இந்திய கடற்படையின் கடலோர பாதுகாப்பை மேலும் பலப்படுத்தும் ஒரு முக்கிய நடவடிக்கையாக, முழுவதுமாக உள்நாட்டில் தயாரிக்கப்பட்ட நீர்மூழ்கி கப்பல் எதிர்ப்பு போர்க் கப்பலான ‘ஐ.என்.எஸ். மாஹே’ முறைப்படி சேவையில் ஈடுபடுத்தப்பட்டுள்ளது. உள்நாட்டிலேயே ஆழம் குறைந்த நீரில் நீர்மூழ்கி கப்பல் எதிர்ப்பு போரை மேற்கொள்ள வடிவமைக்கப்பட்ட மாஹே வகுப்பின் முதல் கப்பல் இதுவாகும்.
மும்பையில் உள்ள கடற்படை கப்பல்துறையில் நடைபெற்ற ஒரு விழாவில், துணை அட்மிரல் கிருஷ்ணா சுவாமிநாதன் தலைமை வகிக்க, இராணுவத் தளபதி முன்னிலையில் இந்த கப்பல் கடற்படையில் இணைக்கப்பட்டது. இந்த கப்பலின் வருகையால், இந்தியாவின் கடலோர பகுதிகளில் உள்ள நீரடி அச்சுறுத்தல்களை கண்காணிக்கும் கடற்படையின் திறன் கணிசமாக விரிவடைகிறது.
‘ஐ.என்.எஸ். மாஹே’ கப்பல், பிரத்யேகமாக கடற்கரை மற்றும் ஆழம் குறைந்த நீரில் நீர்மூழ்கிக் கப்பல் எதிர்ப்பு நடவடிக்கைகளுக்காக வடிவமைக்கப்பட்டுள்ளது.
இந்தக் கப்பலின் 80%-க்கும் அதிகமான பாகங்கள் இந்திய உற்பத்தியாளர்களிடம் இருந்து பெறப்பட்டவை. இது தற்சார்பு இந்தியா இலக்கிற்கு ஒரு சிறந்த சான்றாக விளங்குகிறது.
இந்த கப்பலில் மேம்பட்ட சென்சார்கள் அதிநவீன தகவல் தொடர்பு அமைப்புகள் மற்றும் துல்லியமான தாக்குதல் திறன்கள் உள்ளன. இது எதிரி நாட்டு நீரடி தளங்களை கண்டறிந்து, பின்தொடர்ந்து, அழிக்கும் ஆற்றலை வழங்குகிறது.
இந்தக் கப்பலில் ஏ.பி.எஸ். சோனார் அமைப்பு பொருத்தப்பட்டுள்ளது. இது உள்நாட்டிலேயே வடிவமைக்கப்பட்டு, ஆழம் குறைந்த நீருக்காக சிறப்பாக உருவாக்கப்பட்டது.
ஐ.என்.எஸ். மாஹே, டார்பிடோ மற்றும் ராக்கெட் அடிப்படையிலான ஆயுதங்களுடன், அதன் பின்பகுதியில் பொருத்தப்பட்ட டார்பிடோ டிஃபன்ஸ் லாஞ்சர்களையும் கொண்டுள்ளது. எதிரி நீர்மூழ்கிக் கப்பல் நம்மை நோக்கி ஒரு டார்பிடோவை ஏவும்போது, இந்த கப்பல் தன்னியக்கமாக ஒரு ஆயுதத்தை ஏவி, எதிரியின் டார்பிடோவை திசை திருப்பி, ஏமாற்றும் திறன் கொண்டது. மேலும், தேடுதல் மற்றும் மீட்புப் பணிகளுக்காகப் பயன்படுத்தப்படும் ரப்பர் படகும் இதில் உள்ளது.
இந்தக் கப்பலுக்கு கேரளாவின் மலபார் கடற்கரையோரத்தில் உள்ள கடலோர நகரமான மாஹேவின் பெயர் சூட்டப்பட்டுள்ளது. ‘சிறுத்தை’ இதன் சின்னமாக செயல்படுகிறது. இது வேகம் மற்றும் உறுதியான கவனத்தைக் குறிக்கிறது.
இதில் அமைதியான வேட்டைக்காரர்கள் (Silent Hunters) என்ற வாசகம் உள்ளது. இது கப்பலின் திருட்டுத்தனம் மற்றும் எந்த நேரத்திலும் தயாராக இருக்கும் தன்மையை உணர்த்துகிறது.
கார்டன் ஷிப்யார்ட் லிமிடெட் நிறுவனத்தால் கட்டப்பட்ட இந்த ‘மாஹே’ வகை கப்பல்களில் இது முதலாவது ஆகும். மொத்தம் எட்டு கப்பல்களை கொண்ட இந்த வகுப்பில், அடுத்த கப்பலான ‘ஐ.என்.எஸ். மால்வன்’ (INS Malwan) அடுத்த ஆண்டு மார்ச் மாதத்திற்குள் கடற்படையுடன் இணையும் என்று எதிர்பார்க்கப்படுகிறது. மேலும் ஏழு கப்பல்கள் இந்திய கடலோர மற்றும் நீர்மூழ்கி எதிர்ப்புப் போர்த் திறனை மேலும் வலுப்படுத்தவுள்ளன.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
