தமிழக அரசியல் களத்தில், தி.மு.க.வை வீழ்த்த வேண்டும் என்ற முனைப்பில் தேசிய கட்சியான பா.ஜ.க. பல வியூகங்களை வகுத்து வருகிறது. இதில், அ.தி.மு.க.வுடன் பா.ஜ.க. மீண்டும் கூட்டணி அமைத்தாலும் இந்த கூட்டணியை மேலும் வலிமைப்படுத்த முயற்சிப்பது போன்ற நகர்வுகள் இருக்கின்றன. இந்நிலையில், எடப்பாடி பழனிசாமி இடம், டெல்லி பா.ஜ.க. தலைமை ஒரு கறார் கண்டிஷனை விதித்ததாக அரசியல் வட்டாரங்களில் பரபரப்பான தகவல்கள் வெளியாகியுள்ளன.
தமிழக அரசியலில் கூட்டணி அமைப்பதில் தவிர்க்க முடியாத சக்திகளாக ஒருகாலத்தில் பார்க்கப்பட்ட தே.மு.தி.க. மற்றும் பா.ம.க. போன்ற கட்சிகள், தற்போது தி.மு.க.வை வீழ்த்தும் அளவுக்கு பெரிய சக்தியாக இல்லை என்று பா.ஜ.க. தலைமை கருதுவதாகத்தெரிகிறது.
“வரும் தேர்தலில் தி.மு.க.வின் முழு பலத்தையும் எதிர்கொள்ள, நீங்கள் தே.மு.தி.க. அல்லது பா.ம.க.வை மட்டுமே நம்பி இருக்க முடியாது. அந்த கட்சிகளால் தி.மு.க.வின் வாக்கு வங்கியில் பெரிய ஓட்டையை ஏற்படுத்த முடியாது” என்று பா.ஜ.க. தலைமை ஈ.பி.எஸ்.ஸிடம் தெளிவுபடுத்தியதாக கூறப்படுகிறது. இது ஈபிஎஸ்க்கும் நன்றாக தெரியும்.
தமிழகத்தில் தி.மு.க.வுக்கு எதிராக வலிமையான ஒரு புதிய அலையை உருவாக்க, மக்கள் மத்தியில் நேரடி ஈர்ப்பு கொண்ட ஒரு மெகா ஸ்டார் கட்டாயம் தேவை என்று பா.ஜ.க. தலைமை நம்புகிறது. அந்த மாற்று சக்தியாக தற்போது அவர்கள் விஜய்யின் ‘தமிழக வெற்றிக் கழகத்தை’ பார்க்கின்றனர். டெல்லி பா.ஜ.க. தலைமை வைத்த முக்கியமான மற்றும் பரபரப்பான கோரிக்கை, விஜய்யை அ.தி.மு.க. – பா.ஜ.க. கூட்டணிக்குள் கொண்டு வர வேண்டும் என்பதே ஆகும்.
எப்படியாவது விஜய்யை கூட்டணிக்குள் கொண்டு வர வேண்டியது உங்கள் பொறுப்பு. அவரது ரசிகர் பலமும், இளைய தலைமுறையினர் மத்தியில் அவருக்கு இருக்கும் ஆதரவும் தி.மு.க.வின் வாக்கு வங்கியை கணிசமாக பாதிக்கும். அதன் மூலம் நம் வெற்றி உறுதி செய்யப்படும்” என்று டெல்லி தலைமை அழுத்தமாக கூறியதாகச் செய்திகள் கசிகின்றன.
“உங்களால் விஜய்யை கூட்டணிக்குள் கொண்டு வர முடியவில்லை என்றால், நாங்களே நேரடியாக களத்தில் இறங்கி விஜய்யுடன் பேசுவோம். அவரது மனதை மாற்றி, கூட்டணிக்குள் கொண்டு வருவோம்” என்றும் பா.ஜ.க. தலைமை அ.தி.மு.க.விடம் சொன்னதாகவும் கூறப்படுகிறது.
