தமிழக அரசியலில் நடிகர் விஜய்யின் ‘தமிழக வெற்றிக் கழகம்’ ஏற்படுத்தியுள்ள தாக்கம், பாரம்பரிய கட்சிகளான திமுக, அதிமுக வாக்கு வங்கிகளில் பெரும் நிலநடுக்கத்தை உருவாக்கிவிட்டது. அதேபோல் சிறு கட்சிகளின் நிலைமையும் திண்டாட்டமாக உள்ளது. குறிப்பாக பாட்டாளி மக்கள் கட்சியில் தந்தை ராமதாஸுக்கும் மகன் அன்புமணிக்கும் இடையே நிலவும் கருத்து வேறுபாடுகள் மற்றும் உட்கட்சி பூசல்களை சாதகமாக்கி கொண்ட விஜய், அக்கட்சியின் இளைஞர் பட்டாளத்தை கபளீகரம் செய்துவிட்டார். வன்னியர் சமூக இளைஞர்கள் மத்தியில் விஜய்க்கு இருக்கும் செல்வாக்கு, பாமகவின் பலமான வடமாவட்ட கோட்டைகளில் ஓட்டை விழுத்தியிருக்கிறது. அன்புமணி ராமதாஸ் தனது பிரச்சாரங்களில் இளைஞர்களை நோக்கி தொடர்ச்சியாக வைத்த கோரிக்கைகள் பலனளிக்காத நிலையில், தவெகவின் எழுச்சி பாமகவின் எதிர்காலத்தை சவாலுக்குள்ளாக்கியுள்ளது.
அதேபோல், தேமுதிகவின் நிலைமையும் தற்போது கவலைக்கிடமாகவே உள்ளது. விஜயகாந்த் என்ற ஆளுமைக்கு பின்னால் நின்ற இளைஞர் சக்தியும், உணர்ச்சிமிக்க தொண்டர்களும் தற்போது விஜய்யின் பக்கம் சாய தொடங்கியுள்ளனர். தேமுதிகவின் பலமாக இருந்த ‘கமிட்டட் கேடர்ஸ்’ எனப்படும் உறுதியான தொண்டர்களில் கணிசமானோர், தவெகவை ஒரு புதிய மாற்றாக பார்க்கின்றனர். விஜயகாந்தின் பாணியிலான நேரடி அரசியலை விஜய்யிடம் எதிர்பார்ப்பதால், தேமுதிகவில் எஞ்சியிருந்த இளைஞர் வாக்குகளும் மொத்தமாக தவெகவுக்கு இடம்பெயர்ந்துவிட்டன. இதனால் தேமுதிக தனது இருப்பை தக்கவைத்துக் கொள்ள பெரும் போராட்டத்தை நடத்த வேண்டிய கட்டாயத்தில் உள்ளது.
விடுதலை சிறுத்தைகள் கட்சியின் வாக்கு வங்கியிலும் விஜய் கணிசமான தாக்கத்தை ஏற்படுத்தியுள்ளார் என்பதை மறுக்க முடியாது. விசிகவின் பொதுச்செயலாளர் மற்றும் முக்கியத் தலைவர்கள் விஜய் மீது காட்டும் வெளிப்படையான கோபமே, அக்கட்சியின் இளைஞர் வாக்குகளில் ஏற்பட்டுள்ள கசிவை உறுதிப்படுத்துகிறது. திருமாவளவனின் தீவிர ஆதரவாளர்களாக இருந்த தலித் இளைஞர்களில் ஒரு பகுதியினர், விஜய்யின் சமூக நீதி பேச்சுகளாலும் சினிமா புகழாலும் ஈர்க்கப்பட்டு தவெகவை நோக்கி நகர்ந்துள்ளனர். விசிக ஒரு தத்துவார்த்த கட்சி என்று கூறப்பட்டாலும், தேர்தல் அரசியலில் தவெகவின் வரவு அவர்களின் வாக்கு சதவீதத்தை சரிக்கும் என்பதில் ஐயமில்லை.
நாம் தமிழர் கட்சியின் ஒருங்கிணைப்பாளர் சீமானின் நிலைமையும் தற்போது சிக்கலாகவே உள்ளது. இதுவரை ‘மாற்று அரசியல்’ மற்றும் ‘இளைஞர் சக்தி’ என்ற ஒற்றை அடையாளத்துடன் களமாடிய சீமானுக்கு, விஜய் ஒரு மிகப்பெரிய சவாலாக உருவெடுத்துள்ளார். சீமானின் உரையாற்றல் மற்றும் தீவிர தமிழ் தேசிய கொள்கைகளை விரும்பிய இளைஞர்களில் ஒரு தரப்பினர், தற்போது அதிகாரத்தை கைப்பற்றும் வாய்ப்புள்ள ஒரு சக்தியாக விஜய்யை பார்க்கின்றனர். சீமானின் வாக்குகளை விஜய் அதிகம் பிரிப்பார் என்று கருத்துக்கணிப்புகள் கூறுவது போலவே, நாம் தமிழர் கட்சியின் முக்கிய களமாக இருந்த இளைஞர் வாக்குகள் இப்போது மடைமாற்றம் கண்டுள்ளன.
கூட்டணி அரசியலில் மட்டுமே உயிர்வாழும் கட்சிகளின் நிலைமை இன்னும் மோசமாகியுள்ளது. குறிப்பாக மதிமுக போன்ற கட்சிகளை தற்போதைய அரசியல் சூழலில் கணக்கிலேயே சேர்க்க முடியாது என்ற நிலை உருவாகியுள்ளது. வாரிசு அரசியல் மற்றும் போதிய இளைஞர் ஆதரவு இல்லாத காரணத்தால், மதிமுக போன்ற கட்சிகள் தவெகவின் வேகத்திற்கு முன்னால் காணாமல் போகும் நிலைக்கு தள்ளப்பட்டுள்ளன. தமிழக அரசியல் இதுவரை திமுக, அதிமுக என்ற நிலையில் இருந்தது. ஆனால், தற்போது விஜய் ஒரு தனிப்பெரும் சக்தியாக உருவெடுத்துள்ளதால், இனி தமிழகத்தில் திமுக, அதிமுக, தவெக என்ற மூன்று கட்சிகள் மட்டுமே பிரதானமாக இருக்கும் சூழல் உருவாகியுள்ளது.
2026 சட்டமன்றத் தேர்தல் என்பது தமிழக அரசியலில் ஒரு மிகப்பெரிய சுத்திகரிப்பை செய்யும் என்று எதிர்பார்க்கப்படுகிறது. இந்த மும்முனை போட்டியில், பல ஆண்டுகளாக வலுவாக இருந்த ஒரு திராவிட கட்சி தனது செல்வாக்கை இழந்து தேய்ந்து போக வாய்ப்புள்ளதா என்ற விவாதம் மேலெழுந்துள்ளது. விஜய்யின் வருகை அதிமுகவின் வாக்கு வங்கியை தான் அதிகம் பாதிக்கும் என்று ஒரு தரப்பும், திமுகவின் ஆட்சிக்கு எதிரான அதிருப்தி வாக்குகளை அவர் அறுவடை செய்வார் என்று மற்றொரு தரப்பும் கூறுகின்றன. எது எப்படியோ, சிறிய கட்சிகள் அனைத்தும் தவெகவின் அலைக்குள் இழுக்கப்பட்டு வரும் நிலையில், 2026 தேர்தல் தமிழகத்தின் அரசியல் முகவரியையே மாற்றியமைக்கும் என்பதில் மாற்று கருத்து இல்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
