பீகார் சட்டமன்ற தேர்தல் குறித்து தேசிய ஊடகங்கள் பரபரப்பாக விவாதித்து கொண்டிருக்கும் இந்த நேரத்தில், வட இந்திய ஊடகங்கள் மற்றும் மூத்த அரசியல் ஆலோசகர்கள் நடத்தி வரும் ஆரம்பக்கட்ட கருத்துக் கணிப்புகள், தமிழக அரசியல் களத்தில் புயலை கிளப்பியுள்ளது. நடிகர் விஜய் தலைமையிலான ‘தமிழக வெற்றிக் கழகம்’ வரவிருக்கும் சட்டமன்ற தேர்தலில் தனித்துப் போட்டியிட்டால், 100 முதல் 120 தொகுதிகளில் வெற்றி பெற்று தனிப்பெரும் கட்சியாக உருவெடுக்க வாய்ப்புள்ளதாக அந்த கணிப்புகள் சுட்டிக்காட்டுகின்றன.
இந்த அதிர்ச்சி முடிவுகள், தமிழகத்தில் நிலவும் ஆளும் மற்றும் எதிர்க்கட்சிகள் மீதான அதிருப்தியின் ஆழத்தையும், விஜய்யின் தனிப்பட்ட கவர்ச்சியையும் ஒரே நேரத்தில் வெளிப்படுத்துகின்றன. இத்தகைய சூழலில், தமிழக அரசியலில் புதிய அத்தியாயத்தை தொடங்க துணிந்துவிட்ட விஜய்யின் அணுகுமுறை குறித்து விரிவாக பார்ப்போம்.
வட இந்திய ஊடகங்களின் பிராந்திய ஆய்வு முடிவுகள், தமிழகத்தில் திமுக மற்றும் அதிமுகவின் பாரம்பரிய வாக்கு வங்கிகள் பெருமளவு சிதறுவதை காட்டுகின்றன. தவெக தனித்து போட்டியிடும்பட்சத்தில், அது திமுக மற்றும் அதிமுகவின் கோட்டை வாக்குகளை பிரித்து, மாநிலத்தில் ஆளுங்கட்சிக்கு எதிராகக் குரல் கொடுக்க வலுவான ஒரு பிரதான எதிர்க்கட்சியாக உருவெடுக்கும்.
இந்த கருத்து கணிப்புகளின்படி, 100 முதல் 120 தொகுதிகள் என்பது, ஒரு கட்சி ஆட்சியை பிடிப்பதற்கு போதுமானதாக இருப்பதால் ஆட்சி மாற்றம் ஏற்பட அதிக வாய்ப்பு உள்ளது. ஆனால் வெற்றி பெற்ற எம்.எல்.ஏக்கள் விலை போகாமல் இருக்க வேண்டியது மிக முக்கியம்.
இந்தச் சர்வே முடிவுகள், வெறும் நட்சத்திர மோகம் அல்லாமல், கள நிலவரத்தின் அடிப்படையிலேயே எடுக்கப்பட்டதாக கூறப்படுகிறது.
விஜய் தனது அரசியல் நகர்வுகளில் மிகவும் தனித்தன்மையுடனும், உறுதியுடனும் இருப்பதாக அரசியல் வட்டாரங்கள் தெரிவிக்கின்றன. குறிப்பாக, வரவிருக்கும் தேர்தலுக்காக பெரிய கட்சிகளுடன் கூட்டணி அமைக்கும் எண்ணத்தை அவர் கிட்டத்தட்ட நிராகரித்துவிட்டதாக தெரிகிறது.
மத்திய உள்துறை அமைச்சர் அமித்ஷா மற்றும் பாஜகவின் மூத்த தலைவர்கள், விஜய்யை தங்கள் தேசிய ஜனநாயகக் கூட்டணியில் இணைக்க முயன்றதாக கூறப்படுகிறது. ஆனால், மதச்சார்பற்ற பிம்பத்தை பேண விரும்பும் விஜய், இந்த கூட்டணியில் சேர மறுத்துவிட்டதாக தகவல்கள் கசிகின்றன.
