நடிகர் விஜய்யின் அரசியல் பிரவேசமும், அவர் தொடங்கியுள்ள தமிழக வெற்றி கழகமும் குறித்து பேசும்போதெல்லாம், “விஜய் லேசுப்பட்ட ஆள் இல்லை, அவர் ரஜினி, கமல் போல் தோற்க மாட்டார்” என்ற விவாதம் வலுப்பெறுகிறது. இதற்கு பின்னால் இருப்பது, அவர் ஐந்து ஆண்டுகளுக்கு மேலாக செய்த மிகத் துல்லியமான ஆய்வுகளும், ஒவ்வொரு வாக்காளர் பிரிவையும் இலக்கு வைத்து வகுக்கப்பட்ட ‘பக்கா பிளான்’தான் என்று அரசியல் நோக்கர்கள் கருதுகின்றனர்.
திரைப்படங்களில் எப்படி ஒரு மாஸ் ஹீரோவின் அறிமுகம் அனல் பறக்குமோ, அதேபோல, தமிழக வெற்றி கழகத்தின் அரசியல் அறிமுகமும் அதிரடியாக உள்ளது. இந்த அரசியல் திட்டத்தில், அவர் எந்தெந்த வாக்காளர் பிரிவை எவ்வளவு சதவீதம் நம்பியுள்ளார், அதன் பின்னணியில் உள்ள வியூகம் என்ன என்று விரிவாக பார்க்கலாம்.
விஜய் தனது அரசியல் பிரவேசத்தை அறிவிக்கும் முன்பே, கடந்த 5 ஆண்டுகளுக்கும் மேலாக மக்கள் இயக்கம் மூலம் சமூகப் பணிகளை செய்துவந்தார். இது வெறும் ரசிகர் சந்திப்பாக மட்டும் இருக்கவில்லை; அது ஒரு விரிவான அரசியல் கள ஆய்வு ஆகும்.
விஜய் தரப்பு, தமிழகத்தில் உள்ள வாக்காளர்களை பல்வேறு பிரிவுகளாக பிரித்து, ஒவ்வொரு பிரிவின் தேவைகள், ஆளும் கட்சிகள் மீதான அதிருப்தி மற்றும் புதிய தலைமையை அவர்கள் விரும்பும் சதவீதம் ஆகியவற்றை துல்லியமாக மதிப்பிட்டுள்ளதாக கூறப்படுகிறது.
விஜய் தலைமையிலான தமிழக வெற்றிக் கழகம் தனது வெற்றிக்காக சில முக்கிய வாக்காளர் பிரிவுகளை துல்லியமாக இலக்கு வைத்துள்ளதாக ஆய்வுகள் கூறுகின்றன. இளைஞர்கள் (30 வயதிற்குட்பட்டோர்) தான் தவெக-வின் பிரதான இலக்கு. மொத்த வாக்குகளில் சுமார் 30 முதல் 35% வரை உள்ள இந்த பிரிவினரைக் கவரும் ‘மாஸ்’ இமேஜ், நேர்மையான மற்றும் ‘அப்டேட்’டான தலைமை என்ற பிம்பம், அத்துடன் அரசியலில் மாற்றம் தேவை என்ற அவர்களின் மனநிலையைப் பயன்படுத்துவதே வியூகம்.
இரண்டாவதாக, முதல் தலைமுறை வாக்காளர்கள் சுமார் 15 முதல் 20% வரை இலக்கு வைக்கப்பட்டுள்ளனர். புதிய கட்சி, புதிய முகம் என்ற கவர்ச்சியும், திராவிட கட்சிகளின் அரசியலை பற்றி அறியாத இவர்களின் மாற்றத்தை எளிதில் ஏற்றுக்கொள்ளும் வாய்ப்பையும் தவெக நம்புகிறது.
பெண்கள் வாக்காளர்கள் முக்கியமான பிரிவாக கருதப்படுகின்றனர். மக்கள் இயக்கம் மூலம் நடத்தப்பட்ட இலவச உதவித் திட்டங்கள், பெண்கள் கல்விக்கு முக்கியத்துவம் அளித்தது மற்றும் சமூக நீதியை வலியுறுத்தும் மென்மையான அணுகுமுறை ஆகியவை பெண்களை கவரப் பயன்படுத்தப்படும் வியூகங்கள் ஆகும்.
சிறுபான்மையினர் சுமார் 10 முதல் 15% வரை இலக்கு வைக்கப்பட்டுள்ளனர்; மதச்சார்பின்மைக்கு முக்கியத்துவம் அளிக்கும் கொள்கை மற்றும் தேசிய கட்சிகளுடனான கூட்டணி மூலம் இவர்களின் ஆதரவை திரட்டத் திட்டமிடுகிறது.
இறுதியாக, தி.மு.க., அ.தி.மு.க.வின் ஆட்சியில் அதிருப்தியுற்ற திராவிட எதிர்ப்பாளர்கள் மற்றும் பா.ஜ.க.வின் கொள்கைகளால் அதிருப்தியுற்ற பா.ஜ.க. எதிர்ப்பாளர்கள் ஆகியோரை, ஒரு வலுவான மாற்று தளமாக விளங்கி, காங்கிரஸுடனான பேச்சுவார்த்தை மூலம் தேசிய அளவில் எதிர்க்கட்சி கூட்டணியின் அங்கமாக தங்களை காட்டுவதன் மூலம் ஒருங்கிணைக்க விஜய் வியூகம் வகுத்துள்ளார்.
விஜய் எடுத்த சில துணிச்சலான முடிவுகள், அவரது அரசியல் நுண்ணறிவுக்கு சான்றாக அமைகின்றன:ரஜினி, கமல் ஆகியோர் சினிமா மற்றும் அரசியல் இரண்டிலும் கவனம் செலுத்தினர். ஆனால், விஜய் சினிமாவிலிருந்து முற்றிலும் விலகி, தனது கவனத்தை தேர்தல் களத்தில் 100% செலுத்துவது, அவர் வெற்றியில் கொண்டுள்ள தீவிரத்தைக்காட்டுகிறது.
தொழிலதிபர்களையோ அல்லது அரசியல் பின்புலம் கொண்டவர்களையோ நம்பாமல், தன்னுடைய சொந்த பணத்தில் அரசியல் முயற்சியை தொடங்குவது, “ஊழலற்ற நிர்வாகம்” என்ற அவரது கொள்கை என்பதை காட்டுகிறது.
மொத்தத்தில் தமிழக வெற்றி கழகம், கடந்த அரை நூற்றாண்டுக்கும் மேலாக தமிழகத்தை ஆட்சி செய்த திராவிட கட்சிகளுக்கு ஒரு புதிய சவாலை முன்வைத்துள்ளது. விஜய், தனது திரைப்பட அறிமுகத்தை போலவே, அரசியல் அறிமுகத்திலும் வெறும் உணர்ச்சி அரசியலை மட்டும் நம்பாமல், துல்லியமான ஆய்வுகள், தெளிவான கொள்கைகள் மற்றும் ரஜினி, கமல் போன்றோரின் அனுபவங்களில் இருந்து பாடம் கற்றுக்கொண்ட ஒரு திட்டமிட்ட அரசியல் தலைவராகவே களமிறங்கியுள்ளார். 2026 தமிழக சட்டமன்றத் தேர்தல், விஜய்யின் இந்தப் ‘பக்கா பிளான்’ எவ்வளவு வெற்றிகரமானது என்பதை நிரூபிக்கும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
