ஈரோடு மாவட்டம் விஜயமங்கலத்தில் நடைபெற்ற தமிழக வெற்றி கழகத்தின் பிரம்மாண்ட பொதுக்கூட்டம், தமிழக அரசியல் களத்தில் ஒரு புதிய அதிர்வலையை ஏற்படுத்தியுள்ளது. இந்த நிகழ்விற்கு பிறகு சமூக வலைதளங்கள் மற்றும் பல்வேறு இணையதளங்களில் நடத்தப்பட்ட கருத்துக்கணிப்புகளில், 40 சதவீதத்திற்கும் அதிகமானோர் விஜய்க்கு தங்களது ஆதரவைத் தெரிவித்துள்ளனர்.
ஒரு புதிய கட்சி, அதுவும் தேர்தல் அறிவிக்கப்படுவதற்கு முன்பே இவ்வளவு பெரிய ஆதரவை பெறுவது திராவிட கட்சிகளுக்கு விடுக்கப்பட்ட ஒரு வலுவான எச்சரிக்கையாகவே பார்க்கப்படுகிறது. குறிப்பாக, பாரம்பரியமாக ஒரு கட்சிக்கே வாக்களிக்காமல், ஆட்சியாளர்களின் செயல்பாடுகளை கவனித்து முடிவெடுக்கும் ‘நடுநிலை வாக்காளர்கள்’ தற்போது பெருமளவில் விஜய் பக்கம் சாய தொடங்கியுள்ளதை இந்த தரவுகள் உறுதிப்படுத்துகின்றன.
தமிழக அரசியலில் இதற்கு முன்பு நடிகர் விஜயகாந்த் தேமுதிக-வை தொடங்கியபோது ஒரு மிகப்பெரிய எழுச்சி ஏற்பட்டது. அதேபோல கமல்ஹாசன் மக்கள் நீதி மய்யத்தின் மூலம் ஒரு மாற்றத்தை ஏற்படுத்த முயன்றார். ஆனால், விஜயகாந்த் எட்டிய உயரத்தையோ அல்லது கமல்ஹாசன் முன்வைத்த நகர்ப்புற வாக்கு தளத்தையோ விட, விஜய் தற்போது எட்டியுள்ள கிராமப்புற மற்றும் இளைஞர்களின் ஆதரவு மிக அதிகமாக உள்ளது. விஜயகாந்தின் துணிச்சலும், கமல்ஹாசனின் கொள்கை தெளிவும் ஒருங்கே பெற்ற ஒரு தலைவராக தன்னை நிலைநிறுத்திக் கொள்ள விஜய் எடுக்கும் முயற்சிகள், கடந்த காலங்களில் மற்ற நடிகர்களால் முடியாததை அவர் சாதித்துக் காட்டுவார் என்ற நம்பிக்கையை மக்களிடையே விதைத்துள்ளது.
ஈரோடு உரையில் விஜய் ஆளும் திமுக-வை “தீய சக்தி” என்று மிக நேரடியாகவும் ஆவேசமாகவும் தாக்கியது, அவர் இனி ஒரு மென்மையான அரசியல்வாதி அல்ல என்பதை உணர்த்துகிறது. “நாங்கள் ஒரு பொருட்டே இல்லை என்றால், எங்களை பற்றி ஏன் 24 மணி நேரமும் விவாதிக்கிறீர்கள்?” என்று அவர் கேட்ட கேள்விக்கு, இணையத்தில் பலரும் “சரியான கேள்வி” என்று கமெண்ட் செய்து வருகின்றனர். அதிமுக-வின் முன்னாள் மூத்த தலைவர் செங்கோட்டையன் போன்றவர்களின் வருகை, தவெக-வின் அரசியல் முதிர்ச்சியை அதிகரித்துள்ளது. இது திராவிட கட்சிகளின் கோட்டையாக கருதப்படும் கொங்கு மண்டலத்திலேயே ஓட்டைகளை விழுத்த தொடங்கியுள்ளதை இன்றைய சூழல் காட்டுகிறது.
பெரியாரின் பெயரை சொல்லிக்கொண்டு குடும்ப அரசியல் செய்பவர்களையும், ஊழல் புகாரில் சிக்கிய அமைச்சர்களையும் விஜய் வன்மையாகச் சாடியது, விளிம்புநிலை மக்களின் கவனத்தை ஈர்த்துள்ளது. குறிப்பாக, தமிழகத்தில் 200-க்கும் மேற்பட்ட அரசுப் பள்ளிகள் மூடப்பட்டது குறித்து அவர் எழுப்பிய புள்ளிவிவர ரீதியான கேள்விகள், அவர் வெறும் ‘வசனம்’ பேசும் நடிகர் அல்ல, மாறாக தரவுகளுடன் களம் இறங்கியுள்ள அரசியல்வாதி என்பதை பறைசாற்றுகிறது. இந்த தெளிவும் வேகமும் தான் நடுநிலை வாக்காளர்களை, குறிப்பாக படித்த இளைஞர்களையும் பெண்களையும் தவெக நோக்கி ஈர்க்கும் காந்தசக்தியாக மாறியுள்ளது.
எதிர்கால கணிப்புகளின்படி, இன்னும் ஐந்து மாதங்களில் தமிழக அரசியலில் பல அதிரடி மாற்றங்கள் நிகழக்கூடும். அதிமுக உள்பட இன்னும் சில கட்சிகளில் இருந்து மேலும் சில முக்கிய தலைவர்கள் தவெகவில் இணையக்கூடும் என்றும், அதுவரை அமைதி காக்கும் மற்ற கட்சிகள் தேர்தல் நெருங்கும் போது தங்கள் நிலைப்பாட்டை மாற்றிக்கொள்ளக்கூடும் என்றும் அரசியல் வட்டாரங்கள் தெரிவிக்கின்றன. 2026-ல் ஒரு மும்முனை அல்லது நான்கு முனை போட்டி நிலவும் பட்சத்தில், திராவிட கட்சிகளின் வாக்குகளை விஜய் கணிசமாக பிரிப்பார் என்பது உறுதி. இப்போது கிடைத்துள்ள 40 சதவீத ஆதரவு என்பது ஆன்லைன் மூலம் எடுக்கப்பட்ட ஒரு கணிப்பு தான்.. ஆன்லைனில் ஓட்டு போடுபவர்கள் பூத்துக்கு வந்து ஓட்டு போடுவார்களா? என்ற ஒரு சந்தேகமும் உள்ளது. இது தவெக-வின் அடுத்தகட்ட சவாலாக இருக்கும்.
மொத்தத்தில் விஜய் தனது உரையில் “எனக்கு பயமில்லை” என்று கூறியது, திரண்டிருந்த லட்சக்கணக்கான தொண்டர்களுக்கு ஒரு மிகப்பெரிய ஊக்க மருந்தாக அமைந்துள்ளது. அரசியல் சூழ்ச்சிகளையும், ஊடகங்களின் எதிர்மறை விமர்சனங்களையும் கடந்து, மக்களின் நேரடி ஆதரவை மட்டுமே நம்பி அவர் எடுக்கும் இந்த ரிஸ்க், தமிழக அரசியலில் ஒரு புதிய அத்தியாயத்தை எழுதும் என எதிர்பார்க்கப்படுகிறது. இன்னும் ஐந்து மாதங்களில் தேர்தல் களம் சூடுபிடிக்கும் போது, இந்த 40 சதவீத ஆதரவு ஒரு மிகப்பெரிய அரசியல் சுனாமியாக மாறுமா என்பதை பொறுத்திருந்துதான் பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
