தமிழக அரசியலில் ‘தமிழக வெற்றிக் கழகத்தின்’ தலைவர் விஜய்யின் அடியெடுத்து வைப்பு, பாரம்பரிய திராவிட கட்சிகளுக்குப் புதிய சவாலை ஏற்படுத்தியுள்ளது. குறிப்பாக அ.தி.மு.க. பிளவுபட்டு பலவீனமாக இருக்கும் நிலையில், த.வெ.க. அ.தி.மு.க.வுடன் கூட்டணி வைக்காமல், அந்த கட்சியின் முக்கியப் பிரமுகர்களை தன் பக்கம் ஈர்த்து, பலம் சேர்க்கும் வியூகத்தை அமைப்பதாக அரசியல் வட்டாரங்கள் தெரிவிக்கின்றன.
கோபிசெட்டிப்பாளையம் எம்.எல்.ஏ.வாக இருந்த கே.ஏ. செங்கோட்டையன் தனது சட்டமன்ற உறுப்பினர் பதவியை ராஜினாமா செய்துள்ள நிலையில், அவர் விஜய் தலைமையிலான த.வெ.க.வில் இணையவிருப்பது கிட்டத்தட்ட உறுதியாகியுள்ளது. இந்த சம்பவம் ஒரு தொடக்கம் மட்டுமே என்றும், மேலும் பல அ.தி.மு.க. முக்கியப் புள்ளிகள் த.வெ.க.வில் இணைய வாய்ப்புள்ளதாகவும் கூறப்படுகிறது.
அ.தி.மு.க. தற்போது எடப்பாடி பழனிசாமி, ஓ.பன்னீர்செல்வம், டி.டி.வி. தினகரன், சசிகலா என பிளவுபட்டுள்ள நிலையில், அவர்களுடன் கூட்டணி வைப்பது த.வெ.க.வுக்கு பலனளிக்காது என்று அக்கட்சி தலைமை கருதுவதாக கூறப்படுகிறது. அ.தி.மு.க.வின் பாரம்பரிய அரசியலும், அதன் சமீபத்திய உட்கட்சிப் பூசல்களும், விஜய்யின் புதிய அரசியல் பாதையில் தேவையற்ற சுமையாக இருக்கலாம்.
புதிய கட்சியை தொடங்கும் விஜய், அ.தி.மு.க.வின் பலவீனத்தை பயன்படுத்திக்கொள்ள, அக்கட்சியின் பிளவுபட்ட பிம்பம் ஒட்டாமல், அதன் பலமான தலைவர்களையும், அடிமட்டத் தொண்டர்கள் ஆதரவையும் நேரடியாக கவர்வதே புத்திசாலித்தனமான உத்தி என்று நம்பப்படுகிறது.
“சில முக்கியப் பிரமுகர்கள் த.வெ.க.வில் ஐக்கியமாகிவிட்டால், அது அ.தி.மு.க.வுடன் கூட்டணி வைத்ததற்கு சமம் அல்லது அதைவிட அதிக பலம் வாய்ந்தது” என்று அரசியல் பார்வையாளர்கள் கூறுகின்றனர்.
கே.ஏ. செங்கோட்டையன், கொங்கு மண்டலத்தில் உள்ள கோபிசெட்டிப்பாளையம் தொகுதியில் 8 முறை வென்று, அ.தி.மு.க.வின் மிக மூத்த தலைவர்களில் ஒருவராக விளங்குகிறார். இவரது ராஜினாமா, கொங்கு மண்டல அரசியலில் த.வெ.க.வின் நுழைவுக்கான கதவை திறந்துள்ளது.
அவரைத் தொடர்ந்து, அ.தி.மு.க.வின் ஓ.பி.எஸ். அணியை சேர்ந்த ஒரு முக்கிய புள்ளியும் விரைவில் த.வெ.க.வில் இணைய பேச்சுவார்த்தை நடத்தி வருவதாக நம்பத்தகுந்த வட்டாரங்கள் தெரிவிக்கின்றன. ஓ.பி.எஸ். அணியினர் நீண்ட காலமாகவே அ.தி.மு.க.வில் நிலவும் பிளவினால் அதிருப்தியில் உள்ளனர். மேலும், ஓ.பி.எஸ்.ஸின் செல்வாக்கு குறைந்திருக்கும் நிலையில், அவர் அணியை சேர்ந்தவர்கள் தங்கள் அரசியல் எதிர்காலத்திற்காக விஜய்யின் பக்கம் செல்லலாம் என்று எதிர்பார்க்கப்படுகிறது.
