அரிய வகை உலோகங்களால் ஆன நிரந்தர காந்தங்களின்உள்நாட்டு உற்பத்தியை பெருக்கும் வரலாற்று சிறப்புமிக்க நடவடிக்கையாக, பிரதமர் நரேந்திர மோடி தலைமையிலான மத்திய அமைச்சரவை ரூ.7,280 கோடி மதிப்பிலான திட்டத்திற்கு ஒப்புதல் அளித்துள்ளது. இந்த திட்டம், அரிய வகை நிரந்தர காந்தங்களுக்கான முழுமையான ஒருங்கிணைந்த சுற்றுச்சூழல் அமைப்பை இந்தியாவில் உருவாக்குவதை நோக்கமாக கொண்டதாகும். இதன் மூலம், இத்துறையில் உலகளவில் ஆதிக்கம் செலுத்தி வரும் சீனாவுக்கு சவால் அளிக்கும் ஒரு வலுவான அடித்தளத்தை இந்தியா அமைக்கிறது.
இந்த திட்டத்தின் முக்கிய நிதி அம்சங்களில், ஐந்து ஆண்டுகளுக்கு விற்பனையுடன் இணைக்கப்பட்ட ஊக்கத்தொகையாக ரூ.6,450 கோடி ஒதுக்கப்பட்டுள்ளது. அத்துடன், தேர்ந்தெடுக்கப்பட்ட ஐந்து உற்பத்தியாளர்களுக்கு மூலதன மானியமாக ரூ.750 கோடி வழங்கப்பட உள்ளது. இந்தத் திட்டத்தின் கீழ், மொத்தம் வருடத்திற்கு 6,000 மெட்ரிக் டன் உற்பத்தி திறனை உருவாக்க இலக்கு நிர்ணயிக்கப்பட்டுள்ளது. மின்னணுவியல், ஆட்டோமொபைல் மற்றும் எஃகு போன்ற துறைகளை சேர்ந்த பொது மற்றும் தனியார் நிறுவனங்கள் உலகளாவிய ஏல செயல்முறையின் மூலம் இதில் பங்கேற்கலாம்.
இந்த திட்டத்தின் இறுதி இலக்கு, அடுத்த 3 முதல் 4 ஆண்டுகளுக்குள் அரிய வகை நிரந்தர காந்த உற்பத்தியில் இந்தியாவை தன்னிறைவு அடைய செய்வதாகும். இது இந்தியாவின் செமிகண்டக்டர் மற்றும் முக்கியமான தாதுக்கள் திட்டங்களுடன் ஒத்திசைக்கப்பட்டுள்ளது. இத்திட்டம், வசதிகளை நிறுவுவதற்கான இரண்டு வருட ஆரம்பகட்ட காலம் உட்பட மொத்தம் 7 ஆண்டுகள் கால அவகாசத்தை கொண்டுள்ளது. இது, இத்துறையில் நீண்ட கால நிலைத்தன்மையை உறுதி செய்வதை நோக்கமாக கொண்டது.
தற்போது உலகளாவிய அரிய வகை காந்த சந்தையில் கிட்டத்தட்ட 90% சீனாவே கட்டுப்படுத்துகிறது. இந்த ஆதிக்கம், சீனாவுக்கு மிகப்பெரிய அரசியல் செல்வாக்கை கொடுக்கிறது. சமீபத்திய ஆண்டுகளில் சீனா தனது ஏற்றுமதி விதிமுறைகளை கடுமையாக்கியபோது, அது இந்திய மின்சார வாகனங்கள் மற்றும் மின்னணு உற்பத்தியாளர்கள் உட்பட உலகளாவிய விநியோக சங்கிலிகளைப் பெரிதும் பாதித்தது. இந்த சூழலில், இந்தியாவின் இந்த முயற்சி ஒரு அத்தியாவசிய நடவடிக்கையாக கருதப்படுகிறது.
இந்தியாவிடம் 6.9 மில்லியன் டன் அரிய வகை உலோக இருப்பு இருந்தாலும், அவற்றை சுத்திகரிப்பு, பிரித்தல் மற்றும் காந்த உற்பத்தி செய்யும் திறன் சீனாவால் ஆதிக்கம் செலுத்தப்படுகிறது. இந்த உற்பத்தித் திறன்கள் இந்தியாவில் இல்லாததே ஒரு பெரிய குறைபாடாகும். இந்த புதிய திட்டம், சுரங்கம் முதல் இறுதி காந்த உற்பத்தி வரை அனைத்து நிலைகளிலும் உள்நாட்டுத் திறனை வளர்ப்பதை நோக்கமாக கொண்டுள்ளது. இதன் மூலம், இந்தியா இறக்குமதி சார்பு நிலையை குறைத்து, எதிர்காலத்தில் எழும் எந்தவொரு புவிசார் அரசியல் அதிர்ச்சிகளிலிருந்தும் தனது தொழில்களைப்பாதுகாக்கும்.
அரிய வகை நிரந்தர காந்தங்கள் என்பவை மின்சார வாகன மோட்டார்கள், காற்றாலை விசையாழிகள், ஸ்மார்ட்போன்கள், லேப்டாப்கள், விண்வெளி மற்றும் போர் விமானங்கள் உட்பட மற்றும் ரோபோடிக்ஸ் போன்ற துறைகளில் இன்றியமையாத அங்கங்களாக உள்ளன.
இந்தியாவின் வருடாந்திர காந்த தேவை 4,000 முதல் 5,000 டன் ஆகும், இது 2030-க்குள் இரட்டிப்பாகும் என எதிர்பார்க்கப்படுகிறது. இன்னும் சில ஆண்டுகளில் இந்தியா, காந்த தேவையில் தன்னிறவை பெற்றுவிடும் என எதிர்பார்க்கப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
