வாஷிங்டன் மாகாணத்தை சேர்ந்த ஒருவர், மனிதர்களுக்கு இதற்கு முன்பு கண்டறியப்படாத ஒரு புதிய வகையான பறவை காய்ச்சல் வைரஸால் உயிரிழந்த உலகின் முதல் நபர் என்ற நிகழ்வு உலகம் முழுவதும் பெரும் அதிர்ச்சியை ஏற்படுத்தியுள்ளது.
உயிரிழந்த அந்த நபர், வயதானவர் மற்றும் ஏற்கனவே சில உடல்நல பிரச்சினைகளை கொண்டிருந்தவர். அவருக்கு கடுமையான காய்ச்சல் மற்றும் சுவாசிப்பதில் சிரமம் போன்ற அறிகுறிகள் இருந்ததால், இந்த மாத தொடக்கத்தில் பறவை காய்ச்சலுக்காக அவர் மருத்துவமனையில் அனுமதிக்கப்பட்டார்.
சிகிச்சையின் போது எடுக்கப்பட்ட ஆய்வக பரிசோதனைகள், அவர் H5N5 என்ற பறவை காய்ச்சல் வகையால் பாதிக்கப்பட்டதை உறுதிப்படுத்தின. இந்த வகை வைரஸ் இதற்கு முன்னர் விலங்குகளில் கண்டறியப்பட்டிருந்தாலும், மனிதர்களுக்கு தொற்றியதாக பதிவு செய்யப்படுவது இதுவே முதல் முறை. வைரஸால் இறந்த நபருக்கு வீட்டிலேயே ஒரு கொல்லைப்புற பண்ணை இருந்தது. அதில் கலப்பு வகை நாட்டு பறவைகள் பல இருந்ததாக தெரிய வந்துள்ளது.
இந்த சம்பவம் குறித்து வாஷிங்டன் மாநில சுகாதாரத் துறை வெளியிட்டுள்ள அறிக்கையில், “பொதுமக்களுக்கு ஆபத்து குறைவாகவே உள்ளது. நோயாளியுடன் நெருங்கிய தொடர்பு கொண்ட வேறு யாருக்கும் பறவை காய்ச்சல் உறுதி செய்யப்படவில்லை. மனிதர்களுக்கிடையே இந்த வைரஸ் பரவியதற்கான எந்த ஆதாரமும் இல்லை. மனிதரிடமிருந்து மனிதருக்கு பரவுதல் நிகழவில்லை என்பதை உறுதிப்படுத்த, நோயாளியுடன் நெருங்கிய தொடர்பு கொண்டவர்கள் தொடர்ந்து கண்காணிக்கப்படுவார்கள்,” என்றும் தெரிவித்துள்ளது.
உயிரிழந்தவரின் பெயர், பாலினம், வயது மற்றும் சிகிச்சை குறித்த கூடுதல் விவரங்கள் வெளியிடப்படவில்லை. பாதிக்கப்பட்ட நபரின் கொல்லைப்புறத்தில் இருந்த பறவை கூட்டத்தில் பறவை காய்ச்சல் கண்டறியப்பட்டதாலும், இரண்டு பறவைகள் சில வாரங்களுக்கு முன்பு அடையாளம் தெரியாத நோயால் இறந்ததாலும், நாட்டு பறவைகள் அல்லது காட்டு பறவைகளுடனான தொடர்பு காரணமாகவே அவருக்கு இந்த தொற்று ஏற்பட்டிருக்கலாம் என்று அதிகாரிகள் நம்புகின்றனர்.
பறவைக் காய்ச்சலின் முந்தைய மனித தொற்று நிகழ்வுகள் அனைத்தும் H5N1 என்ற வகையினால் மட்டுமே ஏற்பட்டிருந்தன. இந்த சூழலில், H5N5 வகை மனிதர்களுக்கு தொற்றியிருப்பது, இந்த வைரஸின் ‘கணிக்க முடியாத’ பரிணாம வளர்ச்சியை காட்டுவதாக வல்லுநர்கள் கருத்து தெரிவித்துள்ளனர்.
இருப்பினும், இந்த H5N5 வகை வைரஸ், மற்ற வகைகளை காட்டிலும் மனிதர்களுக்கு அதிக தொற்றுத்தன்மை கொண்டதாகவோ அல்லது கடுமையான நோயை ஏற்படுத்துவதாகவோ இருப்பதற்கான தற்போதைய ஆதாரம் எதுவும் இல்லை என்று அவர்கள் கூறியுள்ளனர்.
பறவைக் காய்ச்சல், மனிதர்களுக்கிடையே பரவுவதற்கு கற்றுக் கொண்டால், கோவிட் பெருந்தொற்றுக்கு ஒத்த ஒரு புதிய வெடிப்புக்கு வழிவகுக்கும் என்ற கவலைகள் இன்னும் நிலவுகின்றன. இருப்பினும், பொதுமக்களுக்கு இதன் ஆபத்து இன்னும் குறைந்த அளவிலேயே உள்ளது என்று சி.டி.சி. போன்ற நிறுவனங்கள் வலியுறுத்துகின்றன.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
