தமிழக அரசியல் களத்தில் ‘தமிழக வெற்றிக் கழகம்’ குறித்த விவாதங்கள் சூடுபிடித்துள்ள நிலையில், அக்கட்சிக்கு கிராமப்புறங்களில் செல்வாக்கு இல்லை என்று ஒரு தவறான பிம்பத்தை கட்டமைக்கப் பெரும் முயற்சி எடுக்கப்பட்டு வருகிறது. குறிப்பாக, சில ‘பெய்டு’ அரசியல் விமர்சகர்கள் மற்றும் ஊடகங்கள், வரும் 2026 தேர்தலில் கிராமங்களில் திமுக மற்றும் அதிமுக இடையே மட்டுமே நேரடி போட்டி இருக்கும் என்றும், விஜய்யின் கட்சி நகர்ப்புறங்களுக்கு மட்டுமே உரியது என்றும் திட்டமிட்டு வதந்திகளை பரப்பி வருகின்றனர். ஆனால், இந்த விமர்சனங்கள் யதார்த்தத்திற்கு முற்றிலும் மாறானவை என்பதுதான் உண்மை.
விஜய் இன்று நேற்று அரசியல் பேச தொடங்கவில்லை; அவர் அரசியல் கட்சி ஆரம்பிக்கும் முன்பே, கடந்த பல ஆண்டுகளாக தமிழகத்தின் ஒவ்வொரு குக்கிராமத்திலும் ‘விஜய் மக்கள் மன்றம்’ மிக வலுவான கட்டமைப்போடு இயங்கி வருகிறது. திராவிட கட்சிகளுக்கு கிளைக் கழகங்கள் இருப்பது போலவே, விஜய்யின் மன்ற நிர்வாகிகளும் தொண்டர்களும் கிராமங்களில் இரத்த தான முகாம்கள், ஏழை எளிய மாணவர்களுக்குக் கல்வி உதவி மற்றும் நலத்திட்ட உதவிகளை தொடர்ச்சியாக செய்து வந்துள்ளனர். இந்த அடிமட்ட அளவிலான கட்டமைப்புதான் விஜய்யின் உண்மையான பலம், இது எந்த ஒரு விளம்பரத்திற்கும் அப்பாற்பட்டது.
உண்மையை சொல்லப்போனால், விஜய்க்கு பெரிய அளவிலான ‘வெறித்தனமான’ ரசிகர்கள் இருப்பது நகர்ப்புறங்களை விட கிராமப்புறங்களில்தான் அதிகம். கிராமத்து இளைஞர்கள் விஜய்யை தங்கள் வீட்டுப் பிள்ளையாகவும், தங்களின் பிரதிநிதியாகவும் பார்க்கிறார்கள். விஜய் அண்ணா என விஜய்யை தங்கள் குடும்பத்தில் ஒருவராகவே பார்க்கின்றனர். சினிமா நட்சத்திரமாக இருந்த காலத்திலேயே அவர் கிராமத்து மக்களின் ரசனைக்கு ஏற்ப தனது படங்களை தந்து வந்ததால், பாமர மக்கள் மத்தியிலும் பெண்கள் மத்தியிலும் அவருக்கு மிகப்பெரிய நற்பெயர் உண்டு. கிராமத்து திண்ணைகளிலும் தேநீர் கடைகளிலும் விஜய்யின் அரசியல் வருகை ஒரு மிகப்பெரிய பேசுபொருளாக மாறியிருப்பதை இந்த விமர்சகர்கள் வசதியாக மறைக்கிறார்கள்.
தமிழக அரசியலில் மாற்றத்தை விரும்பும் மக்கள், குறிப்பாக திராவிட கட்சிகளின் நீண்டகால ஆட்சி முறையால் சலிப்படைந்த கிராமப்புற வாக்காளர்கள், விஜய்யை ஒரு நம்பிக்கைக்குரிய மாற்றாக பார்க்கின்றனர். விஜய்யின் அரசியல் மாநாடுகளுக்கு கிராமங்களில் இருந்து திரண்டு வந்த லட்சக்கணக்கான மக்கள் கூட்டமே இதற்கு சான்று. தவெகவின் ஒவ்வொரு நிர்வாகியும் அந்தந்த ஊரில் உள்ள மக்களின் அடிப்படை பிரச்சினைகளை நன்கு அறிந்தவர்களாக இருப்பதால், தேர்தல் களத்தில் அவர்களால் மிக எளிதாக மக்களிடம் ஊடுருவ முடியும். இது வெறும் சினிமா புகழ் சார்ந்த கட்சி அல்ல, மாறாக கிராமத்து மண்ணில் வேரூன்றிய மக்களின் கட்சியாக உருவெடுத்துள்ளது.
திட்டமிட்டு வதந்தி பரப்பும் விமர்சகர்கள், 2022-ஆம் ஆண்டு நடைபெற்ற உள்ளாட்சி தேர்தலை மறந்துவிட்டார்கள் போலிருக்கிறது. அன்று விஜய் கட்சி ஆரம்பிக்காத நிலையிலும், அவரது மக்கள் மன்றத்தை சேர்ந்தவர்கள் சுயேச்சையாக போட்டியிட்டு 115-க்கும் மேற்பட்ட இடங்களில் வெற்றி பெற்றனர். அதில் பெரும்பாலான வெற்றிகள் கிராமப்புற பஞ்சாயத்துகளில்தான் கிடைத்தன. இதுவே விஜய்யின் செல்வாக்கு கிராமங்களில் எந்த அளவிற்கு ஆழமாக இருக்கிறது என்பதற்கான முதல் எச்சரிக்கை மணி. அப்போதே தொடங்கிய அந்த எழுச்சி, இன்று ஒரு அரசியல் கட்சியாக உருவெடுத்துள்ள நிலையில் பல மடங்கு அதிகரித்துள்ளது.
2026 தேர்தல் முடிவுகள் வெளியாகும் போது, குளிரூட்டப்பட்ட அறைகளில் அமர்ந்து கொண்டு ‘விஜய்க்கு கிராமத்தில் பலமில்லை’ என்று சொன்ன பெய்டு விமர்சகர்களின் முகத்திரை நிச்சயம் கிழியும். அப்போது கிராமங்களில் இருந்து கிடைக்கப்போகும் வாக்கு சதவீதம் பல அரசியல் ஜாம்பவான்களை ஆச்சரியத்தில் ஆழ்த்தும். தமிழகத்தின் மூலை முடுக்கெல்லாம் பரவியுள்ள விஜய்யின் ரசிகர்கள், அமைதியான முறையில் தங்கள் பணியை செய்து வருகிறார்கள். தேர்தல் முடிவுகள் இந்த தற்காலிக வதந்திகளுக்கு முற்றுப்புள்ளி வைப்பதோடு, தமிழக அரசியல் பாதையையே கிராமங்களில் இருந்து மாற்றியமைக்கும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
