தங்கள் மிகப்பெரிய வாடிக்கையாளர் தங்கள் பொருட்களுக்கு திடீரென 50% கூடுதல் வரி விதித்தால் என்ன செய்வது? நீங்கள் இந்தியாவாக இருந்தால், உடனடியாக ஒரு மாற்று திட்டத்தை உருவாக்க வேண்டும். தற்போது, அந்த ‘பிளான் பி’ ஆப்பிரிக்கா மற்றும் தெற்காசிய நாடுகளில் தீவிரமாக செயலாக்கப்பட்டு வருகிறது.
சமீபத்தில், அமெரிக்கா நீண்டகால இந்திய ஏற்றுமதிப் பொருட்களின் மீது 50% கூடுதல் வரியை விதித்தது. இந்த திடீர் வரி, இந்திய சிறு, குறு மற்றும் நடுத்தர தொழில்கள் மிகவும் பாதிக்கப்பட்டன. ஏனெனில், நாட்டின் மொத்த ஏற்றுமதியில் 45% இவர்களின் பங்களிப்புதான். இதனால் ஆயிரக்கணக்கான இந்திய ஏற்றுமதியாளர்கள் உடனடியாக புதிய வாங்குவோரை கண்டறிய வேண்டிய கட்டாயத்துக்கு தள்ளப்பட்டனர்.
இந்த சவாலை எதிர்கொள்ள, வர்த்தக அமைச்சகம் மற்றும் MSME அமைச்சகம் ஆகியவை இணைந்து ஒரு முன்னோடி திட்டத்தைத் தொடங்கியுள்ளன. “அமெரிக்கா ஒரு கதவை மூடினால், வேறு எட்டு புதிய கதவுகளை திறக்க வேண்டும்” என்பதே இதன் எளிய யோசனை.
இந்த எட்டு புதிய இலக்கு நாடுகள் இவைதான்:
ஆப்பிரிக்கா: கானா, ருவாண்டா, உகாண்டா, டோகோ
ஆசியா/தெற்காசியா: பஹ்ரைன், பூட்டான், நேபாளம், இலங்கை
இந்திய தூதரகங்கள் இந்த நாடுகளில் உடனடியாக கலந்தாலோசனைகளை நடத்தின். வாங்குபவர்-விற்பவர் சந்திப்புகள் ஏற்பாடு செய்யப்பட்டு வருகின்றன. அமெரிக்காவுக்கு செல்ல வேண்டிய பொருட்களை ஆப்பிரிக்கா மற்றும் அண்டை நாடுகளுக்கு திருப்பி அனுப்புவதே இத்திட்டத்தின் முக்கிய நோக்கம்.
இந்தியா இந்த முறை பாரம்பரிய முறையை மாற்றியுள்ளது. பொதுவாக, ஏற்றுமதியாளர்கள் வெளிநாடுகளுக்கு சென்று வாங்குபவர்களை தேடுவார்கள். ஆனால், இந்த முறை இந்திய அரசே ரிவர்ஸ் பையர்-செல்லர் மீட் (RBSMs) என்ற திட்டத்தை ஏற்பாடு செய்துள்ளது. இதன் மூலம், வெளிநாட்டு வாங்குபவர்கள் இந்தியாவிற்கு வந்து MSME நிறுவனங்களை சந்திக்கின்றனர்.
ஏற்கனவே புனே மற்றும் விசாக் ஆகிய நகரங்களில் இரண்டு RBSM சந்திப்புகள் நடந்துள்ளன. மகாராஷ்டிராவில் உள்ள MSME நிறுவனங்கள் மட்டுமே $1.47 மில்லியன் மதிப்பிலான மாதிரி ஆர்டர்களை பெற்றுள்ளன. இந்த ஆர்டர்கள் பெரிய அளவில் மாறினால், ஏற்றுமதி $116 மில்லியன் வரை உயரக்கூடும். அடுத்த ஆண்டு மேலும் ஆறு சந்திப்புகளுக்கு திட்டமிடப்பட்டுள்ளது.
தற்போது இந்தியா இந்த எட்டு நாடுகளுக்கு ஆண்டுதோறும் சுமார் $18 பில்லியன் மதிப்புள்ள பொருட்களை ஏற்றுமதி செய்கிறது . ஆனால் இந்த திட்டத்தின் மூலம் இந்த சந்தைகளை மிக வேகமாக வளர்க்க திட்டமிடப்பட்டுள்ளது.
ஆப்பிரிக்கா தற்போது உலகிலேயே வேகமாக வளர்ந்து வரும் புதிய தேவைக்கான சந்தையாக உள்ளது. ஆப்பிரிக்க நாடுகள், ஆப்பிரிக்க வளர்ச்சி மற்றும் வாய்ப்பு சட்டம் மூலம் அமெரிக்க சந்தையில் குறைந்த வரி கட்டணத்துடன் பொருட்களை அணுக முடியும். இதனால், ஆப்பிரிக்கா வழியாக அனுப்பப்படும் இந்திய பொருட்களும் அமெரிக்க சந்தையை மறைமுகமாக அணுக வாய்ப்புள்ளது.
கடந்த 2024 நிதியாண்டில், இந்தியா ஆப்பிரிக்காவிற்கு $38 பில்லியன் மதிப்பிலான பொருட்களையும், தெற்காசிய நாடுகளுக்கு மேலும் $27 பில்லியன் மதிப்பிலான பொருட்களையும் ஏற்றுமதி செய்துள்ளது குறிப்பிடத்தக்கது.
இந்தியா இந்த புதிய சந்தைகளில் பின்வரும் துறைகளில் கவனம் செலுத்தி வருகிறது. கானா மற்றும் டோகோ ஆகியவை இந்த பொருட்களுக்கான பிரதான மையங்களாக தயாராகி வருகின்றன:
உடைகள் மற்றும் ஜவுளிகள்
மருந்துப் பொருட்கள்
பொறியியல் பொருட்கள்
பதப்படுத்தப்பட்ட உணவுப்பொருட்கள்
இதற்கிடையில், புதிய மருந்து சந்தைகளாக மாண்டினீக்ரோ, சாட், கொமோரோஸ், புருனே, ஸ்வீடன், ஹைட்டி போன்ற நாடுகளும், எலெக்ட்ரானிக்ஸ் சந்தைகளாக மங்கோலியா, எல் சால்வடார், ஹோண்டுராஸ், வியட்நாம் போன்ற நாடுகளும் கண்டறியப்பட்டுள்ளன. வேளாண் பொருட்களை நைஜீரியா, லிதுவேனியா, அர்ஜென்டினா போன்ற நாடுகளுக்கு விற்கவும் திட்டமிடப்பட்டுள்ளது.
சுருக்கமாக சொன்னால், அமெரிக்காவின் அதிரடி வரியின் வரியை எதிர்கொள்ள காத்திருக்காமல், இந்தியா ’பிளான் பி’ திட்டத்தை உருவாக்கி ஒரு உலகளாவிய மாற்று திட்டத்தை விரைவாக உருவாக்கி வருகிறது. இந்த திட்டம் வெற்றியடைந்தால், அடுத்த பத்தாண்டுகளில் இந்தியாவின் ஏற்றுமதி வளர்ச்சி அமெரிக்கா இல்லாமல் மிகப்பெரிய வர்த்தகத்தை பெறும். இதை உணர்ந்து தான் டிரம்ப் இப்போது வேறு வழியில்லாமல் இந்தியாவுக்கு வரியை குறைக்க முன்வந்துள்ளார்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