மறுபுறம், திமுகவுக்கு மாற்றாக ஒரு பெரிய கூட்டணிக்கு தலைமை தாங்க காங்கிரஸ் மற்றும் ராகுல் காந்தி தரப்பு முயன்றபோது, அவர்களை நம்பி செல்ல விஜய் விரும்பவில்லை எனக் கூறப்படுகிறது. “ராகுலை நம்பி செல்வதை விட, தனித்து சென்று அரசியலில் அடித்தளம் அமைப்பது நல்லது” என்று விஜய் உறுதியாக முடிவெடுத்துவிட்டதாக தவெகவின் முக்கிய நிர்வாகி ஒருவர் தெரிவித்துள்ளார். மேலும் ராகுல் காந்தி, திமுகவிடம் அதிக தொகுதிகள் பெறுவதற்கு தவெக பெயரை பயன்படுத்துவதாகவும் விஜய்க்கு ஒரு சந்தேகம் உள்ளது.
விஜய்யின் இந்த நிலைப்பாடு, எந்த ஒரு தேசியக் கட்சியிடமும் அடிபணியாமல், தமிழகத்தில் ஒரு தனிப்பட்ட சக்தியாக உருவாகி வர வேண்டும் என்ற அவரது பிடிவாதமான உறுதியையே காட்டுகிறது.
இந்த சூழலில், விஜய் சட்டரீதியான போராட்டத்தின் மூலம் மட்டுமே இவற்றை சமாளிக்க முடியும் என்று உறுதியாக நம்புவதாக தெரிகிறது. அரசு, காவல்துறையை வைத்து நெருக்கடி கொடுத்தாலும், நீதிமன்றம் மூலம் நீதி பெறலாம். சட்டத் தடைகள் ஒரு கட்சி வளர்வதை தடுக்க முடியாது” என்ற மனநிலையில் விஜய் இருக்கிறார். தனது கட்சி மீது வைக்கப்படும் விமர்சனங்கள், தொடர்ச்சியான மீடியா தாக்குதல்கள், அரசு நெருக்கடிகள் என எதற்கும் அஞ்சாமல், ‘வருவது வரட்டும்; எதற்கும் துணிந்துவிட்டேன்’ என்ற மனநிலையில் அவர் இருக்கிறார். இந்தத் துணிவே, தனது அரசியல் எதிர்காலத்தை நிர்ணயிக்கும் என்று அவர் நம்புகிறார்.
அரசியல் விமர்சகர்கள் பலர் விஜய்யின் இந்த ஆரம்பக்கட்ட செயல்பாடுகளில் உள்ள ‘ஆளுமைச் சிக்கல்களை’ விமர்சித்தாலும், அவரின் சமீபத்திய நகர்வுகள் ஒரு புதிய கட்டத்தை அடைந்துள்ளதைக் காட்டுகின்றன: கூட்டணிக்கு தயாராகாமல், தனித்து நின்று, அதிகபட்ச இடங்களை பிடித்து, தனது வலிமையை நிரூபிக்க விஜய் முடிவெடுத்துவிட்டார்.
மாமல்லபுரத்தில் பாதிக்கப்பட்டவர்களை சந்தித்தது போன்ற நிகழ்வுகள், இனிமேல் பொதுவெளியில் நேரடியாக மக்களை சந்திக்கும் நிகழ்வுகள் அதிகரிக்கும் என்பதற்கான சமிக்ஞையாகும்.வரவிருக்கும் சட்டமன்றத் தேர்தலில் 100 முதல் 120 இடங்களை பிடித்து, தனிப்பெரும் எதிர்க்கட்சியாக உருவெடுப்பதன் மூலம், 2026 ஆம் ஆண்டு நடக்கும் சட்டமன்ற தேர்தலுக்கான அசைக்க முடியாத அடித்தளத்தை அமைப்பதே விஜய்யின் முக்கிய இலக்காக இருக்கும் என்று தெரிகிறது.
மொத்தத்தில், ஒரு நடிகர் அரசியலுக்கு வந்ததிலிருந்து, அவரை நிராகரித்த அனைத்து பிரதான கட்சிகளும், விமர்சகர்களும், தற்போது வட இந்திய சர்வே முடிவுகளால் அதிர்ச்சி அடைந்துள்ளனர். இனிமேல்தான் தமிழக அரசியல் களத்தில், விஜய்யின் ‘வேற லெவல் ஆட்டம்’ தொடங்கப் போகிறது. இந்த கணிப்புகள் உண்மையாகும் பட்சத்தில், தமிழகத்தின் இரு துருவ அரசியல் நிரந்தரமாக முடிவுக்கு வருவதற்கான வாய்ப்புகள் அதிகம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
