தமிழக அரசியலில் 2026 சட்டமன்ற தேர்தலை முன்னிட்டு, காங்கிரஸ் மற்றும் தமிழக வெற்றிக் கழகம் இடையிலான கூட்டணி குறித்த விவாதங்கள் டெல்லி வரை எதிரொலிக்க தொடங்கியுள்ளன. சமீபத்தில் பிரியங்கா காந்தி வதேரா தனிப்பட்ட முறையில் மேற்கொண்ட ஒரு ரகசிய கருத்துக்கணிப்பு முடிவுகள், காங்கிரஸ் மேலிடத்தை வியப்பில் ஆழ்த்தியுள்ளதாக கூறப்படுகிறது. அந்த ஆய்வின்படி, விஜய் தலைமையிலான தவெக-வுடன் காங்கிரஸ் கரம் கோர்த்தால், தமிழகத்தில் தற்போதைய ஆட்சிக்கு எதிராக ஒரு வலுவான மாற்று உருவாகும் என்றும், இக்கூட்டணி குறைந்தது 150 தொகுதிகளில் வெற்றி பெற வாய்ப்புள்ளதாகவும் தகவல்கள் கசிந்துள்ளன.
விஜய் தரப்பில் காங்கிரஸிற்கு வழங்கப்பட்டுள்ளதாக கூறப்படும் ‘ஆஃபர்’ மிகப்பாரிய அளவில் உள்ளது. திமுக கூட்டணியில் நீண்டகாலமாக தேடிக்கொண்டிருக்கும் அதிகாரப் பகிர்வு விஜய்யின் கூட்டணியில் சாத்தியமாகும் என தெரிகிறது. குறிப்பாக, காங்கிரஸிற்கு துணை முதலமைச்சர் பதவி மற்றும் 5 முக்கிய கேபினட் அமைச்சரவை இடங்கள் என ஒரு கௌரவமான அதிகார பகிர்வை வழங்க விஜய் சம்மதம் தெரிவித்துள்ளதாக பேச்சுக்கள் அடிபடுகின்றன. தேசிய கட்சியான காங்கிரஸிற்கு, மாநில அரசில் இவ்வளவு பெரிய பங்கு கிடைப்பது தமிழக அரசியல் வரலாற்றில் ஒரு மைல்கல்லாக அமையும் என்பதில் சந்தேகமில்லை.
பிரியங்கா காந்தி இந்த வாய்ப்பை தவறவிடக்கூடாது என்பதில் மிகவும் உறுதியாக இருப்பதாக கூறப்படுகிறது. தனது தாயார் சோனியா காந்தியிடம் இது குறித்து பேசியுள்ள பிரியங்கா, “தமிழகத்தில் திமுகவின் நிழலில் இருப்பதை காட்டிலும், விஜய்யுடன் இணைவது காங்கிரஸின் எதிர்காலத்திற்கு புதிய புத்துயிர் அளிக்கும்” என வலியுறுத்தியதாக தெரிகிறது. தமிழகத்தில் ஏற்படும் இந்த தாக்கம் வெறும் எல்லையோடு முடிந்துவிடாமல், அண்டை மாநிலங்களான கேரளா மற்றும் புதுச்சேரியிலும் காங்கிரஸின் செல்வாக்கை உயர்த்த உதவும் என அவர் கணக்கு போடுகிறார். மேலும் எதிர்காலத்தில் இந்தியா கூட்டணியில் தவெகவை இணைக்கவும் பிரியங்கா காந்தி திட்டமிட்டுள்ளதாக கூறப்படுகிறது.
தமிழகத்தில் விஜய்யின் செல்வாக்கு இளைஞர்கள் மத்தியில் கட்டுக்கடங்காமல் இருப்பதை காங்கிரஸ் மேலிடம் கூர்ந்து கவனித்து வருகிறது. திமுக கூட்டணியிலிருந்து விலகி சுயமான அடையாளத்தை நிலைநிறுத்த இதுவே சரியான தருணம் என ராகுல் காந்தியின் நெருக்கமான வட்டாரங்கள் ஆலோசனை வழங்கி வருகின்றன. காங்கிரஸின் பாரம்பரிய வாக்கு வங்கியும், விஜய்யின் புதிய தலைமுறை வாக்கு வங்கியும் இணைந்தால், 150 தொகுதிகள் என்பது எட்டக்கூடிய இலக்காகவே ஆய்வுகளில் தெரியவந்துள்ளது. இது திமுக மற்றும் அதிமுக ஆகிய இரு திராவிட கட்சிகளுக்கும் ஒரே நேரத்தில் விடுக்கப்படும் சவாலாக அமையும்.
இந்த கூட்டணியால் தமிழகத்தில் மட்டுமல்லாமல், தென்னிந்தியா முழுவதிலும் காங்கிரஸிற்கு ஒரு “கிங் மேக்கர்” அந்தஸ்து கிடைக்கும் என பிரியங்கா நம்புகிறார். புதுச்சேரியில் ஆட்சியைப் பிடிக்கவும், கேரளாவில் தனது நிலையை தக்கவைக்கவும் விஜய்யின் பிரபலம் உதவும் என்பது டெல்லியின் வியூகம். இதனால்தான் விஜய்யை விட்டுவிடாதீர்கள் என்று பிரியங்கா காந்தி தொடர்ந்து கட்சி தலைமையிடம் அழுத்தம் கொடுத்து வருவதாக அரசியல் விமர்சகர்கள் குறிப்பிடுகின்றனர். அதிகாரத்தில் பங்கு என்ற விஜய்யின் வாக்குறுதி காங்கிரஸிற்கு ஒரு பெரிய தூண்டில் ஆக மாறியுள்ளது.
மொத்தத்தில் 2026 தேர்தல் களம் என்பது வெறும் ஆட்சி மாற்றத்திற்கான ஒன்றாக இல்லாமல், தமிழகத்தின் பல ஆண்டு கால அரசியல் முறையையே மாற்றியமைக்கும் ஒன்றாக அமையப்போகிறது. பிரியங்கா காந்தியின் கருத்துக்கணிப்பு உண்மையாகி, விஜய் – காங்கிரஸ் கூட்டணி அமைந்தால், தமிழகத்தின் அடுத்த முதலமைச்சர் மற்றும் துணை முதலமைச்சர் நாற்காலிகள் புதிய முகங்களால் அலங்கரிக்கப்படலாம். சோனியா மற்றும் ராகுல் காந்தியின் இறுதி முடிவு என்னவாக இருக்கும் என்பதை பொறுத்தே தமிழக அரசியலின் அடுத்த அதிரடித் திருப்பம் அமையும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