ஓ.பி.எஸ். அணியின் அந்த முக்கிய புள்ளி இணைய நேர்ந்தால், அது தென் மாவட்டங்கள் மற்றும் தேவர் சமூக வாக்குகளை பெறுவதில் த.வெ.க.வுக்கு பெரிய பலமாக அமையும்.
அ.ம.மு.க.வின் தலைவரான டி.டி.வி. தினகரனும் த.வெ.க. தலைவர் விஜய்யுடன் மறைமுகப் பேச்சுவார்த்தை நடத்தி வருவதாக ஒரு தகவல் தமிழக அரசியல் அரங்கில் றெக்கை கட்டிப் பறக்கிறது. டி.டி.வி. தினகரன் அணி, அ.தி.மு.க.வுடன் இணையும் முயற்சி பலனளிக்காத நிலையில், நாடாளுமன்ற தேர்தலில் பெற்ற பின்னடைவுகளால், டி.டி.வி.யின் அரசியல் பாதையில் அடுத்த கட்ட நகர்வு அவசியம் என்ற நிலையில் அவர் உள்ளார்.
ஒருவேளை டி.டி.வி. தினகரன் த.வெ.க.வுடன் இணைந்தாலோ அல்லது கூட்டணி அமைத்தாலோ, மறைமுகமாக சசிகலாவின் ஆதரவாளர்களின் வாக்குகளையும், தென் மாவட்டங்களில் உள்ள கணிசமான அம்மா விசுவாசிகளின் ஆதரவையும் விஜய் பெற வாய்ப்புள்ளது.
இந்த மூன்று பிளவுபட்ட தரப்புகளில் உள்ள முக்கிய தலைவர்கள் மற்றும் தொண்டர்கள் விஜய்யின் கீழ் ஒன்று சேரும்பட்சத்தில், அது தமிழக அரசியலில் அ.தி.மு.க.வின் எதிர்காலத்தை கேள்விக்குறியாக்கும்.
த.வெ.க. தலைவர் விஜய், புதிதாக ஒரு கட்சியை தொடங்கினாலும், அனுபவம் வாய்ந்த அரசியல் தலைவர்கள், தேர்தல் வியூகங்களை அறிந்த நிர்வாகிகள் மற்றும் ஒரு பெரிய கட்சியின் அடிமட்டத் தொண்டர்கள் ஆதரவு அவருக்கு தேவைப்படுகிறது. அ.தி.மு.க.வின் பிரபலங்களை தன்பக்கம் இழுப்பதன் மூலம் பல ஆண்டுகால அரசியல் அனுபவம் மற்றும் நிர்வாகத் திறன்கள் த.வெ.க.வுக்கு கிடைக்கும். பிராந்தியரீதியாகவும், சமூக ரீதியாகவும் அ.தி.மு.க. பாரம்பரியமாக பெற்றிருந்த ஆதரவு தளத்தின் ஒரு பகுதி த.வெ.க.வுக்கு மாறும்.
இதனால், எந்த ஒரு கட்சியுடனும் கூட்டணி வைக்காமல், அ.தி.மு.க.வின் முக்கியப் பகுதிகளை கவர்ந்து, அந்த கட்சிக்கு இணையான சக்தியாக த.வெ.க. உருவாக வாய்ப்புள்ளது.
செங்கோட்டையனின் ராஜினாமா தொடங்கி, ஓ.பி.எஸ். மற்றும் டி.டி.வி. தினகரன் அணிகளின் முக்கிப் பிரமுகர்கள் நகர்வு வரை, தமிழக அரசியல் களம் அடுத்த சில வாரங்களில் பல முக்கிய அரசியல் திருப்பங்களைக் காணும் என்று எதிர்பார்க்கப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
