ஜம்மு காஷ்மீர் எல்லை பகுதிகளில் சமீபகாலமாக இந்திய ராணுவம் மேற்கொண்டு வரும் தீவிர தேடுதல் வேட்டை மற்றும் அதிரடி நடவடிக்கைகள், அங்குள்ள பயங்கரவாத கட்டமைப்பின் முதுகெலும்பை உடைத்துள்ளன. கடந்த சில வாரங்களில் நிகழ்ந்த தொடர் சம்பவங்கள் தனித்தனியாக தெரிந்தாலும், அவை அனைத்தும் ஒன்றோடொன்று தொடர்புடையவை என்பதை உளவுத்துறை தகவல்கள் உறுதிப்படுத்துகின்றன.
குறிப்பாக, அகனூர் மற்றும் பூஞ்ச் செக்டர்களில் பிடிபட்ட பயங்கரவாதிகள் மற்றும் அவர்கள் ராணுவத்திடம் சரணடைந்த விதம், பாகிஸ்தான் ராணுவம் அளிக்கும் பயிற்சியின் பலவீனத்தையும், இந்திய ராணுவத்தின் ஆளுமையையும் வெளிப்படுத்துகின்றன. ஜெய்ஷ்-இ-முகமது அமைப்பை சேர்ந்த அப்துல் காலித் போன்ற பயங்கரவாதிகள் பிடிபட்டது, அந்த அமைப்பின் தகவல் தொடர்பு வலையமைப்பை தகர்க்க ஒரு முக்கியத் தொடக்கமாக அமைந்தது.
பயங்கரவாதிகள் சரணடைவதை தொடர்ந்து மேற்கொள்ளப்பட்ட தொடர்ச்சியான சோதனைகளில், சுமார் 200-க்கும் மேற்பட்ட சந்தேகத்திற்குரிய நபர்கள் விசாரிக்கப்பட்டனர். இதன் விளைவாக, பயங்கரவாதிகளின் பதுங்கு குழிகள், செயற்கைக்கோள் போன்கள், ஏகே-47 துப்பாக்கிகள் மற்றும் தகவல் தொடர்பு சாதனங்கள் பெருமளவில் பறிமுதல் செய்யப்பட்டன. இந்த நடவடிக்கையின் ஒரு பகுதியாக உதம்பூர் பகுதியில் நடந்த மோதலில், இந்திய வீரர் அம்ஜத் பதான் வீரமரணமடைந்தார். இந்த மோதல்கள் திட்டமிடப்பட்ட தாக்குதல்கள் அல்ல; மாறாக, தகவல் தொடர்பு நெட்வொர்க் உடைந்ததால் தவித்து கொண்டிருந்த பயங்கரவாதிகள், தங்களின் கூட்டாளிகளை சந்திக்க முயன்றபோது தற்செயலாக ராணுவத்திடம் சிக்கிக்கொண்ட நிகழ்வுகளாகும். ராணுவத்தின் இந்த தொடர் ‘ஸ்வீப்’ நடவடிக்கைகள் பயங்கரவாதிகளின் சுதந்திரமான நடமாட்டத்தை முற்றிலுமாக முடக்கியுள்ளன.
சமீபத்திய நிகழ்வுகளில் மிகவும் முக்கியமானது, பூஞ்ச் மாவட்டத்தின் பாலகோட் செக்டரில் பிடிபட்ட ‘ஷெஹ்னாஸ் அக்தர்’ என்ற பெண் கூரியர் ஆகும். பாகிஸ்தான் ஆக்கிரமிப்பு காஷ்மீரின் கோட்லி பகுதியை சேர்ந்த இந்த பெண், பாகிஸ்தான் ராணுவத்தின் தூண்டுதலின் பேரில் எல்லை தாண்டி ஊடுருவியுள்ளார். இவரிடம் நடத்தப்பட்ட ஆரம்பகட்ட விசாரணையில், பாகிஸ்தான் ராணுவம் இவருக்கு வெறும் 1000 ரூபாய் பணமும், ஒரு சில தகவல் தொடர்பு எண்களையும் கொடுத்து அனுப்பியது தெரியவந்துள்ளது. ஆயுதமேந்திய பயங்கரவாதிகள் கொல்லப்படும்போது அல்லது பிடிபடும்போது, எல்லைக்கு அப்பால் உள்ள கையாட்கள் தகவல் தொடர்பு பாதையைச் சோதிக்கவும், ஊடுருவல் வழிகள் பாதுகாப்பாக உள்ளதா என்பதை கண்டறியவும் இது போன்ற பெண்களை ‘கூரியர்களாக’ பயன்படுத்துவது பாகிஸ்தானின் புதிய தந்திரமாக பார்க்கப்படுகிறது.
