நடிகர் விஜய்யின் அரசியல் பிரவேசம், தமிழக அரசியல் களத்தில் ஒரு அதிர்வை ஏற்படுத்தியுள்ளது என்றால் அது மிகையல்ல. ‘தமிழக வெற்றிக் கழகம்’ என்ற பெயரில் அவர் கட்சி தொடங்கியதிலிருந்தே, அனைத்து அரசியல் விவாதங்களின் மையப்புள்ளியாக விஜய் உருவெடுத்துள்ளார். அண்மையில் அவர் மேற்கொண்ட சில நடவடிக்கைகள், குறிப்பாக ஒரு கரூர் துயர சம்பவத்தில் பாதிக்கப்பட்ட 41 குடும்பங்களை சந்தித்து ஆறுதல் அளித்த விதம் மற்றும் அவர்களுக்கு உறுதுணையாக நின்ற செயல், அவரது அரசியல் இமேஜை தாறுமாறாக உயர்த்தி இருப்பதாகவே அரசியல் நோக்கர்கள் கருதுகின்றனர்.
விஜய்யின் அரசியல் வருகைக்கு பிறகு நடத்தப்பட்ட பெரும்பாலான கருத்துக்கணிப்புகள், அவருக்கு சாதகமாகவே முடிவுகளை வெளியிட்டுள்ளதாக தகவல்கள் தெரிவிக்கின்றன. சினிமா துறையில் அவருக்கு இருந்த வெற்றி நாயகன் பிம்பம், இப்போது அரசியல் களத்திலும் எதிரொலிக்கிறது.
நீண்ட காலமாக புதிய தலைமைக்காக காத்திருந்த இளைஞர்கள், விஜய்யை ஒரு மாற்று சக்தியாக பார்க்க தொடங்கியுள்ளனர். சமூக ஊடகங்களில் அவரது ரசிகர்கள் மற்றும் ஆதரவாளர்களின் செயல்பாடுகள் இதற்கு சான்று.
திராவிட கட்சிகளின் ஆட்சியில் மாறி மாறி ஏற்பட்ட சலிப்பு மற்றும் அதிருப்தி மனப்பான்மை, ஒரு புதிய தலைமைக்கு ஆதரவளிக்க மக்களை தூண்டியுள்ளது.விஜய்யின் நடவடிக்கைகளில் இருக்கும் உடனடி தன்மை மற்றும் துணிச்சல், மக்களுக்கு நம்பிக்கை அளிக்கிறது. இந்தக் கருத்துக்கணிப்பு முடிவுகள், விஜய் எனும் தனிமனிதரை கடந்து, அவர் முன்னிறுத்த போகும் அரசியல் கோட்பாடுகளுக்கும் தமிழக மக்கள் தயாராக இருக்கிறார்களா என்ற கேள்வியையும் எழுப்பியுள்ளது.
திரைத்துறையில் இருந்துகொண்டே மக்கள் நலப்பணிகளை செய்துவந்ததை விஜய்யின் அரசியல் 1.0 என்று கூறினால், இப்போது கட்சி தொடங்கி, நேரடி அரசியலில் களமிறங்கியுள்ளதை அரசியல் 2.0 எனலாம். இந்த கட்டத்தில், அவரது அணுகுமுறை மிகவும் கணிப்புடனும், உறுதியுடனும் இருப்பதாக அரசியல் விமர்சகர்கள் குறிப்பிடுகின்றனர்.
கரூரில் ஏற்பட்ட துயர சம்பவத்தில் பாதிக்கப்பட்ட 41 குடும்பங்களை விஜய் நேரில் சந்தித்து ஆறுதல் கூறியது, ஒவ்வொரு குடும்பத்தினரின் காலில் விழுந்து மன்னிப்பு கேட்டதாக கூறுவது எல்லாம் வெறும் அரசியல் சடங்காக பார்க்கப்படவில்லை. மாறாக, இது அவரது மனிதாபிமான பக்கத்தையும், ஒரு தலைமைக்குரிய பொறுப்புணர்வையும் வெளிப்படுத்தியுள்ளது.
