அமெரிக்க அதிபர் டொனால்ட் டிரம்ப், இந்தியாவுடனான வர்த்தக உறவுகள் குறித்த தனது நிலைப்பாட்டில் வியத்தகு மாற்றத்தை வெளிப்படுத்தியுள்ளார். ரஷ்யாவிடமிருந்து இந்தியா தொடர்ந்து எண்ணெய் கொள்முதல் செய்வதையோ அல்லது அமெரிக்காவின் வேளாண் பொருட்கள் மற்றும் பால் பொருட்களை ஏற்க மறுப்பதையோ இந்தியா மாற்றிக்கொள்ளவில்லை. இருப்பினும், டிரம்ப் இந்தியா மீது விதித்த வர்த்தக வரிகளை குறைக்க முன்வந்துள்ளார். இந்த திடீர் மாற்றத்திற்கான காரணங்கள், அமெரிக்காவின் கட்டாயமான பொருளாதர மற்றும் புவிசார் அரசியல் தேவைகளுடன் பிணைக்கப்பட்டுள்ளன.
இந்தியா மீது டிரம்ப் விதித்த வர்த்தக வரிகளை நீக்க அவர் முன்வருவதற்கான காரணங்கள், இரு நாடுகளுக்கும் இடையேயான வர்த்தக பற்றாக்குறை குறைந்தது மற்றும் அமெரிக்காவின் உள்நாட்டு தேவைகளைப் பூர்த்தி செய்ய இயலாமை ஆகியவைதான்.
இந்தியாவின் சில பொருட்கள் மீது விதிக்கப்பட்ட அதிகப்படியான வரிகளால், அமெரிக்காவிலுள்ள பல நிறுவனங்கள் குறிப்பாக எலக்ட்ரானிக் உதிரிபாகங்கள், ஜவுளி, ஆட்டோ பாகங்கள், ரத்தினங்கள் மற்றும் நகைகள் துறைகளில் பெரும் பாதிப்பை சந்தித்தன. இந்த வரிகளை நீக்குவதன் மூலம், அமெரிக்காவின் உள்நாட்டு சந்தையை இயல்பு நிலைக்கு கொண்டுவர டிரம்ப் விரும்புகிறார்.
சீனாவுக்கு எதிரான ஒரு வலுவான சமநிலையாக இந்தியா தேவை என்பதால், வர்த்தக உறவுகளை சீர்செய்வது அமெரிக்காவுக்கு முக்கியமானதாகிறது. வர்த்தக ரீதியாக இந்தியாவுடன் இணக்கமாக இருப்பது, சீனாவுக்கு அழுத்தம் கொடுக்க அமெரிக்காவுக்கு உதவும் ஒரு அணுகுமுறையாகும்.
இந்தியா, அமெரிக்காவின் கோரிக்கைகளுக்கு பணிய மறுத்தும் கூட, டிரம்ப் இறங்கி வந்ததற்கு, இந்தியாவின் உறுதியான நிலைப்பாடும் ஒரு காரணமாகும். ரஷ்யாவிடமிருந்து எண்ணெய் கொள்முதலை குறைக்கும்படி அமெரிக்கா அழுத்தம் கொடுத்தபோதும், இந்தியா அதை நிராகரித்ததுடன், விலக்கு அளித்ததை ஆறு மாதங்களுக்கு மட்டும் என்று நீட்டிக்க அமெரிக்காவுக்கு இணங்க வேண்டியிருந்தது.
வர்த்தக ஒப்பந்தத்தில், அமெரிக்காவின் முக்கியமான பொருட்களான பால் மற்றும் இதர வேளாண் பொருட்களை இந்திய சந்தையில் அனுமதிப்பதில் இந்தியா சமரசம் செய்ய மறுத்துவிட்டது. இந்திய விவசாயிகளின் நலன்களை பாதுகாக்க வேண்டும் என்பதில் இந்தியா உறுதியாக இருந்தது.
டிரம்ப்பின் நிலைப்பாட்டில் மிகவும் குறிப்பிடத்தக்க ஒரு மாற்றம், H-1B விசாக்கள் பற்றிய அவரது கருத்துதான். டிரம்ப் தனது பேச்சில், “அமெரிக்காவிற்கு H-1B விசா வைத்திருப்பவர்கள் அத்தியாவசியமானவர்கள், ஏனெனில் அமெரிக்காவில் போதிய திறமையானவர்கள் இல்லை’ என்று பகிரங்கமாக ஒப்புக்கொண்டார்.
இதற்கு முன்னர் H-1B விசாக்களை கட்டுப்படுத்துவதை கொள்கையாக டிரம்ப் கொண்டிருந்தார். ஆனால், திறமையான இந்தியர்கள் போன்ற வெளிநாட்டவர்களை நம்பி இருக்கும் அமெரிக்க தொழில்நுட்பம் மற்றும் கல்வி நிறுவனங்கள், இந்த கட்டுப்பாடுகளால் பெரும் சவால்களை எதிர்கொண்டன. இந்த உண்மை நிலையை இப்போது டிரம்ப் உணர்ந்துள்ளார்.
அமெரிக்காவுக்கு இந்தியாவின் சில ஏற்றுமதி பொருட்களின் வளர்ச்சி குறைய தொடங்கியது. குறிப்பாக, அமெரிக்கச் சந்தையில் விற்கப்பட்ட ஜவுளி மற்றும் சில தொழில்நுட்ப உதிரிபாகங்களின் ஏற்றுமதி வளர்ச்சி குறைந்தது. சில இந்திய ஏற்றுமதியாளர்கள் தங்கள் பொருட்களை வியட்நாம் போன்ற பிற நாடுகளுக்கு குறைவான விலைக்கு விற்க வேண்டிய கட்டாயம் ஏற்பட்டது.
இருந்தபோதிலும், இந்திய பொருளாதாரம் உலகின் அதிவேகமாக வளரும் பொருளாதாரங்களில் ஒன்றாக இருந்தது. இதன் காரணமாக டிரம்ப்பின் வரிவிதிப்பு இந்திய பொருளாதாரத்தில் ஒரு பேரழிவை ஏற்படுத்தவில்லை; மாறாக சில சவால்களை மட்டுமே ஏற்படுத்தியது.
எதிர்காலத்தில், இரு நாடுகளும் ஒரு சீரான வர்த்தக உறவை உருவாக்க முற்படலாம். இருப்பினும், இந்தியா தனது தேசிய நலன்களையும், சுயசார்பு கொள்கையையும் விட்டுக்கொடுக்காமல் அமெரிக்காவுடன் ஒரு சமநிலைப்படுத்தும் விளையாட்டை தொடர வேண்டியிருக்கும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
