தமிழக அரசியல் களம் தற்போது புதிய கட்சிகளின் எழுச்சியால் பல மாற்றங்களை காண்கிறது. இந்த சூழலில், நாம் தமிழர் கட்சியின் ஒருங்கிணைப்பாளராக சீமான் இருக்கும் நிலையில், அண்மையில் த.வெ.க, மூத்த தலைவர் செங்கோட்டையனை தனது கட்சியின் ஒருங்கிணைப்பாளராக நியமித்துள்ளது. இந்த அறிவிப்பு, இந்த பதவிக்கு பின்னால் உள்ள அரசியல் உள்குத்து என்ன? எதிர்காலத்தில் சீமானின் விமர்சனங்களுக்கு செங்கோட்டையன் பதிலடி கொடுப்பாரா? போன்ற பல கேள்விகளை அரசியல் நோக்கர்கள் மத்தியில் எழுப்பியுள்ளது.
பாரம்பரியமாக கட்சிகளில் ‘பொதுச்செயலாளர்’ அல்லது ‘தலைவர்’ போன்ற பதவிகளே அதிகார மையங்களாக இருந்தன. ஆனால், புதிய கட்சிகளில் ‘ஒருங்கிணைப்பாளர்’ பதவிக்கு அதிக முக்கியத்துவம் அளிப்பதற்கு காரணம், அது கட்சியின் அனைத்து மட்டங்களிலான நிர்வாகிகளையும், தொண்டர்களையும், செயல்பாடுகளையும் ஒரே குடையின் கீழ் திரட்டும் பணியை செய்கிறது. இது தலைவருக்கு கீழே அதிகாரத்தை உறுதிப்படுத்தும் ஓர் அமைப்பாக செயல்பட முடியும்.
குறிப்பாக, த.வெ.க. தலைவர் நடிகர் விஜய் பெரும்பாலும் கட்சியின் முகமாகவும் பிரசார பீரங்கியாகவும் மட்டுமே இருப்பார். இந்த நிலையில், நிர்வாக பணிகள், அரசியல் உத்திகள் வகுத்தல் மற்றும் மூத்த அரசியல்வாதிகளை சந்தித்து உரையாடுதல் போன்ற செயல்பாடுகளுக்கு, செங்கோட்டையன் போன்ற அனுபவம் மிக்க ஒருவர் ஒருங்கிணைப்பாளராக இருப்பது, கட்சிக்கு உடனடியாக நிர்வாக ரீதியான நம்பகத்தன்மையை வழங்குகிறது.
திமுக, அதிமுக போன்ற பிரதான கட்சிகளில் ‘ஒருங்கிணைப்பாளர்’ என்ற பதவியே இருப்பதில்லை. இதற்கு காரணம், இந்த கட்சிகளின் தலைவர்கள் ஏற்கனவே தங்களை முழுமையாக நிரூபித்த ஆளுமைகள். அவர்களிடம் அதிகாரம் தெளிவாக குவிந்துள்ளது. அவர்களுக்கு நிர்வாகத்தை கவனிக்க ஒரு துணை ஆளுமை தேவை இல்லை. மேலும், இந்த கட்சிகளில் ஒருங்கிணைப்பாளர் போன்ற பதவிகள் அதிகார மோதல்களுக்கு வழிவகுக்கும் என்பதால், அவை நிரந்தரமான முதன்மை பதவிகளாக நிலைநிறுத்தப்படுவதில்லை.
நாம் தமிழர் கட்சியின் ஒருங்கிணைப்பாளரான சீமானுக்கும், விஜய்க்கும் இடையே தமிழக அரசியலின் புதிய இடத்தை கைப்பற்றுவதில் நேரடி அரசியல் மோதல் இருக்கும். இந்த சூழலில் செங்கோட்டையன் நியமிக்கப்பட்டதற்கான முக்கிய உள்குத்து, விஜய்க்கு ஒரு அரசியல் கேடயத்தை உருவாக்குவதுதான். இனி சீமான் போன்றோர் அரசியல் ரீதியான விமர்சனங்களை முன்வைக்கும்போது, ஐம்பது ஆண்டுகால அரசியல் அனுபவம் கொண்ட செங்கோட்டையனால் மட்டுமே, சீமானின் அரசியல் ஆழம், கொள்கை நிலைப்பாடு மற்றும் வாக்குறுதிகளுக்கு சவால் விட்டு, அனுபவத்தால் முறியடிக்க முடியும்.
சுருக்கமாக சொன்னால், செங்கோட்டையனின் ஒருங்கிணைப்பாளர் பதவி வெறுமனே நிர்வாக பதவி மட்டுமல்ல. அது த.வெ.க.வின் அரசியல் கேடயத்தை உருவாக்குவதற்கும், தமிழக அரசியல் களத்தில் சீமான் போன்ற தலைவர்களிடமிருந்து வரும் கடுமையான விமர்சனங்களை சமாளிப்பதற்கும் உருவாக்கப்பட்ட ஒரு நடவடிக்கை ஆகும். இது, வரவிருக்கும் தேர்தல்களில் இரு கட்சிகளுக்கும் இடையேயான மோதலை அடுத்த கட்டத்திற்கு கொண்டு செல்லும் என்பது உறுதி.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
