தமிழக அரசியலில் நடிகர் விஜய் தலைமையிலான தமிழக வெற்றி கழகத்தின் வருகை, நீண்டகாலமாக நிலவி வந்த கூட்டணி சமன்பாடுகளை முற்றிலுமாக மாற்ற தொடங்கியுள்ளது. குறிப்பாக, ஒரு சதவீதம் முதல் ஐந்து சதவீதம் வரை வாக்கு வங்கி வைத்துள்ள சிறிய கட்சிகளின் பிடிமானம் தளர தொடங்கியுள்ளது. விஜய்யின் வருகை இளைஞர்கள் மற்றும் முதல்முறை வாக்காளர்களின் வாக்குகளை பெருமளவில் ஈர்க்கும் என எதிர்பார்க்கப்படுவதால், இதுவரை திராவிட கட்சிகளை மிரட்டி பணிய வைத்து வந்த சிறிய கட்சிகளின் ‘பேரம் பேசும் சக்தி’ கணிசமாக குறைந்துள்ளதாக அரசியல் நோக்கர்கள் கருதுகின்றனர்.
இதுவரை தமிழகத்தில் திமுக மற்றும் அதிமுக ஆகிய இரு துருவங்களும் சிறிய கட்சிகளின் வாக்குகளை நம்பியே ஆட்சியை பிடித்து வந்தன. தேர்தல் களத்தில் வெற்றி தோல்வியை நிர்ணயிக்கும் காரணியாக இந்த சிறிய கட்சிகள் இருந்ததால், அவை கூட்டணியில் அதிக இடங்களையும், அதிகாரத்தில் பங்கையும் கேட்டு பெரிய கட்சிகளுக்கு அழுத்தம் கொடுத்து வந்தன. ஆனால், தற்போது விஜய் ஒரு புதிய சக்தியாக உருவெடுத்துள்ள நிலையில், திமுக மற்றும் அதிமுக ஆகிய இரண்டுமே சிறிய கட்சிகளுக்கான தங்களின் கதவுகளை சுருக்கி கொள்ள தொடங்கியுள்ளன. தவெக பிரிக்கும் வாக்குகள் பெரும்பாலும் சிறிய கட்சிகளின் வாக்கு வங்கியில் இருந்தே செல்லும் என்பதால், அவர்களை சேர்ப்பதால் பெரிய லாபமில்லை என்ற முடிவுக்கு திராவிட கட்சிகள் வந்துள்ளன.
அதிமுக மற்றும் திமுக ஆகிய இரு கட்சிகளும் தற்போது ‘சுயபலம்’ குறித்து அதிகம் பேச தொடங்கியுள்ளன. சிறிய கட்சிகள் ஒரு சதவீத வாக்கை வைத்துக் கொண்டு 10 அல்லது 15 இடங்களை கேட்பதோ அல்லது அமைச்சரவையில் பங்கு கேட்பதோ இனி செல்லுபடியாகாது என்பதை அவை வெளிப்படையாகவே உணர்த்த தொடங்கியுள்ளன. பேரம் பேசும் கட்சிகளுக்கு ‘டாட்டா’ காட்டிவிட்டு, தனித்து அல்லது குறைந்தபட்ச கூட்டணிகளுடன் களமிறங்க திராவிட கட்சிகள் தயாராகி வருகின்றன. நிபந்தனைகளுடன் வரும் கட்சிகளை விட, தங்களின் தலைமைக்கு கட்டுப்படும் கட்சிகளுக்கே முன்னுரிமை அளிக்கப்படும் என்ற நிலைப்பாட்டை எடப்பாடி பழனிசாமியும், மு.க. ஸ்டாலினும் எடுத்துள்ளதாக தெரிகிறது.
விஜய்யின் தவெக முன்வைக்கும் ‘அதிகாரத்தில் பங்கு’ என்ற முழக்கம் சிறிய கட்சிகளுக்கு புதிய வாய்ப்பாகத் தெரிந்தாலும், மறுபுறம் அது சிறிய கட்சிகளின் இருப்பிற்கே ஆபத்தாகவும் மாறியுள்ளது. இதனால், சிறிய கட்சிகள் தற்போது எங்கு செல்வது என்று தெரியாமல் ஒருவித அரசியல் குழப்பத்தில் ஆழ்ந்துள்ளன. பயமுறுத்தி பணிய வைக்கும் காலம் முடிந்துவிட்டதை இக்கட்சிகள் உணர தொடங்கியுள்ளன.
தமிழக அரசியல் இனி திமுக, அதிமுக மற்றும் தவெக ஆகிய மூன்று முக்கிய சக்திகளை சுற்றியே சுழலும் என்ற பிம்பம் வலுத்து வருகிறது. நாம் தமிழர் கட்சியின் சீமான் எந்த கட்சியுடனும் கூட்டணி வைக்க மாட்டார் என்பதால் அவருக்கு பிரச்சனை இல்லை.. ஆனால் மற்ற உதிரி கட்சிகள் யாராவது ஒருவரை சார்ந்து மட்டுமே இருக்க வேண்டிய கட்டாயம் ஏற்பட்டுள்ளது. “ஒரு சதவீதம் வாக்கை வைத்து கொண்டு இனி மிரட்ட முடியாது” என்ற திராவிட கட்சிகளின் குரல், சிறிய கட்சிகளுக்கு விடுக்கப்பட்ட நேரடி எச்சரிக்கையாகவே பார்க்கப்படுகிறது. இது கூட்டணி அரசியலில் பெரிய கட்சிகளின் ஆதிக்கத்தை மீண்டும் நிலைநாட்டும் முயற்சியாகக் கருதப்படுகிறது.
முடிவாக, 2026 சட்டமன்ற தேர்தல் என்பது பல முனை போட்டியாக இருந்தாலும், அது திராவிட கட்சிகளுக்கும் தவெக-வுக்கும் இடையிலான மோதலாகவே உருமாறி வருகிறது. சிறிய கட்சிகளின் பலம் சிதறடிக்கப்படுவதால், அவை தங்களின் இருப்பை தக்க வைத்துக் கொள்ள பெரிய சமரசங்களுக்குத் தயாராக வேண்டியிருக்கும். “பேரம் பேசினால் வெளியே போ” என்ற திராவிட கட்சிகளின் புதிய அணுகுமுறை, தமிழகத்தில் கூட்டணி அரசியலில் ஒரு புதிய அத்தியாயத்தை தொடங்கியுள்ளது. இனி மக்கள் ஆதரவு அதிகம் உள்ள கட்சிகள் மட்டுமே களத்தில் நீடிக்க முடியும் என்ற நிலை உருவாகியுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
