தமிழக அரசியல் களத்தில் ஒரு புதிய சலசலப்பை ஏற்படுத்தியுள்ள தவெக தலைவர் விஜய், எதிர்வரும் சட்டமன்றத் தேர்தலில் எந்த கட்சியுடனும் கூட்டணி இல்லை என்ற ஒரு திடமான முடிவை எடுத்திருப்பதாக கூறப்படுகிறது. ‘சிங்கம் சிங்கிளாத்தான் வரும்’ என்ற சினிமா வசனத்தை மெய்ப்பிப்பது போல, எந்த சமரசத்திற்கும் இடம் கொடுக்காமல் தனித்து போட்டியிட விஜய் தயாராகி வருவதன் பின்னணியில் உள்ள அரசியல் பார்வை ஆழமானது.
கடந்த பல ஆண்டுகளாக தமிழ்நாட்டை பொறுத்தவரை, ஒரு பெரிய அரசியல் கட்சி தனித்து போட்டியிட்டு ஆட்சியைப் பிடிப்பது என்பது அரிதினும் அரிதான நிகழ்வாகவே உள்ளது. திராவிட கட்சிகள் கூட ஏதேனும் ஒரு கூட்டணி பலத்தை நம்பியே தேர்தலை எதிர்கொள்கின்றன. இந்த சூழலில், புதிய கட்சியாக உருவாகியுள்ள ‘தவெக’ எந்த கூட்டணியும் வேண்டாம் என்ற முடிவை எடுத்திருப்பது அரசியல் நோக்கர்களை வியப்படைய வைத்துள்ளது.
விஜய்யின் இந்தத் திடமான நிலைப்பாட்டிற்கு அவரது தீவிர ரசிகர் பலமும், இளைஞர்கள் மத்தியிலும் சாமானியர்கள் மத்தியிலும் அவர் கொண்டுள்ள நேரடி தொடர்பும்தான் அடிப்படை பலமாக இருக்கிறது. தனது அரசியல் நோக்கங்கள் குறித்து அவர் மிகவும் தெளிவான பார்வை கொண்டிருப்பதாக தெரிகிறது:
மக்கள் எங்கள் மீது நம்பிக்கை வைத்து தனித்து போட்டியிடுவோம். மக்கள் வாக்களித்தால், நாங்கள் மாநிலத்திற்கு கட்டாயம் நல்லது செய்வோம். மக்கள் நம்பிக்கை வைக்கவில்லை என்றால், இருக்கவே இருக்கிறது திரைப்படம். இந்த முடிவு அவர் பதவிக்காக அரசியலுக்கு வரவில்லை என்பதையும், மக்கள் சக்தி மட்டுமே தனது இலக்கை நிர்ணயிக்கும் என்பதையும் வெளிப்படுத்துவதாக பார்க்கப்படுகிறது.
கூட்டணியை நிராகரிக்கும் விஜய்யின் முடிவுக்கு பின்னால் ஒரு ஆழமான கொள்கை சார்ந்த பார்வையும் உள்ளது. ஒரு பெரிய கட்சியுடன் கூட்டணி வைக்கும்போது, சிறிய கட்சி தனது கொள்கைகள், இலக்குகள் மற்றும் திட்டங்களில் சமரசம் செய்துகொள்ள வேண்டிய கட்டாயம் எழுகிறது. சமரசம் செய்து, கூட்டணி அமைத்து கிடைக்கும் ஆட்சி வேண்டாம். அப்படி ஒரு ஆட்சி அமைந்தால், அந்த ஆட்சியில் நினைத்ததை செய்ய முடியாது. மக்களுக்கு கொடுத்த வாக்குறுதிகளையும், கனவுத் திட்டங்களையும் நிறைவேற்ற இயலாமல் போகலாம். கூட்டணியில் உள்ள கட்சிகளே நம்முடைய திட்டத்தை எதிர்த்து அரசியல் செய்யலாம்.
ஒரு கட்சியின் அடிப்படை தத்துவங்களை சிதைத்து, அதிகாரத்தை பகிர்ந்துகொள்ளும் அரசியலில் வேண்டாம். ஒரு வேளை ஆட்சி அதிகாரம் கிடைத்தால், திட்டமிட்டபடி முழுமையான நிர்வாக மாற்றங்களை செயல்படுத்தும் வல்லமை கொண்டதாக இருக்க வேண்டும். இதனால் தான், 100% கட்டுப்பாடுடைய ஒரு தனி ஆட்சி அதிகாரத்துக்காக விஜய் காத்திருக்கிறார்.
இந்த முடிவானது, விஜய் ஒரு ‘ரிஸ்க்’ எடுப்பவராக கருதப்படலாம் அல்லது அரசியல் களத்தின் யதார்த்தத்தை புரிந்துகொள்ளாத முடிவாகவும் சிலர் விமர்சிக்கலாம். ஆனால், விஜய்யின் சமீபத்திய செயல்பாடுகள், அவர் துணிந்துவிட்டார் என்பதையே உணர்த்துகிறது. தமிழக மக்கள் தங்களை நம்பி வாக்களித்தால், அதுவே தனக்கு கிடைத்த முழுமையான அங்கீகாரம் என்று அவர் கருதுகிறார்.
கூட்டணி இல்லாமல் தனித்து நிற்பது என்பது, அவர் திராவிட கட்சிகளின் பாரம்பரிய கூட்டணி அரசியல் கலாச்சாரத்திற்கு ஒரு வலுவான மாற்றாக தன்னை பிரகடனப்படுத்தி கொள்ள உதவுகிறது. கூட்டணி இல்லாமல் ஆட்சியை பிடிக்க முடியாது என்பது தமிழ்நாட்டின் ஃபார்முலாவாக இருக்கலாம். ஆனால் மக்கள் நினைத்தால் ஒரு கட்சிக்கு பெரும்பான்மை கொடுத்து ஆட்சியில் தனியாக உட்கார வைக்க முடியும். அப்படி மக்கள் நமக்கு ஒரு வாய்ப்பு கொடுத்தால் ஆட்சி செய்வோம், இல்லையெனில் மக்கள் தீர்ப்பை மதித்து அரசியலில் இருந்து விலகிவிடுவோம், நாம் வேண்டுமா? வேண்டாமா? என்பதை மக்கள் முடிவு செய்யட்டும் என்ற முடிவுடன் விஜய் இருப்பதாக கூறப்படுகிறது.
விஜய்யின் இந்த கொள்கை, அவரது ‘தவெக’வை ஒரு மாற்று சக்தியாக முன்னிறுத்தி, இளைஞர்கள் மற்றும் நடுநிலை வாக்காளர்களின் கவனத்தை ஈர்க்கலாம். இந்த திடமான முடிவு, வரும் தேர்தலில் ‘தவெக’வின் வெற்றி வாய்ப்புகளை கேள்விக்குறியாக்கினாலும், எதிர்காலத்தில் தமிழ்நாட்டில் ஒரு புதிய, சமரசமற்ற அரசியல் கலாச்சாரத்திற்கான விதையை விதைக்கிறாரா என்ற கேள்வி தற்போது எழுந்துள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