பொதுவாக இதுபோன்ற நிகழ்வுகளில் அரசியல் தலைவர்கள் நிதி உதவி அளிப்பதுடன் நிறுத்திக்கொள்வது வழக்கம். ஆனால், விஜய் பாதிக்கப்பட்டவர்களை தத்தெடுத்துக்கொள்வதாக அறிவித்து, அவர்களின் எதிர்காலத்திற்கு உறுதுணையாக நிற்பது, அவர் மீதான நம்பகத்தன்மையை பல மடங்கு அதிகரித்துள்ளது. இந்த செயல், வெறும் அனுதாப அலையை தாண்டி, அடித்தட்டு மக்களிடம் ஆழமான தாக்கத்தை ஏற்படுத்தியுள்ளது.
விஜய்யின் இந்த மக்கள் நல அணுகுமுறை தமிழகத்தில் இத்தனை காலம் ஆதிக்கம் செலுத்திவந்த பாரம்பரிய அரசியல் கட்சிகளுக்கு ஒரு புதிய சவாலாக உருவெடுத்துள்ளது. விஜய்யை விமர்சித்தால், அது அவரது ரசிகர்களின் கடும் எதிர்ப்புக்கு வழிவகுக்கும்; அமைதி காத்தால், அவர் எளிதாக அரசியல் களத்தில் வேரூன்றி விடுவார் என்ற இக்கட்டான நிலைக்கு எதிர்க்கட்சிகள் தள்ளப்பட்டுள்ளன. சில கட்சிகள், அவர் அரசியல் நிலைப்பாடுகளை இன்னும் தெளிவுபடுத்தவில்லை, அல்லது அவர் பின்னணியில் வேறு சக்திகள் உள்ளன என பிம்பத்தை சிதைக்க முயல்கின்றன. ஆனாலும், விஜய்யின் களப்பணிகள் இந்த விமர்சனங்களை மழுங்கடிக்கின்றன.
ஆளுங்கட்சியும் எதிர்க்கட்சியும் அவரை நேரடியாக எதிர்கொள்ளத் தயங்குவது, அவர் ஏற்படுத்தியுள்ள அரசியல் அழுத்தத்தின் தீவிரத்தை உணர்த்துகிறது. விஜய்யின் அரசியல் பிரவேசம், தமிழக மக்களுக்கு ஒரு புதிய நம்பிக்கையை அளித்துள்ளதா? என்ற கேள்விக்கு, ‘ஆம்’ என்ற பதில்தான் பலரிடமிருந்தும் எழுகிறது. அவர் முன்வைக்கும் முக்கிய கொள்கைகளில் ஒன்று ஊழலற்ற நிர்வாகம் மற்றும் வெளிப்படைத்தன்மை. இதுவே, நீண்ட காலமாக மக்கள் விரும்பும் மாற்றம்.
திராவிட அரசியலின் பழைய சித்தாந்தங்களிலிருந்து விலகி, நவீன தமிழகத்திற்கான புதிய பொருளாதார மற்றும் சமூகத் திட்டங்களை அவர் வகுக்கலாம் என்ற எதிர்பார்ப்பு உள்ளது. ஆனாலும், சினிமா பிம்பம் மட்டுமே வெற்றியை தந்துவிடாது. தனது கொள்கைகள், திட்டங்கள் மற்றும் கட்சியின் கட்டமைப்பை பக்குவமாகவும், உறுதியுடனும் மக்களிடம் கொண்டு சேர்ப்பதில் தான் விஜய்யின் அரசியல் 2.0-ன் வெற்றி அடங்கியுள்ளது. வரும் காலங்களில் அவரது அடுத்தடுத்த நகர்வுகள், தமிழக அரசியல் வரலாற்றை மாற்றி எழுதும் வல்லமை கொண்டவையாக இருக்கலாம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