இந்தச் சூழலில்தான், நடிகர் விஜய்யின் உறுதியான அரசியல் நிலைப்பாடு குறித்து பல கேள்விகள் எழுகின்றன. விஜய் ஏற்கனவே தான் ஒரு தூய்மையான அரசியல் பாதையை உருவாக்க விரும்புவதாகவும், 2026 சட்டமன்ற தேர்தலை தனித்து சந்திப்பதே தனது முதல் இலக்கு என்றும் வெளிப்படையாக அறிவித்துள்ளார். மற்ற கட்சிகளில் இருந்து வரும் ‘சுயநலவாதிகள்’ தனது கட்சிக்குள் வரக்கூடாது என்பதில் அவர் கறாராக இருக்கிறார்.
தேசிய அளவில் பா.ஜ.க. எவ்வளவு பெரிய கட்சியாக இருந்தாலும், விஜய்க்கு அதன் கொள்கை அணுகுமுறைகள், குறிப்பாக சிறுபான்மையினர் மற்றும் மத கொள்கைகள் குறித்த பா.ஜ.க.வின் நிலைப்பாடு, தமிழக வெற்றி கழகத்தின் பிம்பத்திற்கு பாதகமாக அமையலாம்.
விஜய்யின் ஆரம்பகால ரசிகர்கள் மற்றும் விசுவாசிகள் பலரும் தி.மு.க., அ.தி.மு.க., பா.ஜ.க. போன்ற பாரம்பரிய கட்சிகளைத் தவிர்த்து, மாற்றத்தை எதிர்பார்த்து விஜய்க்கு ஆதரவளிப்பவர்கள். பா.ஜ.க.வுடன் கூட்டணி வைத்தால், இந்த தொண்டர்கள் மத்தியில் சோர்வு ஏற்பட வாய்ப்பு உண்டு.
எனவே, பா.ஜ.க. நேரடியாக பேச்சுவார்த்தை நடத்தினாலும், தனது அடிப்படை அரசியல் சித்தாந்தத்தில் உறுதியாக இருக்கும் விஜய்யின் நிலைப்பாட்டை உடைப்பது அவ்வளவு எளிதல்ல என்றே அரசியல் வல்லுநர்கள் கருதுகின்றனர்.
பா.ஜ.க. தலைமை நேரடியாக அ.தி.மு.க.வுக்கு அழுத்தம் கொடுத்து, “நாங்களே களத்தில் இறங்குவோம்” என்று கூறியதன் மூலம், அவர்கள் மறைமுகமாக விஜய்யின் அரசியல் சுதந்திரத்தை சீண்டுவதாகவும் சிலர் பார்க்கிறார்கள்.
விஜய் இன்னும் அரசியல் ரீதியாக அதிகாரப்பூர்வமாக யாருடனும் சேரவில்லை. இந்த நிலையில், ஒரு பெரிய தேசியக் கட்சி பகிரங்கமாக அவரை தங்கள் கூட்டணிக்குள் கொண்டு வர முயற்சிப்பது, விஜய்க்கு சாதகமாகவும் அமையலாம். ஏனெனில், அனைத்து கட்சிகளும் அவரை ஒரு தவிர்க்க முடியாத சக்தியாக கருதுகிறார்கள் என்ற பிம்பத்தை இது மக்கள் மத்தியில் ஏற்படுத்தும்.
மொத்தத்தில், விஜய்யின் ‘தமிழக வெற்றிக் கழகம்’ என்பது, தி.மு.க.வை வீழ்த்த பா.ஜ.க.வுக்கு கிடைத்த கடைசி நம்பிக்கையாக மாறியுள்ளது. ஆனால், இந்த விஷயத்தில் விஜய் என்ன முடிவெடுக்கிறார் என்பதைப் பொறுத்தே 2026 தமிழக சட்டமன்ற தேர்தலின் அரசியல் களமும் அமையும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
