தமிழக அரசியல் வரலாறு அரை நூற்றாண்டுக்கும் மேலாக இரு துருவங்களை சுற்றியே சுழன்று கொண்டிருக்கிறது. திமுக அல்லது அதிமுக – இந்த இரண்டு கட்சிகளுக்கு மாற்றாக எத்தனையோ சக்திகள் உருவெடுத்தாலும், இறுதியில் மக்கள் இந்த இரண்டில் ஒன்றையே ஆட்சி கட்டிலில் அமரவைக்கிறார்கள். ஆனால், 2026 சட்டமன்ற தேர்தலை ஒட்டி பரவும் தற்போதைய அரசியல் அதிர்வுகள், இந்த ‘இரு துருவ அரசியலுக்கு’ ஒரு முற்றுப்புள்ளி வைக்கப்படுமா என்ற விவாதத்தை மக்களிடையே பலமாக எழுப்பியுள்ளது. ஒரு புதிய பிளேயர் களத்திற்கு வரும்போது, அதுவரை இருந்த சமன்பாடுகள் சிதைக்கப்படுவது இயற்கைதான்.
“விஜய் ஆட்சிக்கு வருகிறாரோ இல்லையோ, ஆனால் இந்த இரண்டு கட்சிகளின் ஆதிக்கத்தை தடுத்து ஒரு தொங்கு சட்டமன்றத்தை ஏற்படுத்தினால் கூட அது மிகப்பெரிய வெற்றிதான்” என்பதுதான் இன்று பெரும்பாலான நடுநிலை வாக்காளர்களின் கருத்தாக உள்ளது. கடந்த 50 ஆண்டுகளாக மாறி மாறி ஆட்சிக்கு வந்த திராவிடக் கட்சிகள், மக்களுக்கு தேவையான அனைத்தையும் செய்துவிட்டனவா என்ற கேள்வி எழும்போது, மாற்றத்தை விரும்பும் ஒரு பெரும் கூட்டம் விஜய்யின் பின்னால் அணிவகுக்கிறது. இந்த தேர்தலில் விஜய் ஒரு ‘கிங்’ ஆக உருவெடுக்கிறாரோ இல்லையோ, நிச்சயமாக ஒரு ‘கிங் மேக்கராக’ மாறி பலமான ஆதிக்கத்தை செலுத்துவார் என எதிர்பார்க்கப்படுகிறது.
விஜய்யின் தமிழக வெற்றிக் கழகத்தின் தலைமையில் தான் கூட்டணி என்று அறிவித்துள்ள நிலையில், இது யாருடைய ஓட்டுகளை பிரிக்கும் என்பதுதான் தற்போது மில்லியன் டாலர் கேள்வியாக உள்ளது. திமுகவின் ஆட்சிக்கு எதிரான மனநிலை வாக்குகளை விஜய் அறுவடை செய்வாரா அல்லது அதிமுகவின் பாரம்பரிய வாக்கு வங்கியில் விரிசலை ஏற்படுத்துவாரா? அரசியல் விமர்சகர்களின் கணிப்புப்படி, 2026 தேர்தலில் ஏதாவது ஒரு திராவிட கட்சியை விஜய் காலி செய்வது உறுதி. அது ஆட்சியில் இருக்கும் திமுகவா அல்லது பலவீனமாக தோன்றும் அதிமுகவா என்பது தேர்தல் முடிவில்தான் தெரியும்.
இளைஞர்கள் மற்றும் முதல்முறை வாக்காளர்களின் ஆதரவு விஜய்க்கு பெரும் பலமாக உள்ளது. ஜாதி, மத அரசியலுக்கு அப்பாற்பட்டு, ஒரு புதிய தலைமுறை மாற்றத்தை நோக்கி நகர்கிறது. திராவிட கட்சிகள் தங்களின் கட்டமைப்பு மற்றும் பணபலத்தால் இதுவரை கோலோச்சி வந்த நிலையில், விஜய்யின் வருகை அந்த தடையை உடைக்கும் என்று நம்பப்படுகிறது. ஒருவேளை எந்த கட்சிக்கும் பெரும்பான்மை கிடைக்காத சூழல் உருவானால், அது தமிழக அரசியலில் ஒரு புதிய ஜனநாயக பரிசோதனைக்கு வழிவகுக்கும். இது திராவிட கட்சிகளின் சர்வாதிகார போக்கை குறைக்கும் என்பது பொதுமக்களின் எதிர்பார்ப்பு.
திராவிட கொள்கைகளில் இருந்து விலகாமல், அதே சமயம் நவீன அரசியலை முன்னெடுக்கும் விஜய்யின் அணுகுமுறை கவர்ச்சிகரமாக உள்ளது. பெரியார், அண்ணா, எம்.ஜி.ஆர் ஆகியோரின் பெயர்களை அவர் பயன்படுத்துவது, திராவிட கட்சிகளின் ஆதரவாளர்களையும் அவர் பக்கம் இழுக்கும் முயற்சியாகவே பார்க்கப்படுகிறது. குறிப்பாக, “திமுக ஒரு தீய சக்தி, தவெக ஒரு தூய சக்தி” என்ற அவரது சமீபத்திய முழக்கம், திமுகவுக்கு எதிராக அதிமுகவுக்கு வாக்களிக்கும் பாரம்பரிய வாக்குகளை அதாவது அதிமுக தொண்டர்களை தன் பக்கம் ஈர்க்கும் தந்திரமாகவும் கருதப்படுகிறது.
இறுதியில், 2026 தேர்தல் என்பது வெறும் ஆட்சி மாற்றத்திற்கான தேர்தல் மட்டுமல்ல; அது தமிழகத்தின் அரசியல் கலாச்சாரத்தையே மாற்றப்போகும் ஒரு போர்க்களம். விஜய் ஆட்சியை பிடிக்கிறாரோ இல்லையோ, திராவிட கட்சிகளின் ஓட்டுகளை பிரிப்பதன் மூலம் அவர் ஒரு பலமான எதிர்க்கட்சியாக அல்லது மாற்றாக தன்னை நிலைநிறுத்திக் கொண்டாலே, அதுவே தமிழக அரசியலின் மிகப்பெரிய வெற்றியாக கருதப்படும். 2026-இல் ஒரு புதிய வரலாறு படைக்கப்படுமா என்பதை தீர்மானிக்க போவது வாக்காளர்களின் விரல் நுனி மட்டுமே.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
