, அவர்களுக்கு கொள்கை ரீதியான அதிகாரமோ அல்லது கட்சியில் கௌரவமான பதவிகளோ முறையாக வழங்கப்படவில்லை. வாரிசு அரசியலின் நிழலில் சாதாரண தொண்டனின் வீட்டு இளைஞர்களுக்கு பதவிகள் எட்டாக்கனியாகவே இருந்தன. இளைஞர்களுக்கான நலத்திட்டங்கள் என்று அறிவிக்கப்பட்டவை பலவும் வேலைவாய்ப்பு அல்லது வாழ்வாதாரத்தை விட, இலவச பொருட்களையே மையப்படுத்தியிருந்தன. இதனால் ஏற்பட்ட அதிருப்தியும், தங்களது அடையாளத்திற்கான தேடலும் தான் இளைஞர்களை ஒரு புதிய திசையை நோக்கி திருப்பியுள்ளது.
விஜய் தனது கட்சியை தொடங்கி இளைஞர்களை ஒருங்கிணைக்கும் போது, அவர்களை ‘தற்குறி’ என்று விமர்சிப்பதில் எந்த பயனும் இல்லை. கடந்த பல ஆண்டுகளாக இளைஞர்களுக்கு அரசியல் விழிப்புணர்வை ஏற்படுத்தாத கட்சிகள், இப்போது அவர்கள் விழித்தெழும்போது இத்தகைய முத்திரைகளை குத்துவது அவர்களது இயலாமையையே காட்டுகிறது. அரசியல் என்பது வெறும் தேர்தல் வெற்றிகள் மட்டுமல்ல; அது அடுத்த தலைமுறைக்கான பொறுப்பு என்பதை திராவிட கட்சிகள் மறந்துவிட்டன. இளைஞர்கள் இல்லாத அரசியல் என்பது ஒரு காலியான கோப்பையை போன்றது, அது ஜீரோவுக்கு சமம்.
தமிழக வெற்றி கழகம் இதை உணர்ந்து, சரியாக இளைஞர்கள் மற்றும் முதல்முறை வாக்காளர்கள் மத்தியில் ஒரு மிகப்பெரிய நம்பிக்கையை விதைத்துள்ளது. திராவிட கொள்கைகளில் உள்ள தொய்வை சரியாக கணித்துள்ள விஜய், தனது கட்சியின் அடிப்படை கொள்கைகளை இளைஞர்களுக்கு புரியும் வகையில் கொண்டு செல்ல முயல்கிறார். கல்வி மற்றும் வேலைவாய்ப்பில் உள்ள சிக்கல்கள், நீட் தேர்வு விவகாரம் போன்ற இளைஞர்களை நேரடியாக பாதிக்கும் பிரச்சனைகளில் அவர் எடுக்கும் நிலைப்பாடுகள் இன்றைய தலைமுறையினரை அவரிடம் ஈர்க்கின்றன. பழைய கட்சிகள் தங்களை சீரமைத்துக் கொள்ளாவிட்டால், இந்த இளைஞர் சக்தி ஒரு மிகப்பெரிய அரசியல் மாற்றத்தை உண்டாக்கும்.
இளைஞர்களை அரசியல்படுத்துவது என்பது அவர்களை தெருவில் கோஷம் போட வைப்பது மட்டுமல்ல; அவர்களுக்கு அதிகாரம் அளிப்பதும், கொள்கை ரீதியான தெளிவை தருவதும் ஆகும். திமுகவும் அதிமுகவும் தங்களது வழக்கமான ரிட்டைர்டு ஆனவர்களின் அரசியலில் இருந்து விடுபட்டு, இளைஞர்களுக்கு உண்மையான தலைமை பண்புகளை கற்றுக்கொடுத்திருக்க வேண்டும். ஆனால், அவர்கள் அதை செய்ய தவறியதால் உருவான வெற்றிடத்தை இப்போது விஜய் நிரப்ப தொடங்கியுள்ளார். அரசியல் களம் இப்போது முதியவர்களுக்கானது மட்டுமல்ல, அது கனவுகளும் லட்சியங்களும் கொண்ட இளைஞர்களுக்கானது என்பதை இந்த தலைமுறை உணர்த்தி கொண்டிருக்கிறது.
இறுதியாக, 2026 சட்டமன்ற தேர்தல் என்பது வெறும் ஆட்சி மாற்றத்திற்கான களமாக மட்டும் இருக்காது; அது தமிழகத்தின் அரசியல் கலாச்சாரத்தை மாற்றியமைக்கும் ஒரு போராக இருக்கும். இளைஞர்களின் ஆதரவு இல்லாமல் எந்த கட்சியும் இனி நீண்டகாலம் நிலைத்து நிற்க முடியாது. திராவிட கொள்கைகளை வெறும் மேடை பேச்சாக மட்டும் வைத்திருக்காமல், அதை நவீன காலத்திற்கு ஏற்ப இளைஞர்களிடம் கொண்டு சேர்க்க தவறியதன் விலையை இனி வரும் காலங்களில் பழைய கட்சிகள் உணரக்கூடும். பீனிக்ஸ் பறவை போல இளைஞர்கள் எழுந்து வரும்போது, அது தமிழக அரசியலில் ஒரு புதிய விடியலை ஏற்படுத்தும் என்பதில் ஐயமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
