தமிழக அரசியலில் தற்போது நிகழ்ந்து வரும் மாற்றங்கள் பிரதான எதிர்க்கட்சியான அதிமுகவிற்கு ஒரு மிகப்பெரிய எச்சரிக்கை மணியாக அமைந்துள்ளது. தமிழக வெற்றி கழகத்தின் தலைவர் விஜய் தனது பொதுக்கூட்ட உரைகளில் அண்ணா, எம்ஜிஆர் மற்றும் ஜெயலலிதா ஆகியோரது பெயர்களை தொடர்ச்சியாக பயன்படுத்தி வருகிறார். அவர்கள் யாருடைய தனிச்சொத்தும் அல்ல, தமிழகத்தின் சொத்து என்று அவர் முழங்குவது, அதிமுகவின் பாரம்பரிய வாக்கு வங்கியை தன்பக்கம் இழுக்கும் ஒரு தந்திரமான நகர்வாகவே பார்க்கப்படுகிறது. கடந்த நான்கு நாட்களாக இந்த விவகாரம் விவாத பொருளாக உள்ள நிலையிலும், அதிமுக தலைமை இதற்கு பெரிய அளவில் எதிர்வினை ஆற்றாமல் மௌனம் காப்பது அரசியல் விமர்சகர்களிடையே ஆச்சரியத்தை ஏற்படுத்தியுள்ளது.
அதிமுகவை பொறுத்தவரை, எம்ஜிஆர் மற்றும் ஜெயலலிதா ஆகிய இருபெரும் ஆளுமைகளே அந்த இயக்கத்தின் ஆணிவேர்களாக உள்ளனர். இவர்களது பெயரையும், புகழையும் ஒரு புதிய கட்சி உரிமை கொண்டாடும்போது, அதனை அரசியல் ரீதியாக தடுத்து நிறுத்த வேண்டிய பொறுப்பு தற்போதைய தலைமைக்கு உண்டு. ஆனால், எடப்பாடி பழனிசாமி உள்ளிட்ட மூத்த தலைவர்கள் இது குறித்து கடுமையான விமர்சனங்களை முன்வைக்காமல் மென்மையான போக்கைக்கடைபிடிப்பது, தொண்டர்களிடையே ஒருவித சோர்வை ஏற்படுத்தியுள்ளது. நாம்தான் பிரதான எதிர்க்கட்சி என்று சொல்லிக்கொண்டே, களத்தில் நடக்கும் இத்தகைய பிம்ப அரசியலை எதிர்கொள்ள தவறுவது அதிமுகவின் பலவீனத்தையே காட்டுவதாக புகார்கள் எழுகின்றன.
விஜய் தனது உரைகளில் “2026 தேர்தல் என்பது திமுகவுக்கும் தவெகவுக்கும் இடையிலான போட்டி” என்று திரும்ப திரும்ப அழுத்தி சொல்கிறார். இதன் மூலம் அதிமுகவை ஒரு பொருட்டாகவே அவர் கருதவில்லை என்பதை வெளிப்படையாகவே உணர்த்துகிறார். அதிமுக இதே மந்த நிலையில் தொடர்ந்தால், மக்களின் மனநிலையிலும் தேர்தல் களத்திலும் விஜய் சொல்வது போன்றே ஒரு மும்முனை போட்டி உருவாவதற்கு பதிலாக, அதிமுக ஓரங்கட்டப்படும் சூழல் உருவாகலாம். அதிமுகவின் மெத்தன போக்கு நீடித்தால், நடுநிலை வாக்காளர்களும், அதிமுகவின் அதிருப்தி தொண்டர்களும் விஜய்யை ஒரு மாற்று சக்தியாக தேர்வு செய்யும் அபாயம் இருப்பதாக அரசியல் ஆய்வாளர்கள் எச்சரிக்கின்றனர்.
தேர்தல் நெருங்கும் வேளையில், மற்ற கட்சிகள் கூட்டணியை உறுதிப்படுத்தவும், வியூகங்கள் வகுக்கவும் தீவிரமாக இயங்கி வருகின்றன. ஆனால், அதிமுக தரப்பில் இன்னும் வலுவான கூட்டணி அமையவில்லை. கடந்த காலங்களில் இருந்த கூட்டணி கட்சிகள் பலவும் தற்போது திமுக அல்லது பாஜக பக்கம் சாய்ந்துள்ள நிலையில், அதிமுக தனித்து விடப்பட்டதை போன்ற தோற்றம் உருவாகியுள்ளது. தலைவர்கள் ஊடகங்களுக்கு அளிக்கும் பேட்டிகளில் காட்டும் வேகம், களத்தில் தொண்டர்களை உற்சாகப்படுத்தும் வகையில் இல்லை என்பது நிதர்சனம். ஆளுங்கட்சியான திமுகவை விட, வளர்ந்து வரும் தவெகவை எதிர்கொள்வதில் அதிமுக தலைமை காட்டும் தயக்கம் பல கேள்விகளை எழுப்புகிறது.
அதிமுகவின் கோட்டையாக கருதப்படும் பல மாவட்டங்களில் இன்று தவெகவின் கொடிகள் பட்டொளி வீசிப் பறக்கின்றன. குறிப்பாக, ஈரோடு போன்ற மேற்கு மாவட்டங்களில் விஜய்க்கு பெருகி வரும் ஆதரவு அதிமுகவின் அஸ்திவாரத்தை அசைத்து பார்க்கக்கூடும். அதிமுக தலைவர்கள் ஆக்டிவ்வாக இல்லை என்ற எண்ணம் தொண்டர்கள் மத்தியில் ஆழமாக பதிந்து வருகிறது. வெறும் அறிக்கைகளோடும், சமூக வலைதள பதிவுகளோடும் அரசியல் செய்யாமல், களத்தில் இறங்கி போராடினால் மட்டுமே கட்சியின் இருப்பை தக்கவைக்க முடியும். விஜய்யின் அரசியல் வியூகம் என்பது அதிமுகவின் ‘எதிர்ப்பு அரசியல்’ இடத்தை அபகரிப்பதே ஆகும். இதனை உணர்ந்து அதிமுக செயல்பட வேண்டிய தருணம் இது.
இறுதியாக, காலம் யாருக்காகவும் காத்திருப்பதில்லை. விஜய்யின் வருகை என்பது அதிமுகவிற்கு ஒரு வாழ்வா-சாவா போராட்டத்தை ஏற்படுத்தியுள்ளது. அண்ணா, எம்ஜிஆர், ஜெயலலிதா ஆகியோரின் பெயர்கள் அதிமுகவின் உயிர்நாடி. அவற்றை மற்றவர்கள் பயன்படுத்தும்போது அமைதியாக இருப்பது என்பது, ஒருகட்டத்தில் அந்தப் பாரம்பரியத்தின் மீதான பிடியை இழப்பதற்கே சமமாகும். விஜய்யின் அதிரடி அரசியலை எதிர்கொள்ள அதிமுகவிடம் புதிய உத்திகள் ஏதும் இல்லையா என்ற கேள்வி எழுகிறது. 2026-ல் திமுகவை வீழ்த்தி மீண்டும் ஆட்சியை பிடிக்க வேண்டும் என்ற இலக்கு நிறைவேற வேண்டுமென்றால், அதிமுக முதலில் தன்னை ஒரு துடிப்பான இயக்கமாக மாற்றிக்கொள்ள வேண்டும். இல்லையெனில், தமிழக அரசியல் களம் மிக விரைவில் “திமுக vs தவெக” என்ற நிலைக்கு மாறிவிடும் என்பதில் சந்தேகமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