பயங்கரவாதிகள் தற்போது ஆயுதமேந்திய ஊடுருவலை தவிர்த்து, ‘ஆயுதமற்ற ஊடுருவல்’ மூலம் இந்திய எல்லைக்குள் நுழைய முயல்கின்றனர். இது இந்திய படைகளின் எதிர்வினையை சோதிப்பதற்கான ஒரு வழியாகும். 19 வயது இளைஞன் ஒருவன் ஜம்முவில் தற்கொலை படை தாக்குதலுக்காக பிடிபட்டது முதல், இந்த பெண் கூரியர் வரை அனைவருமே ஜம்மு பகுதியை இலக்காக கொண்டுள்ளனர். காஷ்மீர் பள்ளத்தாக்கில் பாதுகாப்பு பலமாக இருப்பதால், பயங்கரவாதிகள் தங்கள் கவனத்தை ஜம்மு நோக்கி திருப்பியுள்ளனர். ஜம்மு எல்லைக்கு அருகில் இருப்பதும், அங்குள்ள சில அகதிகள் முகாம்கள் மூலம் அவர்களுக்கு உதவிகள் கிடைப்பதும் இதற்கு காரணமாக அமைகிறது. ஆனால், பாகிஸ்தானின் இந்த உத்திகளை இந்திய ராணுவம் முன்கூட்டியே கண்டறிந்து முறியடித்து வருகிறது.
தற்போது கோட்லி மற்றும் சியால்கோட் போன்ற பாகிஸ்தான் எல்லை பகுதிகளில் உள்ள பயங்கரவாத ஏவுதளங்கள் மற்றும் தகவல் தொடர்பு மையங்கள் அமைதியாக உள்ளன. வழக்கமாக ஒரு மோதல் நடந்தால் பாகிஸ்தான் தரப்பில் இருந்து வரும் சமூக ஊடக பிரச்சாரங்கள் தற்போது முற்றிலும் குறைந்துள்ளன. இதற்கு காரணம், அவர்களின் முக்கிய தகவல் தொடர்பு முனைகளை இந்திய உளவுத்துறை சிதைத்ததுதான். செயற்கைக்கோள் போன்கள் மற்றும் சிம் கார்டுகள் பறிமுதல் செய்யப்பட்டது, எல்லைக்கு அப்பால் உள்ள கையாட்களுக்கும் இங்குள்ள பயங்கரவாதிகளுக்கும் இடையிலான தொடர்பை அறுத்துள்ளது. இதன் காரணமாக, அங்குள்ள சுமார் 150-க்கும் மேற்பட்ட பயங்கரவாதிகள் ஊடுருவ தயாராக இருந்தாலும், சரியான வழிகாட்டுதலும் தகவலும் இன்றி முடங்கியுள்ளனர்.
இந்திய ராணுவம் தற்போது காஷ்மீர் பள்ளத்தாக்கை போலவே ஜம்மு பகுதியிலும் தனது பாதுகாப்பு கட்டமைப்பை வலுப்படுத்தியுள்ளது. குளிர்கால ஊடுருவல்களை தடுக்கவும், காடு சார்ந்த பகுதிகளில் நடக்கும் பயங்கரவாதிகளின் நடமாட்டத்தை முறியடிக்கவும் Search and Destroy நடவடிக்கைகள் தீவிரப்படுத்தப்பட்டுள்ளன. பாகிஸ்தானின் இந்த புதிய ‘பெண் கூரியர்’ மற்றும் ‘ஆயுதமற்ற ஊடுருவல்’ போன்ற தந்திரங்கள் இந்திய ராணுவத்தின் தீவிர கண்காணிப்பால் தோல்வியடைந்துள்ளன.
எல்லைப் பாதுகாப்பு என்பது வெறும் ராணுவ பலம் மட்டுமல்ல, அது உளவு தகவல் மற்றும் நவீன தொழில்நுட்பத்தின் ஒருங்கிணைப்பு என்பதை இந்திய படைகள் மீண்டும் ஒருமுறை நிரூபித்துள்ளன.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
