ரஷ்ய அதிபர் விளாடிமிர் புதின் டிசம்பர் 4 முதல் 5 வரை இந்தியாவுக்கு வருகை தர உள்ளார் என்ற அதிகாரப்பூர்வ அறிவிப்பு, உலக அரசியல் அரங்கில் பெரும் கவனத்தை பெற்றுள்ளது. ஜி20 போன்ற மாநாடுகளுக்குக்கூட சமீபத்தில் அவர் பயணிக்காத நிலையில், சீனாவுக்கு அடுத்தபடியாக இந்தியாவுக்கு அவர் வருவது, இரு நாடுகளின் உறவு மீதான புதினின் நம்பிக்கையையும் அதன் முக்கியத்துவத்தையும் காட்டுகிறது. தற்போது உலகம் ஒரு பெரிய அரசியல் குழப்பத்தை நோக்கி சென்றுகொண்டிருக்கும் வேளையில், ஒரே மாதிரியான சிந்தனைகளையும், இலக்குகளையும் கொண்ட இரு நாடுகள், உலகின் போக்கை தீர்மானிக்க என்ன செய்ய முடியும் என்பதை கவனிக்க வேண்டியுள்ளது.
இந்தியா – ரஷ்யா இடையேயான இந்த மாநாட்டில், பாதுகாப்பு ஒப்பந்தங்கள் குறித்து விரிவான பேச்சுவார்த்தைகள் நடைபெறும். இருப்பினும், இரு நாடுகளுக்கும் இடையே பொருளாதார ரீதியிலான முன்னேற்றங்கள் குறித்தும் விவாதிக்கப்படலாம். மேற்கத்திய நாடுகளின் தடைகள் காரணமாக, இந்திய நிறுவனங்கள் ரஷ்யாவில் முதலீடு செய்யும்போது எச்சரிக்கையுடன் இருக்கின்றன. இந்த சவால்களை எதிர்கொண்டு, இரு நாடுகளுக்குமிடையே தடையற்ற வர்த்தக ஒப்பந்தத்தை ஏற்படுத்துவது குறித்தும், வர்த்தக பரிமாற்றங்களை அடுத்த கட்டத்திற்கு கொண்டு செல்வது குறித்தும் முடிவுகள் எடுக்கப்பட வாய்ப்புள்ளது.
இந்தியா-ரஷ்யா உறவுகள் வலுப்படும் வேளையில், நேட்டோ உறுப்பு நாடான ஹங்கேரியின் அதிபர் விக்டர் ஆர்பன், ரஷ்ய அதிபர் புதினை சந்தித்திருப்பது கவனிக்கத்தக்க ஒரு நிகழ்வாகும். ஹங்கேரி போன்ற கிழக்கு ஐரோப்பிய நாடுகள் இன்னும் ரஷ்ய எரிசக்தியை அதிகளவில் நம்பியிருப்பதால், இந்த சந்திப்பு, பிற ஐரோப்பிய நாடுகளின் ரஷ்ய உறவுகளை மீண்டும் புதுப்பிக்க வழிவகுக்கலாம். ஒருபுறம் அமெரிக்காவுடன் வர்த்தக பேச்சுவார்த்தைகள் மற்றும் உக்ரைன் விவகாரத்தில் பேச்சுவார்த்தை நடத்தினாலும், மறுபுறம் அமெரிக்காவின் நலன்களுக்கு எதிராக ‘பிரிக்ஸ்’ போன்ற ஒரு புதிய உலக கட்டமைப்பை உருவாக்க இந்த சந்திப்புகள் உதவுமா என்பதையும் பார்க்க வேண்டும்.
அமெரிக்க அதிபர் டிரம்ப் பிரிக்ஸ் குழுவுக்கு எதிராக பேசியுள்ள நிலையில், இந்த குழுவை மீண்டும் வலுப்படுத்தவும், அதன் செல்வாக்கை பெருக்கவும் ஒரு நடவடிக்கை தேவைப்படுகிறது. அடுத்த சில ஆண்டுகளில் உலக அரசியலில் பெரிய மாற்றங்கள் நிகழும் நிலையில், பிரிக்ஸ் அமைப்பில் வர்த்தக கட்டமைப்பு உருவாக்குவது, உறுப்பு நாடுகளை ஒருங்கிணைப்பது, மேலும் பல நாடுகளை சேர்ப்பது போன்ற பெரிய அறிவிப்புகள் புதின் வருகையின்போது வெளியாகுமா என்ற எதிர்பார்ப்பு நிலவுகிறது. 2026-ஆம் ஆண்டு இந்தியா பிரிக்ஸ் தலைமை பொறுப்பை ஏற்கும் பட்சத்தில், ஜி20-இல் ஆப்பிரிக்கன் யூனியனை சேர்த்தது போல, பிரிக்ஸிலும் ஒரு பெரிய மாற்றத்தை கொண்டு வர பிரதமர் மோடி திட்டமிடலாம்.
இந்தப் பேச்சுவார்த்தையில் ஆப்கானிஸ்தானில் தற்போதுள்ள நிலவரம் மற்றும் தீவிரவாத அச்சுறுத்தல்கள் குறித்தும் முக்கியமாக விவாதிக்கப்பட வாய்ப்புள்ளது. அமெரிக்கா மீண்டும் ஆப்கானிஸ்தானில் தலையிட முயலும் பட்சத்தில், மத்திய ஆசிய பிராந்தியத்திற்கு அதன் அச்சுறுத்தல் குறித்து ரஷ்யா அமைதியாக இருக்காது. இது தவிர, வங்காள விரிகுடாவில் ரஷ்யாவின் ஆர்வம் மீண்டும் அதிகரித்துள்ளது. 1971 போருக்கு பிறகு வங்காள விரிகுடாவில் அமெரிக்காவும் ரஷ்யாவும் செல்வாக்கு செலுத்தாமல் இருக்க ஒரு புரிதல் இருந்த நிலையில், தற்போது அமெரிக்காவின் நகர்வுகள் காரணமாக, இந்தியா அல்லாத மற்ற அண்டை நாடுகளில் ரஷ்யாவின் ஊடுருவல் அதிகரிக்க வாய்ப்புள்ளது.
புதின் – மோடி சந்திப்பானது உலகளாவிய கவனத்தை ஈர்த்துள்ளது. குறிப்பாக, இந்த சந்திப்பு குறித்த செய்திகளையும், அது ஏற்படுத்தும் விளைவுகளையும் மேற்கத்திய நாடுகள் மிகுந்த ஆர்வத்துடன் கவனிக்கும். மேலும், இந்த சந்திப்பினால் சில அரசியல் நாடகங்கள் அரங்கேறலாம் எனவும் எதிர்பார்க்கப்படுகிறது. பிரதமர் மோடிக்கு எதிராக மேற்கத்திய நாடுகளில் இருந்து ஏதேனும் எதிர்மறையான அறிக்கைகள் அல்லது ஆதாரமற்ற குற்றச்சாட்டுகள் வரக்கூடும். ஆனால், இந்திய பிரதமர் இத்தகைய அழுத்தங்களை சமாளிக்கும் திறன் கொண்டவர் என்றும், அத்தகைய தாக்குதல்கள் அவருக்கு ஆதரவான அனுதாப அலையை மேலும் அதிகரிக்கவே செய்யும் என்றும் அரசியல் விமர்சகர்கள் கருத்து தெரிவிக்கின்றனர்
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
